جۇمىس ساپارى اياسىندا وتكەن كەزدەسۋدە قازاق ۇلتتىق اگرارلىق ۋنيۆەرسيتەتى, قازۇاۋ جانىنداعى اگروتەحنولوگيالىق حاب (AgriTech Hub), تاشكەنت يرريگاتسيا جانە اۋىل شارۋاشىلىعىن مەحانيزاتسيالاۋ ينستيتۋتى, تاشكەنت مەملەكەتتىك اگرارلىق ۋنيۆەرسيتەتى بىرىگىپ تورتجاقتى مەموراندۋمعا قول قويدى. تاراپتار اراسىنداعى ءبىلىم, عىلىم, ءوندىرىس ينتەگراتسياسىن دامىتۋعا باعىتتالعان مەموراندۋمعا اگرارلىق جوعارى وقۋ ورىندارىنىڭ رەكتورلارى ت.ي.ەسپولوۆ (قازۇاۋ),ۋ.پ.ۋمۋرزاكوۆ. (تيامي), ب.ا.سۋلايمونوۆ (تماۋ) جانە AgriTech Hub ديرەكتورى م.ك.بەكسۇلتانوۆ قول قويىپ, ارىپتەستىك بايلانىستاردى جاڭا دەڭگەيگە شىعارۋ جونىندە كەلىسىمگە كەلدى.
ىنتىماقتاستىقتىڭ باستى مىندەتى – ەكى مەملەكەتكە دە ءتيىمدى بىرلەسكەن يننوۆاتسيالىق جوبالاردى ىسكە اسىرىپ, اگرارلىق ءبىلىم, عىلىم سالاسىنداعى ءوزارا بايلانىستى نىعايتۋ ءۇشىن AgriTech Hub Uzbekistan ورتالعىن قۇرۋ. بۇل ارىپتەستىك بايلانىستار ازيا دامۋ بانكىنىڭ قولداۋىمەن جۇزەگە اسىرىلاتىن بولادى.
