بۇل دەر كەزىندە ايتىلعان ماسەلە بولىپ وتىر. سەبەبى سەمەيدەگى ستۋدەنتتەردىڭ باسىم كوپشىلىگى جاتاقحاناسىز ءجۇر.
سەمەي قالالىق اكىمدىگى ىشكى ساياسات ءبولىمىنىڭ باسشىسى ايدار سادىرباەۆتىڭ ايتۋىنشا, شاھارداعى كوللەدجدەر عانا ەمەس, جوعارى وقۋ ورىندارىن قوسىپ العاندا 19 عانا ستۋدەنتتىك جاتاقحانا بار. وندا 3215 ادام تۇرىپ جاتىر. دەسەك تە, قالادا سىرتتان كەلگەن 16 مىڭ ادام بار. ياعني ستۋدەنت جاستاردىڭ 20 پايىزى عانا جاتاقحانامەن قامتىلعان. قالعانى پاتەر جالداۋدا نەمەسە تۋعان-تۋىسقاندارىنىڭ ءۇيىن پانالاپ ءجۇر.
– سەمەي – جاستار قالاسى دەيمىز, – دەدى ىشكى ساياسات ءبولىمىنىڭ باسشىسى ايدار سادىرباەۆ, – دەسەك تە, بۇگىندە قالاعا رەسپۋبليكانىڭ ءار تۇكپىرىنەن جانە وبلىس اۋداندارىنان كەلگەن ستۋدەنت جاستاردىڭ 80 پايىزى باسپاناسىز, ياعني جاتاقحاناسىز قالۋى ويلانتارلىق جاعداي. بۇل ولاردىڭ الەۋمەتتىك جاعدايىنا اسەر ەتەدى. وقۋعا دەگەن قۇلشىنىسىنا كەدەرگى كەلتىرەدى.
باسىندا باسپاناسى جوق جاس قوعامعا قالاي سىڭەدى؟ ول ەرتەدەن قارا كەشكە دەيىن بىرەسە اندا, بىرەسە مىندا كوشىپ جۇرەدى. سوندىقتان ەلباسى باستاماسى دەر كەزىندە كوتەرىلگەن ماسەلە. مۇنى قولدايمىز. جاستاردىڭ دەنساۋلىعىن مونيتورينگ جۇرگىزۋ ارقىلى نازاردا ۇستايمىز. ارينە باسپانا جاعىنان قامتىلماعان جاستار اراسىندا ءتۇرلى جۇقپالى اۋرۋلار دا بەلەڭ الادى. ءتىپتى قىلمىسقا بارۋ نەمەسە سۋيتسيد فاكتىلەرى دە باسپاناسىزدىقتىڭ سالدارىنان بولادى. ارينە, جاستار ءۇشىن, اسىرەسە تەحنيكالىق ماماندىق سالاسىنا گرانت مولىنان ءبولىنىپ جاتىر. دەسەك تە, وقۋ جاعىمەن قاتار ولاردىڭ الەۋمەتتىك تۇرمىس جاعدايىن دا جاساۋ قاجەتتىگىن ۇمىتپاعان ءجون.
ال وبلىستىق تەحنيكالىق جانە كاسىپتىك ءبىلىم بەرۋ جانە مامانداردى دايارلاۋ ورتالىعى مەكەمەلەرى ديرەكتورلار كەڭەسىنىڭ توراعاسى ورالحان سارتاەۆتىڭ ايتۋىنشا, شىعىس قازاقستان وبلىسىنداعى 83 كوللەدجدە 34 800 ستۋدەنت وقيدى. ولار دا جاتاقحانامەن تولىق قامتىلماعان. سونىڭ ىشىندە سەمەيدەگى 29 كوللەدجدە 17 216 ستۋدەنت كاسىبي ءبىلىم الۋدا.
– وكىنىشكە قاراي, ءبىراز جىل بۇرىن قالاداعى كوللەدجدەردىڭ جاتاقحانالارى ۇستاعاننىڭ قولىندا, تىستەگەننىڭ اۋزىندا كەتىپ, ستۋدەنتتەر جاتاقحاناسىز قالدى, – دەدى ورالحان سارتاەۆ, – سەمەيدەگى 29 كوللەدجدىڭ التاۋىندا عانا جاتاقحانا بار. قالاعا وبلىستىڭ اۋداندارى بىلاي تۇرسىن, رەسپۋبليكانىڭ تۇكپىر-تۇكپىرىنەن ستۋدەنتتەر كەلەدى. «سەرپىن» باعدارلاماسى بويىنشا وڭتۇستىكتەگى وبلىستاردان, شىمكەنت, قىزىلوردا, تالدىقورعان, تاراز, الماتى قالالارىنان جاستار كەلەدى. بىراق ولاردى جاتاقحانامەن قامتي المايمىز. ستۋدەنتتەر جاتاقحاناسىندا 2551 ورىن جەتىسپەيدى.
مەن مۇنى تەك كوللەدجدەر بويىنشا عانا مىسالعا كەلتىرىپ وتىرمىن. ال ۋنيۆەرسيتەتتەردە دە وسىنداي پروبلەما بارشىلىق.
قالا اكىمىنىڭ ورىنباسارى نادەجدا شاروۆانىڭ ايتۋىنشا, سەمەيدە ستۋدەنتتەرگە جاعداي جاساپ, جاتاقحانا سالىپ بەرۋ ماسەلەسى كوتەرىلگەنىنە ۇزاق جىل بولعان. دەسەك تە الداعى ۋاقىتتا بۇل ماسەلەنى شەشۋ ءۇشىن جىلدىڭ ءبىرىنشى جارتىسىندا مەملەكەت-جەكەمەنشىك ارىپتەستىگى اياسىندا تۇرعىزىلاتىن جاتاقحانالارعا تولىقتىرۋلار مەن وزگەرىستەر ەنگىزۋ ءۇشىن كوپتەگەن قۇجاتنامالىق وزگەرىستەر ەنگىزۋ كەرەك. كوللەدج, ۋنيۆەرسيتەتتەردىڭ جانىنان جاتاقحانا سالۋ ءۇشىن بوس جەرلەر ىزدەۋ قاجەت. جانە جەرگىلىكتى بيۋدجەت ەسەبىنەن تابىلعان جەرلەرگە ينجەنەرلىك قۇرىلىمداردى تارتۋ دا جولعا قويىلماق.
نە دەسەك تە, ەلباسى ۇندەۋىنەن كەيىن سەڭ قوزعالعانداي بولدى. بىراق وسى ماسەلە ورتا جولدا قالىپ قويماي, ناقتى شەشىمىن تاپسا جاقسى بولار ەدى, دەپ الاڭداۋشىلىق تانىتتى سەمەيدەگى جاستار رەسۋرستىق ورتالىعىنىڭ ديرەكتورى ولجاس سوعىمباي. ونىڭ ايتۋىنشا, ستۋدەنت جاستار ءوز الدىنا, سونداي-اق جۇمىس ىستەيتىن جاستارعا, جاس وتباسىلارعا, ءتىپتى كاسىپكەر جاستارعا دا جەڭىلدەتىلگەن نەسيەمەن پاتەر الۋ مۇمكىندىگى بەرىلسە جاقسى بولار ەدى. قانشاما جاس باسپانامەن قامتىلار ەدى.
راۋشان نۇعمانبەك,
جۋرناليست
سەمەي
