استانا قالاسىنىڭ اكىمى اسەت يسەكەشەۆتىڭ تاپسىرماسىمەن «2018 جىلى استانا قالاسى اۋماعىندا كوكتەمگى سۋ تاسقىنىن وتكىزۋگە دايىندىق بويىنشا كەشەندى ءىس-شارالار جوسپارى» بەكىتىلگەن. كەشەندى جوسپارعا سايكەس سۋ تاسقىنىن بولدىرماۋ جونىندە استانانىڭ اۋماعىندا 2018 جىلى 27 ىقتيمال سۋ باسۋ ۋچاسكەلەرى بەلگىلەندى. اربىرىندە جۇمىس جۇرگىزىلىپ, قاجەتتى ماتەريالدار كولەمى, قارجىلاندىرۋ, جاۋاپتى ورىنداۋشىلار انىقتالعان.
«قازىرگى تاڭدا 3 ملن تەكشە مەتردەن استام قار شىعارىلدى. كوممۋنالدىق قىزمەتكەرلەر تاۋلىك بويى قاردى جيناۋمەن جانە قالا سىرتىنا شىعارۋمەن اينالىسۋدا. بۇل جۇمىس مەرەكە كۇندەرى دە جالعاستى. قالا ماڭىن ۇشاقپەن ارالاۋ بارىسىندا مايبالىق كولى, ۆياچەسلاۆسكوە سۋ قويماسى اۋدانىندارىنداعى, قاراعاندى جانە اقمولا وبلىستارىنىڭ ەلدى مەكەندەرىندەگى قار مەن ىلعالدىلىق قورى ناقتىلاندى», دەدى استانا قالاسى اكىمىنىڭ ءباسپاسوز حاتشىسى ەلۆيرا جۇرگەنباەۆا.
استانا اكىمدىگى جەكە سەكتور تۇرعىندارىنان ۇيلەرىنە سۋ كىرۋدىڭ الدىن الۋ ماقساتىندا اۋلاداعى قاردى شىعارۋدى سۇرادى.
قازىرگى كۇنى گيدروتەحنيكالىق قۇرىلىستار كوكتەمگى سۋ تاسقىنىنا دايىن, اتاپ ايتقاندا استانا سۋ قويماسىنىڭ جاي-كۇيى باقىلاۋدا. قار قورىنىڭ كولەمىن ءبىلۋ ماقساتىندا مونيتورينگ جۇرگىزۋ جانە الىنعان دەرەكتەردى تالداۋ تۋرالى جۇمىس رەجيمىنىڭ جوسپارلى كەستەسى بەكىتىلگەن.
استانا قالاسى توتەنشە جاعدايلار دەپارتامەنتى كوكتەمگى سۋ تاسقىنى جاعدايىن باقىلاۋدا ۇستاۋدا جانە كۇننىڭ جىلىنۋىنا بايلانىستى تاۋلىك بويى كەزەكشىلىك ۇيىمداستىرعان.
