ناۋرىز تويىندا قازاق حالقىنىڭ باعزى زامانداردان كەلە جاتقان سالت-داستۇرىنە مەيلىنشە باسىمدىق بەرىلدى. بۇل تەاترلاندىرىلعان قويىلىم نەگىزىندە ۇيىمداستىرىلعان شاراعا 500-دەن استام ادام قاتىستى. ولاردىڭ باستاۋىندا ساكەن اتىنداعى قازاق دراما تەاترىنىڭ ارتىستەرى ءجۇردى.
مەرەكەلىك شاراعا قاتىسقان ءوڭىر باسشىسى ەرلان قوشانوۆ قالا تۇرعىندارى مەن قوناقتارىنا ۇلىس وڭ بولسىن ايتىپ, ءوزىنىڭ جاڭاجىلدىق جۇرەكجاردى تىلەكتەرىن جەتكىزدى.
جالپى, بيىلعى ناۋرىز تويىندا جۇرتشىلىق, اسىرەسە وزگە ۇلت وكىلدەرى ارنايى تىگىلگەن كيىز ۇيلەرگە كىرىپ, ونداعى حالىقتىڭ قولونەر تۋىندىلارىمەن, ۇلتتىق تاعام تۇرلەرىمەن جاقىنىراق تانىسۋعا مۇمكىندىك الدى. سونداي-اق ولار ناۋرىز كوجەنىڭ ءدامىن تاتىپ قانا قويماي, قالاي دايىندالاتىنىنا دا قاتتى قىزىعۋشىلىق تانىتتى.
بىلاي قاراساڭىز, جىلدا قايتالاناتىن ۇيرەنشىكتى كورىنىستەر. دەگەنمەن ءسالتداستۇردى, ۇلتتىق قۇندىلىقتارىمىزدى وسىلايشا ناسيحاتتاي بەرگەننەن ۇتىلماسىمىز انىق. ونىڭ ۇستىنە, ناۋرىز تويى مۇنداي مۇمكىنشىلىكتەرگە جولدى كەڭىنەن اشىپ بەرىپ ءجۇر. ناۋرىز مەيرامىندا ۇلتىمىزدىڭ «بەسىككە بولەۋ», «تۇساۋكەسەر», «قىز ۇزاتۋ» سىندى ءجون-جورالعىلارىن كورگەن وزگە ۇلت وكىلدەرىن بىلاي قويعاندا, قالادا وسكەن قاراكوزدەرىمىزدىڭ ءوزى ۇلتىمىزدى ۇلىقتايتىن قۇندىلىقتار تۋرالى مول ماعلۇمات العانى ءسوزسىز ەدى.
مەرەكەلىك شارا سپورتتىق جارىستارسىز جەتىمسىرەپ قالار ەدى. بيىلعى ناۋرىز مەيرامىندا دا سپورتشى قىز-جىگىتتەردىڭ ونەرىنە بارىنشا قۇرمەت كورسەتىلدى. شىعىس جەكپە-جەگى تۇرلەرىنەن, تاەكۆاندو, كاراتە, سامبو سپورتى بويىنشا ولار كورسەتكەن قويىلىم جۇرتتىڭ ىستىق ىقىلاسىنا يە بولدى. شاحمات, دويبى جانە توعىزقۇمالاق جارىستارى دا تارتىستى ءوتتى.
مەرەكەلىك كوڭىل كۇيدىڭ اجارىن الماتىدان ارنايى كەلگەن ەسترادا ءانشىسى باقىت شاداەۆانىڭ ورىنداۋىنداعى تاماشا اندەر ءتىپتى ارلەندىرە ءتۇستى. جەرگىلىكتى ونەرپازداردىڭ ۇيىمداستىرۋىمەن وتكەن شاعىن كونتسەرت تە جۇرتتىڭ كوڭىلىنەن شىقتى.
قاراعاندىداعى سياقتى وبلىستىڭ بارلىق وڭىرىندە ناۋرىز مەيرامى ءوز دارەجەسىندە تويلانعانىن ايتا كەتكەن ءجون. كەي جەرلەردەگى اۋا رايىنىڭ قولايسىزدىعىنا قاراماستان, التى اي قىستان ىعىرى شىعىپ, كوكتەمدى اسىعا كۇتكەن اعايىن مەرەكە كورىگىن بارىنشا قىزدىرۋعا اتسالىستى. وبلىستىڭ قالالارى مەن اۋداندارى, اۋىلدارى بيىلعى ناۋرىز تويىن بارىنشا قىزىقتى, جيناقى جانە ىسىراپسىز وتكىزۋدى الدارىنا مىندەت ەتىپ قويدى. بۇل جەرلەردە دە ۇلتتىق سالت-داستۇرلەرىمىز بەن ادەت-عۇرىپتارىمىزدىڭ ۇلىقتالۋىنا باسا كوڭىل ءبولىندى.
جالپى, بيىلعى ناۋرىز مەيرامىنا وزگە ۇلت وكىلدەرىنىڭ دە بەلسەنە قاتىسىپ, تويدىڭ جالپىحالىقتىق سيپات الۋىنا بارىنشا ىقىلاس تانىتقانى ءسۇيسىنتتى. بىلە بىلگەن ادامعا بۇل – ەلىمىزدەگى بەرەكە-بىرلىكتىڭ بۇگىنگى كۇندەگى بوياماسىز شىندىعى, شىنايى بەت-بەينەسى.
ناۋرىز تويى ۇستىندەگى شات-شادىمان كوڭىلدى وبلىس ورتالىعىندا كوپتەن بەرى باسپانا كۇتىپ جۇرگەن تۇرعىنداردىڭ قۋانىشى ەسەلەي ءتۇستى. قالاداعى «پانەل-ورتالىق» تۇرعىن ءۇي كەشەنىندە پايدالانۋعا بەرىلگەن 192 پاتەر يەلەرىن تاپتى. باسپاناعا يە بولىپ, باقىتتان باسى اينالعان تۇرعىنداردىڭ العاشقىلارىنا وبلىس اكىمى ەرلان قوشانوۆ كىلتتى ءوزى تاپسىرىپ, تەلەديدار سىيلادى. تۇرعىنداردى ءاز-ناۋرىزبەن قۇتتىقتاپ, ءار شاڭىراققا قۋانىش پەن باقىت تىلەدى.
بۇل پاتەرلەردىڭ بوي كوتەرۋى «تۇرعىنۇيقۇرىلىسجيناقبانكى» جانە «نۇرلى جەر» باعدارلامالارى ارقاسىندا مۇمكىن بولعان ەدى. العاشقى بولىپ باسپاناعا كەزەكتە تۇرعاندار قول جەتكىزدى. ودان كەيىن بانك سالىمشىلارى قونىس تويىن تويلادى.
قايرات ءابىلدا,
«ەگەمەن قازاقستان»
قاراعاندى وبلىسى
سۋرەتتى تۇسىرگەن لينار گاليموۆ
