كوكتەمگى دالا جۇمىستارى, اسىرەسە, ماقتاارال, سارىاعاش اۋداندارىندا قىزۋ جۇرگىزىلۋدە. ماقتاارال اۋدانى بويىنشا 137959,6 گەكتار ەگىستىك القاپتىڭ 11425,0 گەكتارى تىرمالانىپ, 7327,0 گەكتارى جۇمسارتىلعان. قاجەتتى تەحنيكا, قۇرال-سايماندارمەن تولىق قامتاماسىز ەتىلگەن ديقاندار 997,1 گەكتارعا جاڭا جوڭىشقا, 931 گەكتارعا ەرتە پىسەتىن كوكونىس, 855,5 گەكتارعا قىرىققابات داقىلىن ەكتى. باقشا وسىرۋشىلەر دە كوكتەمگى ەگىسكە ەرتە باستان قامدانىپ,1723 گەكتارعا قاربىز, 3120 گەكتارعا قاۋىن تۇقىمىن ەگىپتى. اۋىلدار اراسىنداعى بەيرەسمي جارىستى دا اڭعارۋعا بولادى. كورشىسى ەرتە ويانعان اۋىل قازاعى ۇيىقتاپ جاتپاسى انىق. بۇل ورايدا, دوستىق, ش.دىلدابەكوۆ اۋىلدىق وكرۋگتەرىنىڭ ديقاندارى جاڭا جوڭىشقا, قاربىز ەگۋدە الدا كەلەدى. ەرتە كوكونىس وسىرۋدە, ونىڭ ىشىندە قىرىققابات ەگۋ بويىنشا اتامەكەن, ماقتاارال اۋىلدىق وكرۋگتەرىنىڭ ديقاندارى كوش باستاپتى. ءاربىر اۋىل وكرۋگتەرىندە قۇرىلعان جۇمىسشى بريگادالارى ديقاندارمەن كەلىسىپ, جالدامالى نەگىزدە جۇمىس ىستەۋدە. نەگىزگى داقىلى "اق التىن" بولىپ سانالاتىن ماقتارالدىق شارۋالار جەرگە ماقتا ءشيتىن سەبۋگە دە دايىندىقتارىن جاساۋدا.
ال سارىاعاش اۋدانىندا بيىل 13 مىڭ 700 گەكتار جەرگە كوكونىس ەگىلگەن. بىرتىلەك اۋىلدىق وكرۋگىندەگى «نۇرجان» شارۋا قوجالىعى 1,6 گەكتار جىلىجايعا قۇلپىناي وسىرۋدە. شارۋاشىلىقتا 30 ادام جۇمىسپەن قامتىلعان. شارۋا قوجالىعى 1 ماۋسىمدا 50 توننا كولەمىندە قۇلپىناي ءوندىرۋدى جوسپارلاپ وتىر. قىزاناق جانە قيار وسىرۋمەن اينالىساتىن «فاحريتدين» شارۋا قوجالىعى دا بيىل ءونىم كولەمىن ارتتىرۋ ماقساتىندا جۇمىس ىستەۋدە. جىلىنا 250 توننا ءونىم ءوندىرىپ وتىرعان قوجالىقتا 25 ادام تۇراقتى جۇمىسپەن قامتىلعان. ماۋسىم كەزدەرىندە جۇمىسشىلار سانى 2 ەسەگە دەيىن ارتادى.
ەركىن دوسىمباي,
وڭتۇستىك قازاقستان وبلىسى
