«اق جايىق» باسپاسىنان جارىق كورگەن اۋديوكىتاپقا قالامگەردىڭ «مونا ليزا», «سوڭعى سپەكتاكل», «قىر موزايكالارى», «اينا», «جالعىزدىق», «اسپانداعى اق كوبەلەكتەر», «التىن بالىق» سىندى شىعارمالارى ەنگەن.
قازاق كوركەمسوزىنىڭ تابيعاتىنا تەرەڭ بويلاعان راحىمجان وتارباەۆتىڭ «اسپانداعى اق كوبەلەكتەرىندەگى» داۋرەننىڭ ءتيپى – بولاشاقتىڭ بەينەسى. وقىرماندى ءوز وزىنەن كوز جازىپ قالماۋعا ۇيرەتەتىن جۇمباق تۇلعا. مۇندا مازمۇننان بۇرىن كەسكىن, كەيىپ-كەسپىر كورىنەدى. «التىن بالىق» اڭگىمەسىندە تۇرمەلىك ءتارتىپتى بۇزعان, قامالعان ساناداعى ءومىر – اكۆاريۋمداعى التىن شاباقتىڭ جايىقتىڭ تولقىنىنا سەكىرەتىن تۇسىن كورەمىز دە ويلانىپ قالامىز.
قازاقتىڭ قارا ءسوزىن قيىستىرا وتىرىپ ءتۇرلى بەينەلەردى ومىرگە اكەلگەن جازۋشىنىڭ شىعارماشىلىق ايدىنى بۇگىندە قازاق پروزاسىنىڭ ايتارلىقتاي بەلەسى بولىپ قالىپتاستى. قالامگەر ورالىمدى, ىرعاقتى تىلىمەن, ايشىقتى بوياۋلارىمەن وقىرمانىن بەيجاي قالدىرمايدى.
دۇنيەدەن وزعانىنا قىرىق كۇن تولعان جازۋشىنىڭ اۋديوكىتابىنىڭ تۇساۋكەسەرىنە وتباسى مۇشەلەرى, قالامداس ارىپتەستەرى مەن وقىرماندار قاۋىم قاتىستى. قىتاي حالىق رەسپۋبليكاسىنان جازۋشى اكبار ءماجيت, موڭعوليادان اقىن سۇراعان راحمەت ۇلى كەلىپ, قايراتكەر جازۋشىنىڭ قالامگەرلىك بولمىسىنا, شىعارماشىلىق الەمىنە وي-پىكىر ايتىپ, ارناۋ جىرلارىن وقىدى. «قىتايدا الەمنىڭ ۇزدىك جازۋشىلارىنىڭ جاقسى كىتاپتارى شىقسا, ءبىر اي كولەمىندە اۋدارىپ, باسىپ جاتادى. جىل سايىن مىڭداعان جازۋشىنىڭ شىعارمالارى ميلليونداعان وقىرماننىڭ قولىنا جەتەدى. سولاردىڭ اراسىندا راحىمجان وتارباەۆتىڭ دا شىعارمالارى ءتارجىمالانىپ, وقىرماندار تاراپىنان وتە جىلى قابىلداندى. قازىرگى زامانداعى قازاق جازۋشىلارىنىڭ ىشىندە راحىمجانداي ءوز وقىرماندارىن الەمنەن تاپقان قالامگەرلەر سيرەك» دەدى جازۋشى اكبار ءماجيت.
جازۋشى, مەملەكەتتىك سىيلىقتىڭ لاۋرەاتى قاجىعالي مۇقامبەتقالي جۇرگىزگەن جيىندا وقىرمان سۇيىكتى جازۋشىسىن تاعى ءبىر رەت ەسىنە الىپ, قالامگەر شىعارمالارى ءوز جۇرەگىنەن وشپەيتىنىن تاعى ءبىر مارتە پاش ەتكەندەي.
باعاشار تۇرسىنباي ۇلى,
«ەگەمەن قازاقستان»
