مەملەكەت باسشىسى ۇسىنعان بەس باستامانىڭ العاشقىسى – ەلىمىزدىڭ ءار وتباسىنا باسپانا الۋعا مۇمكىندىك بەرەدى. تۇرعىن ۇيگە قولجەتىمدىلىك – بۇگىنگى كۇننىڭ وتكىر ماسەلەسى. اتىراۋ وبلىسىندا وتكەن جىلى 624,1 مىڭ شارشى مەتر تۇرعىن ءۇي پايدالانۋعا بەرىلدى, بۇل الدىڭعى جىلمەن سالىستىرعاندا 11,7 %-عا ارتىق. قازىر ايماقتاعى مەملەكەتتىك تۇرعىن ءۇي قورىنان تۇرعىن ۇيگە مۇقتاج ازاماتتار سانى 24,7 مىڭ ادام بولىپ وتىر. ونىڭ 19,4 مىڭى – اتىراۋ قالاسىنىڭ ۇلەسىندە. بۇل مۇنايلى وڭىردە تۇرعىن ءۇي قۇرىلىسى بويىنشا اۋقىمدى مىندەتتەردىڭ تۇرعانىن جانە اتقارىلاتىن شارالاردىڭ كوپ ەكەنىن كورسەتەدى. ايماقتا تۇرعىن ءۇي قۇرىلىسىنىڭ قارقىن الۋىمەن كاسىپكەرلىك نىساندارىنىڭ قاتارى كوبەيىپ, جاڭادان جۇمىس ورىندارى اشىلادى, ادامداردىڭ باسپانالى بولۋ مۇمكىندىگى ارتىپ, دەموگرافيالىق ساياساتقا دا وڭ ىقپالىن تيگىزەدى.
حالىققا ارناعان ەلباسى ۇندەۋىنىڭ ەكىنشى باستاماسىندا جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن 10 ەسەگە ازايتۋ كوزدەلگەن. مۇنىڭ ءوزى حالىقتىڭ الەۋمەتتىك جاعىنان ءالسىز توپتارىنا جاتاتىن بولىگىنىڭ تۇرمىس جاعدايىن جاقسارتۋعا باعىتتالعان قولداۋ دەپ تۇسىنگەن ءجون.
ءۇشىنشى باستاما حالىقتىڭ جوعارى ءبىلىم الۋىنا جاعداي جاساۋ, ساپالى ماماندىق يەلەرىن دايىنداۋ مەن ستۋدەنتتەردىڭ جاتاقحاناداعى جاعدايىن جاقسارتۋعا باعىتتالعان. اسىرەسە ستۋدەنتتەرگە ارنالعان قوسىمشا گرانتتار كولەمىن ۇلعايتۋ جانە ولاردى جاتاقحانامەن قامتاماسىز ەتۋ وزەكتى ماسەلەنىڭ ءبىرى بولاتىن. پرەزيدەنت باستاماسىندا كەلەر وقۋ جىلىندا مەملەكەتتەن قوسىمشا 20 مىڭ گرانت ءبولۋدى تاپسىردى. مۇندا ەڭ الدىمەن ينجەنەرلەر, اقپاراتتىق تەحنولوگيا, نانوتەحنولوگيا سالاسىنىڭ ماماندارىن دايىنداۋعا باسا نازار اۋدارىلادى. بۇل باستاما ءتورتىنشى ونەركاسىپتىك رەۆوليۋتسيا جاعدايىندا جاڭا ەكونوميكاعا قاجەت ماماندار دايىنداۋعا مۇمكىندىك بەرەدى. بۇل دا جاستارعا مەملەكەت تاراپىنان جاسالاتىن قامقورلىقتىڭ ايقىن كورىنىسى.
جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ باعىتىندا وبلىستا جوسپارلى جۇمىستار جاسالىپ تا جاتىر. قازىر ايماقتاعى ءۇش جوعارى وقۋ ورنىندا 12 مىڭ ستۋدەنت ءبىلىم الادى. 1,6 مىڭ ستۋدەنت جاتاقحانامەن قامتىلعان. ال 312 ستۋدەنتتىڭ جاتاقحانامەن قامتاماسىز ەتۋ جونىندەگى سۇرانىسىن قاناعاتتاندىرۋعا مۇمكىندىك بولماي وتىر. وتكەن جىلى جەرگىلىكتى بيۋدجەت ەسەبىنەن بولىنگەن ءبىلىم بەرۋ گرانتىنا 750 ۇمىتكەر قاتىسىپ, ىرىكتەۋ ناتيجەسىندە 222 ستۋدەنت ءبىلىم بەرۋ گرانتىنا يە بولدى.
