وعان باس پروكۋراتۋرا, ادىلەت مينيسترلىگى مەن وزگە دە مۇددەلى مەملەكەتتىك ورگانداردىڭ, حالىقارالىق ۇيىمداردىڭ, ازاماتتىق قوعام ينستيتۋتتارىنىڭ وكىلدەرى, قۇقىق قورعاۋشىلار قاتىسىپ ءوز پىكىرلەرىن ورتاعا سالدى.
جيىندا بايانداما جاساعان ىشكى ىستەر ءمينيسترىنىڭ ورىنباسارى راشيد جاقىپوۆتىڭ ايتۋىنشا, قازاقستاننىڭ قىلمىستىق اتقارۋ جۇيەسىندەگى رەفورمالاردىڭ ناتيجەسىندە تۇرمەدە ۇستالاتىن سوتتالۋشىلار سانى 25 پايىزعا قىسقارعان. بۇل كورسەتكىش قالىپتاسقان جاعدايدىڭ ءبىرشاما جاقسارعانىن كورسەتەدى. ويتكەنى 2000 جىلى تۇرمەدە جازاسىن وتەۋشىلەردىڭ ەسەبى بويىنشا جۇرگىزىلەتىن الەمدىك رەيتينگتە ەلىمىز الدىڭعى ۇشتىكتى تۇيىندەپ, كوڭىلگە سەلكەۋ تۇسىرگەن. ال بۇگىندە قازاقستان وڭتايلى رەفورمالار ارقىلى اتالعان رەيتينگ بويىنشا جاعدايىن تۇزەپ, 71-ءشى ورىنعا كوتەرىلدى.
وسى ورايدا ر.جاقىپوۆ ەلىمىزدىڭ بىرىككەن ۇلتتار ۇيىمىنىڭ ۇستانىمىنا سايكەس ازاپتاۋلار مەن باسقا دا قاتىگەز, ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەردى ازايتۋ بويىنشا ۇلتتىق زاڭنامانى حالىقارالىق نورمالار مەن سايكەستەندىرۋ باعىتىندا اۋقىمدى جۇمىستاردىڭ اتقارىلعانىن ەرەكشە اتاپ ءوتتى.
ونىڭ سوزىنە قاراعاندا, بۇۇ-نىڭ كونۆەنتسياسىنا سايكەس, ازاپتاۋلار ەلىمىزدە اۋىر قىلمىس دەپ تانىلىپ, زاڭ شەڭبەرىنەن اتتاعانداردى 12 جىلعا باس بوستاندىعىنان ايىرۋ جازاسى بەلگىلەنگەن. ال قۇقىق قورعاۋ ورگاندارىنىڭ تەرگەۋ عيماراتتارىندا بەينەكامەرامەن جابدىقتالعان 490 «ايقىن بولمە» اشىلعان. ازاپتاۋلاردىڭ الدىن الاتىن حالىقارالىق ستاندارتتارعا سايكەس الماتى, قىزىلوردا, ورال جانە اتىراۋ قالالارىنداعى جابىق مەكەمەلەر زاماناۋي عيماراتتارعا كوشىرىلگەن. ونىڭ ۇستىنە بۇعان دەيىن جەرتولەلەردە ورنالاسىپ كەلگەن 26 وقشاۋلاۋ ورنى جابىلعان.
قوعامدىق كەڭەس وتىرىسىندا ازاپتاۋلاردىڭ قاسىرەتى جايىندا حالىقارالىق ۇيىمداردىڭ وكىلدەرى دە اشىلا ايتتى.
– بىزگە اسىرەسە سوڭعى جىلدارى جابىق مەكەمەلەردەن ارىز كوبەيدى. بىراق ناقتى ازاپتاۋلار بويىنشا دالەلدەنەتىندەرى نەكەن-ساياق, – دەيدى ەۋروپالىق وداقتىڭ «قازاقستانداعى قىلمىستىق ءادىل سوت جۇيەسىن جەتىلدىرۋ» جوباسىنىڭ جەتەكشىسى ساۋلە مەكتەپباەۆا.
ال ىشكى ىستەر مينيسترلىگى وزىندىك قاۋىپسىزدىك دەپارتامەنتى باسقارما باستىعىنىڭ ورىنباسارى ادىلقوجا قۇسايىنوۆتىڭ ايتۋىنشا, تەك سوڭعى ءۇش جىلدىڭ وزىندە ىشكى ىستەر سالاسىنىڭ 59 قىزمەتكەرى ازاپتاۋلارعا قاتىسى بولعاندىعى ءۇشىن باس بوستاندىقتارىنان ايىرىلعان.
سەرىك ابدىبەك,
«ەگەمەن قازاقستان»
