الفيا ەرسايىن قازىر اتىراۋ گۋمانيتارلىق كولەدجىنىڭ ستۋدەنتى
بايقاۋدا باق سىناۋ ءۇشىن ەلورداداعى اقتىق كەزەڭگە قازاقستاننىڭ ءار ايماعىنان باس-اياعى 30 ارۋ جينالدى. سالتاناتتى كەشتە قازىلار فينالعا شىعاتىن 5 ارۋدى ىرىكتەپ الدى. وعان دينارا بايمۇراتوۆا (سەمەي,17 جاستا), سابينا ازىمباەۆا (الماتى, 18 جاستا), مايمۋنا كۇلكەشەۆا (استانا, 19 جاستا), الفيا ەرسايىن (اتىراۋ, 16 جاستا), ەكاتەرينا دۆورەتسكايا (كاراعاندى, 19 جاستا) ىلىكتى.
وسىدان سوڭ ەلىمىزدىڭ ەڭ سۇلۋ ارۋىن ءداستۇرلى تۇردە قازاقستاندىقتار تىكەلەي ەفير ارقىلى وتكىزىلگەن ونلاين جانە سمس داۋىس بەرۋ ارقىلى تاڭدادى. ونىڭ قورىتىندىسى بويىنشا, كوپ داۋىس جيناعان «قازاقستان ارۋى-2018» بايقاۋىنىڭ جەڭىمپازى انىقتالدى.
داۋىس بەرۋ ناتيجەسىندە ءبىرىنشى ۆيتسە-ميسس اتاعىنا ە. دۆورەتسكايا لايىق دەپ تانىلسا, ەكىنشى ۆيتسە-ميسس بولىپ م. كۇلكەشەۆا تانىلدى. ال ءۇشىنشى ۆيتسە-ميسس اتاعىن د. بايمۇراتوۆا جەڭىپ الدى.
ءبىر ايتا كەتەرلىگى, ۇلتتىق فينالدى ادەتتەگىدەي جاڭا جىل قارساڭىندا ەمەس, ناۋرىز مەرەكەسى كۇندەرىندە وتكىزىلدى. 22 ناۋرىزدان باستاپ «قازاقستان ارۋى-2018» رەسمي سايتىندا بايقاۋ فيناليستەرىنە داۋىس بەرۋ باستالعان ەدى.
«قازاقستان ارۋى» بايقاۋىنىڭ جەڭىمپازى اقشالاي جۇلدەدەن بولەك, ليۋكس برەندتەرىمەن جارناما بويىنشا بىرقاتار كەلىسىمشارت جاسايدى جانە تيىسىنشە «الەم ارۋى-2018» بايقاۋىندا قازاقستان رەسپۋبليكاسىنىڭ نامىسىن قورعاۋ مۇمكىندىگىنە يە بولادى.