ايتا كەتۋ كەرەك, وبلىستىڭ 25 تەحنيكالىق جانە كاسىپتىك ءبىلىم بەرۋ وشاقتارىندا 17 مىڭنان استام ستۋدەنت وقيدى. ون كوللەدجدە جاتاقحانا بار. ەكى مىڭعا جۋىق ستۋدەنت جالدامالى پاتەرلەردە تۇرادى. ستۋدەنتتەردىڭ تۇرمىس جاعدايىنىڭ تومەندىگى ولاردىڭ ءبىلىم الۋ ساپاسىمەن قاتار دەنساۋلىعىنا دا اسەر ەتەدى. وسى ماسەلەنى شەشۋ ءۇشىن د.نۇرپەيىسوۆا اتىنداعى مۋزىكالىق كوللەدجدىڭ 100 ورىندىق جاتاقحاناسىنىڭ جانە اققىستاۋ اۋىلىندا 100 ورىندىق جاتاقحاناسى بار 320 ورىندىق كاسىپتىك تەحنيكالىق كوللەدجدىڭ قۇرىلىسى جۇرۋدە. بەس تەحنيكالىق جانە كاسىپتىك وقۋ ورنىنىڭ جاتاقحاناسى قۇرىلىسىنىڭ قاجەتتى قۇجاتتامالارى جاساقتالدى. بيىل «تەڭىزشەۆرويل» جشس «يگىلىك» باعدارلاماسى ارقىلى اتىراۋ قالاسىندا اگروتەحنيكالىق كوللەدجگە 150, ەنەرگەتيكا جانە قۇرىلىس كوللەدجىنە 100 ورىندىق جاتاقحانا قۇرىلىسىن سالۋ جوسپارلانۋدا.
حالىققا جاريا ەتىلگەن ۇندەۋدەگى ءتورتىنشى باستاما شاعىن نەسيە بەرۋ ماسەلەسىنە ارنالعان. بيىل «بيۋدجەتتىڭ جول كارتاسى-2020» باعدارلاماسى بويىنشا بيۋدجەتتەن 1 980 ملن تەڭگە ءبولىندى, قوسىمشا رەسپۋبليكالىق بيۋدجەتتەن 590 ملن تەڭگە قاراستىرىلۋدا. «جاپپاي كاسىپكەرلىكتى دامىتۋ» اياسىندا قالاداعى كاسىپكەرلەردى نەسيەلەۋگە 253 ملن تەڭگە ءبولىنىپ, 24 جوبا قارجىلاندىرىلدى. اۋىل كاسىپكەرلەرىن قولداۋ ماقساتىندا دا وڭىرلىك باعدارلاما بار.
ەلباسى ۇندەۋىندە اتاپ كورسەتكەندەي, بۇل – ەلدىڭ يگىلىگىنە ارنالعان ۇتىمدى ءارى وپتيميستىك جوبا. «وركەندەگەن قازاقستان – بۇل, ەڭ الدىمەن مەملەكەتى ءوزىن قورعاپ, قولدايتىنىن, قامقورلىق جاسايتىنىن سەزىنەتىن, تيىسىنشە ەلىن جان-جۇرەگىمەن سۇيەتىن, پاتريوتتىق تانىتاتىن وزدەرىنە سەنىمدى ادامداردىڭ مەكەنى دەپ سانايمىن» دەدى نۇرسۇلتان نازارباەۆ.
وبلىستىڭ بارلىق دەڭگەيدەگى دەپۋتاتتارى دا ءوز قىزمەتتەرىندە ەلباسى باستامالارىن باياندى ەتۋگە بار كۇش-جىگەرىن سالىپ, مەملەكەت تاراپىنان جاسالعالى جاتقان وسى قامقورلىقتاردى حالىققا كەڭىنەن ناسيحاتتاۋدا بەلسەندىلىك تانىتادى دەگەن سەنىمدەمىن. وسىنداي اۋقىمدى الەۋمەتتىك جوبالاردى ەلىمىزدىڭ تىنىشتىعى مەن بىرلىگى تۇراقتى بولعان جاعدايدا عانا ىسكە اسىرۋعا بولادى.
ومىرزاق زينۋللين,
اتىراۋ وبلىستىق ءماسليحاتىنىڭ حاتشىسى
