فوتو: وكسانا سوسنوۆسكايا
وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ تاراتقان مالىمەتتەرىنە سۇيەنسەك, 31 ناۋرىز كۇنى زىريان اۋدانىنىڭ 9 بىردەي (زۋبوۆسك, سولوۆەۆو, تۇرعىسىن, پەرۆوروسسيسكوە, مالەەۆسك, چاپاەۆ, سنەگيرەۆو, كرەستوۆكا, پارىگينو) اۋىلى مەن زىريان قالاسىنداعى سۋ باسقان ۇيلەردەن 400-گە جۋىق ادام قاۋىپسىز جەرگە كوشىرىلگەن. تۇرعىنداردىڭ كوپشىلىگى تۋىستارىنىڭ ۇيىندە قالۋدى ءجون كورسە, 70 ادام ەۆاكۋاتسيا بەكەتىنuە ورنالاستىرىلىپتى. ال ناۋرىز ايىنىڭ سوڭعى كۇنى اۋدان ورتالىعىنداعى 105 ءۇيدى سۋ الىپ, 200-گە جۋىق تۇرعىن قاۋىپسىز جەرگە كوشىرىلگەن. بۇگىن زىريان اۋدانىنىڭ اكىمى نۇرجان توقسەيىتوۆپەن تەلەفون ارقىلى سويلەسكەنىمىزدە اۋداندا 167 ءۇيدى سۋ باسقانىن, 133 تۇرعىن كوشىرىلىپ, ونىڭ 87-ءسى تۋىستارىنىڭ ۇيىنە, قالعانى ەۆاكۋاتسيالىق بەكەتكە ورنالاستىرىلىپ, ىستىق تاماقپەن قامتاماسىز ەتىلگەنىن جەتكىزدى.
31 ناۋرىز كۇنى كوكپەكتى اۋدانىنىڭ سامار اۋىلىنا دامبىدان قاۋىپ ءتونىپ, 200 ادام قاۋىپسىز جەرگە كوشىرىلەتىنى حابارلانعان ەدى. الايدا 1 ءساۋىر كۇنى كوكپەكتى اۋداندىق توتەنشە جاعدايلار جانە جەدەل دايىندىق ءبولىمىنىڭ باسشىسى قۋانىش انكەباەۆپەن بايلانىسقا شىققانىمىزدا 31 ناۋرىزدا ساماردان تەك 90-نان استام تۇرعىندار كوشىرىلگەنىن, قازىرگى ۋاقىتتا ولار ۇيلەرىنە ورالا باستاعانىن, دامبىداعى سۋ دەڭگەيى دە ءبىرشاما تۇسكەنىن حابارلادى.
قازىرگى ۋاقىتتا تەك سەمەي مەن زىريان عانا ەمەس, كاتونقاراعاي, كوكپەكتى, شەمونايحا اۋداندارى دا ايتىپ كەلمەيتىن اپاتتى اۋىزدىقتاۋمەن اينالىسىپ جاتقانى بەلگىلى. «31 ناۋرىز كۇنى ءبىر تاۋلىكتە وبلىستا 263 ءۇيدىڭ سۋى سورىلدى. تاسقىن زارداپتارىن جويۋ جۇمىستارىمەن 1 مىڭعا جۋىق ادام شۇعىلدانىپ جاتىر. ىشكى ىستەر مينيسترلىگى توتەنشە جاعدايلار كوميتەتى مەن ءوزىمىزدىڭ ءوڭىردىڭ قۇتقارۋشىلارىنان بولەك الماتى قالاسى, الماتى, پاۆلودار جانە وڭتۇستىك قازاقستان وبلىستارىنان كومەككە كەلگەن ارىپتەستەرىمىز اپاتتىق-قۇتقارۋ جۇمىستارىمەن اينالىسۋدا», - دەيدى دەپارتامەنتتىڭ ءباسپاسوز قىزمەتىنىڭ مامانى اناستاسيا سكليار.
ازامات قاسىم,
«ەگەمەن قازاقستان»
شىعىس قازاقستان وبلىسى
