تەومان حوس شىعارماشىلىعىنىڭ ءبىر ەرەكشەلىگى, ونىڭ عاجايىپ ەڭبەكتەرىنە بويلاۋ ءۇشىن ىشكى الەمىڭ دارحان دالانىڭ كەڭدىگىمەن ۇندەسىپ, جۇرەگىڭدە تابيعاتقا, تىرشىلىككە دەگەن سۇيىسپەنشىلىك جاتسا بولعانى. سۋرەتشىنىڭ نەگىزگى ماقساتى, ءپرينتسيپىنىڭ ءوزى وسىنداي. «تۋعان ولكەمنىڭ پەيزاجىن سالعاندا, وتانىما دەگەن بار ماحابباتىمدى بەرەمىن», دەيدى ول.
ەلىمىزدەگى بەينەلەۋ ونەرىنىڭ مايتالماندارىمەن بىرگە ءتۇرلى مادەني شارالارعا قاتىسىپ, زاماناۋي قازاقستاندىق سۋرەتشىلەردىڭ اراسىندا ءوز ورنىن العان تەومان حوس ەسىك قالاسىندا دۇنيەگە كەلگەن. ەسىكتەگى پەداگوگيكالىق كوللەدجگە وقۋعا ءتۇسىپ, ونى 2007 جىلى بىتىرگەن.
وتە جاقسى پەداگوگتاردان ءتالىم الدىم. گۇلنار بازاربايقىزى, بۇحارباي بوگەنباي ۇلى ءتارىزدى ۇستازدارىم بولاشاق ومىرىمە مىقتى ىرگەتاس قالادى, – دەيتىن تەومان كوللەدجدى اياقتاعاننان كەيىن-اق سۋرەتشى رەتىندە تانىلا باستاپتى. قازاق ۇلتتىق ونەر اكادەمياسىنىڭ ستانوكتى گرافيكا بولىمىنە وقۋعا تۇسكەننەن كەيىن بىرەر ءسات شىعارماشىلىق جولى وزگە ارناعا بۇرىلىپ, رەجيسسەرلەردەن فيلمگە تۇسۋگە شاقىرتۋ العان. 2012 جىلى «گدە-تو نا توم كونتسە ليني» فيلمىندەگى باستى ءرولى ءۇشىن ارنايى جۇلدەگە يە بولعان ونەرپاز, وسى ۋاقىتقا دەيىن 31 فيلمگە ءتۇسىپتى. اكادەميانى بىتىرگەن سوڭ تۇركيانىڭ «Ak deniz» ۋنيۆەرسيتەتىنىڭ ارنايى شاقىرۋىمەن ەكى جىل بويى ۋنيۆەرسيتەتتىڭ كوركەمونەر فاكۋلتەتىندە بەينەلەۋ ونەرىنەن ءدارىس وقيدى. 2014 جىلى قازاقستانعا ورالىپ, قازاق باس ساۋلەت-قۇرىلىس اكادەمياسىنا جۇمىسقا ورنالاسقان.
سۋرەتتەردى كوبىنە پەيزاج جانرىندا قارىنداشپەن جانە قىلقالاممەن سالاتىن تەوماننىڭ جۇمىستارى تابيعاتتىڭ وزىندەي ءتىرى, شىنايى كورىنەدى. افورت جانە ليتوگرافيادا دا شەبەرلىگىن سىناپ كورگەن سۋرەتشىنىڭ جانىنا جاقىنى – قارىنداش.
– ماعان تۋعان ءوڭىرىمنىڭ قاراپايىم تابيعاتى ۇنايدى. مەن سالعان سۋرەتتەر كورەرمەنگە ءبىزدىڭ عاجايىپ ولكەمىزدىڭ سۇلۋلىعىن كورىپ, سەزىنۋدى, ءسۇيۋدى, تاماشا تابيعاتپەن ۇيلەسىمدە ءومىر ءسۇرۋدى ۇيرەتسە ەكەن دەيمىن. قازىرگى ۋاقىتتا وتاندىق سۋرەتشىلەرمەن بىرگە ەلىمىزدىڭ تۇپكىر-تۇپكىرىندە ءوزىمنىڭ ەڭبەكتەرىمدى ۇسىنىپ ءجۇرمىن, – دەيدى سۋرەتشى.
2015 جىلى قازاقستان سۋرەتشىلەر وداعىنىڭ مۇشەسى اتانعان تەومان حوس قازاق حاندىعىنىڭ 550 جىلدىعىنا وراي ەلوردادا وتكەن كورمەگە قاتىسقان. ءا.قاستەەۆ مۋزەيىندە وتكەن ء«بىزدىڭ ءداۋىر» كورمەسىندە ءتورت بىردەي تۋىندىسى ۇسىنىلىپ, جوعارى باعا الدى. ەلىمىزدە جانە تۇركيادا ۇيىمداستىرىلاتىن شارالارعا بەلسەنە قاتىسادى. شەتەلدەردە دە جەكە كورمەلەرىن وتكىزىپ جۇرگەن سۋرەتشىنىڭ كوز تارتار كارتينالارىنا قىزىعۋشىلار – كوبىنە شەتەلدىك كوللەكتسيونەرلەر. ساف ونەردى سۇيەتىن قازاقستاندىقتار دا ونىڭ ەڭبەكتەرىن لايىقتى باعاعا ساتىپ الادى.
جاقسى كارتينا الدىمەن ەستەتيكالىق تالعامنىڭ سۇرانىسىن وتەۋى كەرەك. تابيعات كورىنىستەرى قاراپايىم حالىقتىڭ قىزىعۋشىلىعىنا قاراي دۇنيەگە كەلگەن تۋىندى دەيتىن دە كوزقاراس جوق ەمەس. الايدا تەوماننىڭ قىلقالامىنان شىققان مايدا تولقىندار شەكسىزدىككە ۇلاسىپ, قارىنداشىنىڭ ۇشىنان تۋعان قىستاقتان ساعىنىشتىڭ لەبى ەسكەندە, ونىڭ تالانتىنا ەرىكسىز تامساناسىز.
نۇربانۋ كامال,
جۋرناليست
الماتى وبلىسى
