كورمە ەكسپوزيتسياسىنا اۆتوردىڭ 80-نەن استام كەسكىندەمەلىك جانە گرافيكالىق جۇمىستارى قويىلعان. ولاردىڭ ساپىنان وفورت, لينوگراۆيۋرا, ليتوگرافيا, قوندىرعىلى گراۆيۋرا, كىتاپ گرافيكاسىمەن سالىنعان اسەم شىعارمالاردى كەزدەستىرەسىز. ءارتۇرلى تەحنيكامەن ورىندالسا دا بۇل جۇمىستاردىڭ ارقايسىسى ۇلتتىق كولوريت پەن قايتالانباس دارا ءستيلدى بويىنا سىڭىرگەن.
قالامداستارى ونىڭ «تۋعان ولكەنىڭ تاريحىنان» توپتاماسىنداعى ەڭ بەلگىلى گرافيكالىق جۇمىستارى قازاقستان گرافيكاسىنىڭ دامۋىنا زور ىقپال ەتكەنىن ايتادى. سۋرەتشىنىڭ ەلجاندىلىعى «مەنىڭ وتانىمنىڭ مەرەكەلەرى», «كيىز ءۇيدى جيناۋ» سياقتى تاعى دا باسقا دا كەيىنگى جىلدارداعى كەسكىندەمەلىك تۋىندىلارىندا كورىنىس تاپقان. ۇدايى جاڭا كوركەمدىك شەشىمدەردى ىزدەستىرۋ جولىندا جۇرەتىن مۇحتار سىزدىقوۆ ءوزىنىڭ شىعارماشىلىق يدەياسىنا ادال – ادامنىڭ رۋحاني الەمىنە قايتا-قايتا ورالىپ وتىرادى: «اقىننىڭ پورترەتى», «ايەلدىڭ پورترەتى», «شەبەردىڭ پورترەتى», «ارميان حانشايىمىنىڭ پورترەتى», «ماحابباتتىڭ پورترەتى» سىندى جۇمىستارى وسىنىڭ مىسالى.
– مۇحتار سىزدىقوۆتىڭ شىعارماشىلىعى تۋعان جەرگە دەگەن شىنايى ماحابباتقا تۇنعان. سۋرەتشى جاقىنداپ قالعان كۇز تابيعاتىن ەرەكشە سەزىمتالدىقپەن بەرەدى. بۇلت باسقان اسپان مەن كول ورتاسىنداعى جالعىز قايىق ەرەكشە ىشكى جابىرقاۋ كوڭىل-كۇي مەن جالعىزدىقتى بىلدىرەدى. «ەرتىس تاڭىنا» تابيعاتتىڭ ءوزىنىڭ تىنىسى دەۋگە بولاتىن تاڭعى سالقىن تازا اۋاعا تولى «تۇرگەن وزەنى» پەيزاجىن قاراما-قارسى قويۋعا بولادى. كوك, جاسىل, كۇلگىن تۇستەردەن تۇراتىن كولوريت ءوزىنىڭ قانىقتىعىنا قاراماستان, پەيزاجدىڭ ۇيلەسىمى مەن تۇتاستىعىن قۇرايدى. سۋرەتشى تۇسپەن ويناپ قانا قويماي, ءساتتى تۇستىك راكۋرستار تاۋىپ, ءاربىر شتريحتى انىق جازادى, – دەيدى كورمەنىڭ كۋراتورى گۇلنۇر جۇبانوۆا.
ءۇنسىز جاتقان اسقار تاۋ مەن نۋلى ورمان كوڭىلىڭە تىنىشتىق ۇيالاتادى. سۋرەتشىنىڭ قاي شىعارماسىنان دا قانىمىزعا ءتان قانىق تۇستەر مەن بولمىسىمىزدان سىر شەرتەتىن ۇلتتىق بوياۋلاردى كورەسىز. ونىڭ دالا كارتينالارىنان سالت-ءداستۇرىمىز بەن ءتول تابيعاتىمىزدىڭ ءيىسى بۇرقىرايدى.
ارمان وكتيابر,
«ەگەمەن قازاقستان»
الماتى
