بريفينگتە استاناداعى ساۋدا ويىن-ساۋىق ورتالىقتارىندا جانە ادامدار كوپ شوعىرلاناتىن ورىنداردا ءورت قاۋىپسىزدىگىن ساقتاۋ بويىنشا جوسپاردان تىس قوسىمشا تەكسەرۋلەر جۇرەتىنى ايتىلدى.
استانادا 60-تان استام دەنساۋلىق ساقتاۋ ورنى, 300 مەكتەپكە دەيىنگى ءبىلىم بەرۋ ورتالىعى, 100 مەكتەپ جانە 10 ارنايى ءبىلىم بەرۋ مەكەمەسى, 50 جوو مەن كوللەدج بار. سونىمەن قاتار, 117 ساۋدا نىسانى بار, ونىڭ 83-ءى ساۋدا ءۇيى, 9-ى ءىرى ساۋدا ويىن-ساۋىق ورتالىعى, 25-ءى بازار جانە 200-دەن استام قوناق ءۇي, 60 حوستەل جانە 600-دەن استام ادامدار تاماقتاناتىن قوعامدىق ورىن بار.
«استانا قالاسى بويىنشا ءورتتىڭ, توتەنشە جاعدايدىڭ الدىن الۋ ءاردايىم جاۋاپتى مەكەمەلەردىڭ باقىلاۋىندا. جىل سايىن جوسپارلى تۇردە تەكسەرۋ شارالارى جۇرگىزىلىپ وتىرادى. ونىڭ ىشىندە ءبىلىم بەرۋ, دەنساۋلىق ساقتاۋ سالاسىنا تيەسىلى نىسانداردا ءورت قاۋىپسىزدىگىن ساقتاۋ ەرەكشە باقىلاۋدا», - دەدى ەلۆيرا جۇرگەنباەۆا.
ناۋرىز ايىنان باستاپ استانا قالاسىندا 70 ءبىلىم بەرۋ مەكەمەسىنىڭ ءورت قاۋىپسىزدىگى تەكسەرىلگەن. وسى جىلدىڭ مامىر ايىنا دەيىن بارلىق ءبىلىم بەرۋ مەكەمەلەرى تەكسەرىلەدى. تەكسەرۋ كوميسسياسىنىڭ قۇرامىندا تجد-ءنىڭ, ءبىلىم باسقارماسىنىڭ وكىلدەرىمەن قاتار اتا-انالار دا بار.
«قازىرگى كۇنى قالامىزداعى 9 وسو-نىڭ 6-ى تەكسەرىلدى. ءۇش ورتالىقتان 32 ەرەجە بۇزۋشىلىق انىقتالعان. اكىمشىلىك جاۋاپكەرشىلىككە 3 ادام تارتىلىپ, ايىپپۇل سالىندى. ەكى وسو-دا اۋديت جۇرگىزىلدى, ال ءبىر نىسانعا(Mega Silk Way Astana) تەكسەرۋ وسى جىلى جاسالادى. بيىل ەرەكشە تارتىپپەن استاناداعى 50 ساۋدا نىسانىنا تەكسەرۋ جۇرگىزىلەدى. تەكسەرۋ كەزىندە قاۋىپسىزدىك تەحنيكالارى ەرەجەسىنىڭ ساقتالۋى, ءورت ءسوندىرۋ جۇيەسى مەن حابارلاندىرۋ, دابىلدى ەسكەرتۋ, ەۆاكۋاتسيا سحەماسى مەن اۆاريالىق شىعۋ جولدارىنا باسا ءمان بەرىلمەك», - دەدى ەلۆيرا جۇرگەنباەۆا.
تەكسەرۋ بارىسىندا سىرتقا شىعۋ جولدارىنىڭ جاعدايى, جارىق بەرۋشى ەلەكتر جەلىلەرى مەن قۋات كوزدەرىنىڭ جاي-كۇيىنىڭ ءتيىستى دەڭگەيدە بولۋى, ءورت جايىندا دابىل بەرەتىن اۆتوماتتى جۇيەنىڭ دۇرىستىعى, ىشكى جانە سىرتقى ورتكە قارسى سۋ جابدىعى مەن ءورت ءسوندىرۋ قۇرالدارىنىڭ ساقاداي ساي تۇرۋىنا باسا ءمان بەرىلەدى.
