«رەۆوليۋتسيالار ءداۋىرى ءالى بىتكەن جوق. تەك ونىڭ فورماسى مەن مازمۇنى تۇبەگەيلى وزگەردى... بۇگىندە رەۆوليۋتسيالار ءوڭىن وزگەرتىپ, ۇلتتىق, ءدىني, مادەني, سەپاراتيستىك پەردە جامىلدى. بىراق ءبارى دە, تۇپتەپ كەلگەندە, قانتوگىسپەن, ەكونوميكالىق كۇيرەۋمەن اياقتالاتىنىن كورىپ وتىرمىز». ەلباسىنىڭ ءدال وسى ءسوزىن باستى نازارعا العان وكىل يمام بۇگىنگى ءتۇر-سيپاتىن وزگەرتكەن رەۆوليۋتسيالاردىڭ ءبىرى – قوعامدى ۇركىتكەن قاندى تەراكتىلەر ەكەندىگىن اتاپ كەتتى. سوڭعى ون جىلدا ورىن العان 10-نان اسا تەراكتىنى مىسالعا كەلتىرىپ, ولاردىڭ وزگە ەلدەردەگى ب ۇلىكتەردەن ءبىر ايىرماشىلىعى – قازاقتىڭ ۇلتى ءبىر قازاققا قارۋ كەزەنۋى ەكەندىگىن ايتتى. مۇنىڭ سالدارى سىرتقى كۇشتىڭ ساياسي يدەولوگياسىنىڭ قۇربانى بولعان قانداستارىمىزدى ۇلتىنان جيرەندىرىپ, ءوز وتانىنا دەگەن وشپەندىلىگىن وياتۋعا دەيىن الىپ بارا جاتقاندىعىن ايتىپ, وي سالدى.
تاقىرىپ ءدىن تۇرعىسىنان تالقىلانىپ قانا قويماي, قازاق ەلىنىڭ تاريحىمەن بايلانىستىرىلىپ ءتۇسىندىرىلدى. پاتشا وكىمەتىنىڭ وتارلاۋ ساياساتى, اشارشىلىق, ساياسي قۋعىن-سۇرگىن سەكىلدى زوبالاڭ جىلدارىندا قازا تاپقان قازاقتار, بوسقىندار تۋرالى ستاتيستيكالىق مالىمەتتەر كەلتىرىلدى.
«بۇگىنگى بەيبىتشىلىك زاماننىڭ قادىرىن ءجىتى باعالامايتىندىعىمىز كەي ىستەردە اسىعىستىق پەن البىرتتىققا جول بەرۋىمىزگە اكەپ سوعادى. مۇنداي البىرت مىنەز بەن امبيتسيا, اسىرەسە قوعامداعى جاستارىمىزعا ءتان قاسيەت. ال ەڭ وكىنىشتىسى, ولاردىڭ تاعاتسىزدىعى مەن تاجىريبەسىزدىگىن سىرتقى كۇشتەر ءتيىمدى پايدالانىپ كەتىپ جاتىر. جەلىكپە جاستاردىڭ قولىمەن جاسالعان كەشەگى تەراكتىلەر سونىڭ دالەلى», دەدى وكىل يمام تولەبي وسپان.
سونىمەن قاتار اسىرەدىنشىلدىككە اپاراتىن اعات ويلار, ناماز وقىماعاندى كاپىر دەۋ, ءداستۇردى شيرككە بالاۋ, ءوز ۇلتىن ۇلىقتاماۋ, وتانىن سۇيمەۋ سەكىلدى بۇگىنگى ءدىن ۇستانۋداعى بىرقاتار قاتەلىكتەر كەڭىنەن ءتۇسىندىرىلدى. جاماعاتتى جات اعىمنىڭ زاردابىنان ساقتاندىرىپ, تەرىس اعىمدى ناسيحاتتاۋ, تەراكت ۇيىمداستىرۋ, وعان قاتىسۋ نەمەسە قىلمىسقا قاتىستى قانداي دا ءبىر اقپاراتقا يە بولۋدىڭ ءوزى زاڭ الدىندا جاۋاپكەرشىلىك جۇكتەيتىندىگى, ءتىپتى جاڭا زاڭ جوباسىندا ازاماتتىقتان ايىرۋ ماسەلەسى قاراستىرىلىپ جاتقاندىعى ايتىلدى.
