ەۋروپالىق وداق پەن قازاقستان اراسىنداعى ديپلوماتيالىق قاتىناستاردىڭ 25 جىلدىعىنا وراي ەۋروپالىق وداقتىڭ قازاقستانداعى وكىلدىگى, اقپارات جانە كوممۋنيكاتسيالار مينيسترلىگىنىڭ قولداۋىمەن قازمەديا مەديامەكتەبىمەن بىرلەسە وتىرىپ, قازاقستاندىق جۋرناليستەرگە ارنالعان «ەۋرووداق – قازاقستان: ارىپتەستىك پەن ىنتىماقتاستىقتىڭ 25 جىلدىعى» اتتى كاسىبي حالىقارالىق تاعىلىمداماعا بايقاۋ جاريالايدى.
بايقاۋ ەۋروپالىق وداق پەن قازاقستان رەسپۋبليكاسى اراسىنداعى قاتىناستاردى كەڭەيتۋگە ءارى نىعايتۋعا, اشىق ديالوگ قالىپتاستىرۋعا جانە قازاقستان مەديا قاۋىمداستىعىندا ەۋروپالىق وداق تۋرالى اقپاراتتىڭ كەڭەيۋىنە باعىتتالعان. بايقاۋ ناتيجەسىندە ەو ينستيتۋتتارى (ەۋروپالىق پارلامەنت, ەو كەڭەسى, ەۋروپالىق كوميسسيا, ەۋروپالىق سىرتقى ىستەر قىزمەتى) مەن بريۋسسەلدە مەديا پۋلدى زەردەلەۋ ءۇشىن ءبىر اپتالىق تانىستىرۋ تاعىلىمداماعا قاتىسۋعا 3 جەڭىمپاز ىرىكتەلەتىن بولادى. سونىمەن قاتار جەڭىمپازدار ەۋروپالىق كوميسسيانىڭ كۇندەلىكتى بريفينگتەرىنە قاتىسا الادى جانە ءىشىنارا ەو ينستيتۋتتارىنىڭ جۇمىس مەحانيزمدەرىمەن تانىسادى. سونداي-اق جەڭىمپازدار 2018 جىل بارىسىندا قازمەديا مەديامەكتەبىنىڭ ترەنينگتەرى مەن سەمينارلارىنا («حابار» اگەنتتىگى شەبەرحاناسى جوباسى) قاتىسۋ مۇمكىندىگىن الادى.
تاعىلىمداما قورىتىندىلارى بويىنشا قاتىسۋشىعا ەو وكىلدىگىنىڭ جانە قازمەديا مەديامەكتەبىنىڭ اتىنان ۇسىنىس حات جانە سەرتيفيكات تاپسىرىلاتىن بولادى.
كونكۋرسقا ءوتىنىش قابىلداۋ 2018 جىلدىڭ 30 ساۋىرىنە دەيىن جۇرگىزىلەدى.
راۋان قايدار,
«ەگەمەن قازاقستان»
