كونفەرەنتسيانىڭ باستى ماقساتى اۋعانستانداعى جاعدايدى بەيبىت جولمەن رەتتەۋدىڭ نەگىزگى قاعيداتتارىن ۇيلەستىرۋ, اۋعانستان ۇكىمەتى مەن قارۋلى وپپوزيتسيا اراسىنداعى كەلىسسوزدەر تەتىگىن ازىرلەۋ, سونداي-اق وسى ۇدەرىستى قولداۋ ءۇشىن الەمدىك قاۋىمداستىقتىڭ بىرلەسكەن ارەكەتتەرىن ۇيلەستىرۋ بولدى.
ق. ءابدىراحمانوۆ بەيبىتشىلىكتىڭ, قاۋىپسىزدىكتىڭ, ىنتىماقتاستىقتىڭ جانە دامۋدىڭ وڭىرلىك ۇلگىسىن ورتالىق ازيادا قالىپتاستىرۋ, سونىڭ ىشىندە اۋعانستانعا ەكونوميكالىق جانە الەۋمەتتىك دامۋدا كوپجاقتى كومەك كورسەتۋ, بەيبىتشىلىك پەن قاۋىپسىزدىككە تونگەن قاۋىپكە قارسى تۇرۋ, سونداي-اق ونىڭ الەۋەتىن نىعايتۋ قازاقستاننىڭ بۇۇ قاۋىپسىزدىك كەڭەسىندەگى جۇمىسى باسىمدىقتارىنىڭ ءبىرى بولىپ تابىلاتىنىن اتاپ ءوتتى.
تاشكەنت كونفەرەنتسياسىنىڭ قاتىسۋشىلارى الدىندا سويلەگەن سوزىندە وزبەكستان پرەزيدەنتى شاۆكات ميرزيوەۆ قازاقستان پرەزيدەنتى نۇرسۇلتان نازارباەۆقا بۇۇ قاۋىپسىزدىك كەڭەسىندە وسى كەزدەسۋدى شاقىرۋداعى باستاماسى ءۇشىن شىن جۇرەكتەن العىسىن ءبىلدىردى.
قازاقستاننىڭ ەۋروپالىق وداق پەن باسقا دا سەرىكتەستەرىنىڭ بىرلەسىپ قارجىلاندىرۋ كومەگىمەن اۋعانستان ازاماتتارىنا ءبىلىم بەرۋ باعدارلاماسىن جالعاستىرۋ تۋرالى باستاماسىن ۇسىنعانى بەلگىلى. 2010 جىلدان باستاپ قازاقستان ءوزىنىڭ وقۋ ورىندارىندا اۋعان ازاماتتارى ءۇشىن جالپى قۇنى شامامەن 50 ميلليون دوللاردى قۇرايتىن ءبىلىم بەرۋ باعدارلاماسىن جۇزەگە اسىرۋدا. وسى باعدارلامانىڭ اياسىندا 2010 جىلدان باستاپ 2021 جىلعا دەيىنگى كەزەڭ ارالىعىندا 1000-عا جۋىق اۋعان ازاماتى وقىتىلادى.
«2018 جىلدىڭ كۇزىندە قازاقستان استانادا «اۋعانستانداعى ايەلدەردىڭ مۇمكىندىكتەرىن ارتتىرۋ» تۋرالى حالىقارالىق كونفەرەنتسيا وتكىزۋدى جوسپارلاپ وتىر. ونىڭ باستى ماقساتى – اۋعانستاننىڭ بەيبىت دامۋىنداعى ايەلدەردىڭ ءرولى مەن ۇلەسىن, اۋعان ايەلدەرىنىڭ قۇقىقتارى مەن مۇمكىندىكتەرىن ەلدىڭ الەۋمەتتىك-ەكونوميكالىق جانە ساياسي سالالارىندا ولاردىڭ مەملەكەتتىك جانە جەكە سەكتورلارعا قاتىسۋىن ارتتىرۋ ارقىلى كەڭەيتۋ ماسەلەلەرىن تالقىلاۋ», – دەدى ق.ءابدىراحمانوۆ.
قازاقستان اۋعانستانعا جىل سايىن مىڭداعان توننا گۋمانيتارلىق جۇك, ونىڭ ىشىندە ازىق-ت ۇلىك, جانار-جاعارماي ماتەريالدارى جانە ءارتۇرلى جابدىقتار جەتكىزە وتىرىپ, ەكىجاقتى كەلىسىمدەر مەن كوپجاقتى نىسانداعى كەلىسىمدەردىڭ اياسىندا تەحنيكالىق جانە گۋمانيتارلىق كومەك كورسەتۋدى جالعاستىراتىنى ەرەكشە اتالىپ ءوتتى.
وسى ورايدا قازاقستان پرەزيدەنتىنىڭ توراعالىق ەتۋىمەن 15 ناۋرىزدا استانادا وتكەن ورتالىق ازيا مەملەكەتتەرى باسشىلارى كەزدەسۋىنىڭ ناتيجەسى اۋعانستاننىڭ الەۋمەتتىك-ەكونوميكالىق دامۋىنا ۇجىمدىق كومەك كورسەتىلۋىنە جاڭا مۇمكىندىكتەر اشىپ وتىرعانىن ايتا كەتۋ كەرەك.
كونفەرەنتسياعا رەسەي, قىتاي, اقش, ءۇندىستان, يران, پاكىستان, تۇركيا, بىرىككەن اراب امىرلىكتەرى, ساۋد ارابياسى, قاتار, ۇلىبريتانيا, گەرمانيا, فرانتسيا, يتاليا, جاپونيانىڭ سىرتقى ىستەر مينيسترلەرى مەن بۇۇ, ەۋروپالىق وداق, ۇقشۇ, شىۇ, ناتو ۇيىمدارىنىڭ جوعارى وكىلدەرى قاتىستى.
كونفەرەنتسيانىڭ قورىتىندىسى بويىنشا تاشكەنت دەكلاراتسياسى قابىلداندى, وندا اۋعانستانداعى جاعدايدى ساياسي تۇرعىدان رەتتەۋدىڭ ودان ارعى قادامدارى كورسەتىلىپ, ساياسي رەتتەۋ ۇدەرىسىندەگى اۋعان تاراپىنىڭ نەگىزگى جانە ۇيلەستىرۋشى ءرولى بەكىتىلدى. حالىقارالىق كونفەرەنتسيانىڭ اياسىندا ق.ءابدىراحمانوۆ اقش پەن يران دەلەگاتسيالارىنىڭ باسشىلارىمەن ەكىجاقتى كەزدەسۋلەر وتكىزدى.
سەرىك ابدىبەك,
«ەگەمەن قازاقستان»
