اتالعان سەسسياعا ءبىلىم جانە عىلىم ۆيتسە-ءمينيسترى اسحات ايماعامبەتوۆ, «اتامەكەن» ۇلتتىق كاسىپكەرلەر پالاتاسى اقپاراتتىق-كوممۋنيكاتسيالىق تەحنولوگيالار, ءبىلىم بەرۋ جانە يننوۆاتسيا كوميتەتىنىڭ توراعاسى مۇرات ابەنوۆ, مادەنيەت جانە سپورت مينيسترلىگى, تىلدەردى دامىتۋ جانە قوعامدىق ساياسي جۇمىس كوميتەتىنىڭ توراعاسى قۋات بوراش سپيكەر رەتىندە قاتىسىپ, باعدارلاما اياسىندا اتقارىلعان جۇمىستاردىڭ ءبىر پاراسىنا توقتالدى.
ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ ورتالىق بۋىنىنا اينالدىرۋ توڭىرەگىندە ءسوز قوزعاعان ءبىلىم جانە عىلىم ۆيتسە-ءمينيسترى اسحات ايماعامبەتوۆ كاسىپتىك ستاندارتتاردى ەڭبەك نارىعىنىڭ تالاپتارىنا ساي جاڭارتۋ تۋراسىندا باياندادى.
«رۋحاني جاڭعىرۋ داستۇردەن الشاقتاۋ ەمەس, كەرىسىنشە ۇلتتىق كودىمىزدى, تاريحىمىزدى ساقتاي وتىرىپ سانا اشىقتىعى ارقاسىندا بىلىكتىلىك پەن باسەكەگە قابىلەتتى بولا ءبىلۋ. ەلباسى قويعان مىندەتتەر نەگىزىندە قازاق تىلىندەگى 100 جاڭا وقۋلىق بويىنشا وزگە تىلدەردەن 17 كىتاپ اۋدارىلدى. 2018 جىلى ساياساتتانۋ, ينفورماتيكا, الەۋمەتتانۋ سالاسىنداعى تاعى 30 كىتاپتى اۋدارۋ جوسپاردا بار. قىركۇيەك ايىنان باستاپ ەلدەگى جوعارعى وقۋ ورىندارىندا وقىتىلا باستايدى», دەدى اسحات ايماعامبەتوۆ.
ۆيتسە-ءمينيستردىڭ ايتۋىنشا, ەلىمىزدىڭ 16 ءوڭىرى بويىنشا ولكەتانۋ وقۋلىقتارى ازىرلەنگەن. جۋىق ارادا بارلىق مەكتەپتەردە 7 سىنىپتان باستاپ ولكەتانۋ وقۋلىعى وقۋ پروتسەسىنە ەنگىزىلىپ, ءتۇرلى تۋريستىك جۇمىستار جۇرگىزىلمەك.
ايا ءومىرتاي,
«ەگەمەن قازاقستان»
