باياندى بولاشاققا تىڭ سەرپىن بەرەتىن بۇل يگى باستامالار مەملەكەتتىك باعدارلامالاردىڭ جارقىن جالعاسى دەپ قابىلدايمىز. جاريالانعان «بەس الەۋمەتتىك باستامانىڭ» ارقايسىسى حالقىمىز ءۇشىن ۇلكەن بەرەكەنىڭ باستاۋى. ءاربىر وتباسىنىڭ باسپانالى بولۋىنا بارلىق مۇمكىندىكتى جاساۋعا ءمان بەرىلگەن ءبىرىنشى باستاماسىندا, ەندىگى كەزەكتە ءۇي الۋ ءۇشىن نەسيە ءوسىمىنىڭ مولشەرلەمەسى قازىرگىدەي 14-16 پايىز ەمەس, «7 – 20 – 25» باعدارلاماسى بويىنشا يپوتەكالىق نەسيەنىڭ جىلدىق مولشەرى 7 پايىزدىق مەجەدەن اسپايتىن بولادى.
مۇنداي ماڭىزدى مىندەتتەردى جۇزەگە اسىرۋ ءۇشىن ۇلتتىق بانكتىڭ, ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەكتىگىن ەلباسى تۇسىنىكتى بولاتىنداي ەتىپ باعامداپ بەردى. ال ەڭبەكاقىسى تومەن قازاقستاندىقتارعا ەداۋىر قولداۋ كورسەتۋ جاعى ەكىنشى باسىمدىقتا ايتىلدى. بۇل دا – جاعىمدى جاڭالىق. 2019 جىلدان باستاپ ازاماتتار جالاقىسىنىڭ سالىق جۇكتەمەسى 10 ەسە ازايتىلاتىن بولۋى قۋانتارلىق. ءبىلىم الۋعا قولجەتىمدىلىكتى ارتتىرۋ باعىتىندا ەل ءۇشىن جاقسى جاڭالىق ءۇشىنشى باسىمدىقتا جاريا ەتىلدى. 2018-2019 وقۋ جىلىندا ستۋدەنتتەرگە ارنالعان گرانتتاردىڭ ءوزى ادام كاپيتالى سالاسىنا ەلەۋلى سەرپىن بەرەتىنىنە سەنىمدىمىز. ەكى جىل ارالىعىندا قازىرگى جىل سايىن بولىنەتىن 54 مىڭ گرانتتىڭ ۇستىنە تاعى 20 مىڭى قوسىلعالى وتىر. ونىڭ 11 مىڭى جاڭا ەكونوميكاعا قاجەتتى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى. ال 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاتاقحانا سالۋ تاپسىرىلدى. وسىلايشا جاتاقحانا تاپشىلىعى ماسەلەسى ءبىرجولا شەشىلمەك. تۇپتەپ كەلگەندە بۇل ماڭىزدى شەشىم باسەكەگە قابىلەتتى مامانداردى دايارلاۋعا جول اشادى. ءتورتىنشى باسىمدىقتا شاعىن نەسيە بەرۋدى كوبەيتۋدىڭ تەتىكتەرى دە جان-جاقتى قاراستىرىلدى.
مەملەكەت باسشىسى شاعىن نەسيەلەردىڭ جالپى سوماسىن 62 ميلليارد تەڭگەگە جەتكىزۋدى جۇكتەدى. ناتيجەسىندە, نەسيە الىپ, ءوز ءىسىن باستايتىن ازاماتتاردىڭ سانى بىلتىرعىدان 2 ەسە ارتىپ, 14 مىڭعا جەتىپ, اۋىلداعى كاسىپكەرلىكتىڭ كوكجيەگى كەڭەيەدى. وڭىرلەرگە گاز تارتۋ ماسەلەسى بەسىنشى باسىمدىقتا بارىنشا قامتىلدى. بۇل ورايدا قاراوزەك (قىزىلوردا وبلىسى) – جەزقازعان – قاراعاندى – تەمىرتاۋ – استانا باعىتى بويىنشا ماگيسترالدى گاز قۇبىرىن سالۋ جوباسىن جۇزەگە اسىرۋ كەرەكتىگىن تاپسىردى. بۇل 2 ميلليون 700 مىڭ ادامدى گازبەن قامتاماسىز ەتۋمەن قاتار, ارقانىڭ ەكولوگيالىق جاعدايىنا زور ىقپال ەتەتىن بولادى. مەملەكەت باسشىسىنىڭ جۇكتەگەن جاڭا مىندەتتەرىن جاۋاپكەرشىلىكپەن سەزىنىپ, تىندىرىمدى جۇمىسقا ۇلاستىرايىق.
باقىتجان ايدوسوۆا,
«نۇر وتان» پارتياسى زەرەندى اۋداندىق فيليالى توراعاسىنىڭ ءبىرىنشى ورىنباسارى
اقمولا وبلىسى