وكىل يمام ەلباسىنىڭ ءاربىر جولداۋى مەملەكەتتىك مەكەمە قىزمەتكەرلەرىنە عانا ەمەس, ءسىز بەنەن ءبىز, جالپى حالىققا جولداناتىن ۇندەۋ, بولاشاققا بەلگىلەنگەن باعىت-باعدار ەكەندىگىن ايتىپ, جاماعاتتىڭ جولداۋ ماتىندەرىمەن تانىسىپ, وعان ءۇن قوسا بىلۋىنە باسا ءمان بەردى.
قازاقستانعا قاجەتتى ەۆوليۋتسيالىق دامۋ جولىن جۇزەگە اسىرۋ ءۇشىن ادام كاپيتالىن قالىپتاستىرۋ كەرەكتىگىن ايتقان وكىل يمام قازىرگى قوعامداعى بۇعان قاجەتتى بارلىق جاعداي جاسالعاندىعىن تىلگە تيەك ەتتى. ال ونى جۇزەگە اسىرۋعا باستىسى ادام كاپيتالى, تاباندىلىق پەن ءتوزىم كەرەكتىگى تۋرالى ويىن بىلاي دەپ تۇيىندەدى:
«كەز كەلگەن مەملەكەتتىڭ باستى كاپيتالى ادام جانە ول اتا زاڭىمىزدا انىق جازىلعان. بۇل اقيقاتتى اللا تاعالا «تين» سۇرەسىندەگى: ء«بىز ادام بالاسىن ارداقتاپ جاراتتىق» دەگەن قۇران اياتىمەن دە ايقىنداپ قويعان. اينالاداعى بارلىق مۇمكىندىك, جاعداي ادامزات بالاسى ءۇشىن جاسالۋدا. وبلىس ورتالىعىنىڭ وزىندە سوڭعى جىلدارى ونەر ورتالىعى, مادەنيەت ءۇيى, «جەكپە-جەك» سارايى, ءارتۇرلى سپورت كەشەندەرى, كىتاپحانالار, تۇرعىن ۇيلەر پايدالانۋعا بەرىلىپ, وبلىستىق مۇراجاي سەكىلدى جاڭا عيماراتتار بوي كوتەرۋدە. وتكەن جىلى قالادا 2 مەشىت اشىلدى. ەندى بىزگە وسىناۋ نىعمەتتىڭ ءبارىن يگەرەتىن ادام كاپيتالى, قوعامنىڭ قۇلشىنىسى مەن ىزدەنىسى قاجەت. بىزگە ءبىلىمدى جاس, بىلىكتى مامان, ونەرلى ورەن, ساليقالى جاماعات پەن سانالى ۇرپاق قاجەت», دەپ ءسوزىن اياقتادى وكىل يمام تولەبي وسپان.
ءدارىستى ۇيىپ تىڭداعان جاماعات جاقسى اسەر الدى. شارا سوڭىندا ءسوز العان قوعام قايراتكەرى امانگەلدى ايتالى ءدىندار بولۋ دۇنيەنى تارك ەتۋ دەگەن ءسوز ەمەستىگىن ايتىپ, عۇمىرى ىزدەنىسكە تولى, قۇلشىلىعى ءبۇتىن بولعان ابايدىڭ مىسالىن ءسوز ەتتى. وكىلدىك تاراپىنان باستاۋ العان يگى باستاماعا وڭ باعاسىن بەرىپ, تۇشىمدى تاقىرىپ كوتەرىلگەندىگىن, ونىڭ جاماعاتقا دايەكتى دالەلدەرمەن ۇعىنىقتى تۇردە تۇسىندىرىلگەندىگىن ايتتى. ەلباسىنىڭ ۇلتتىق سانانى جاڭعىرتۋدا ۇسىنعان وزىق يدەيالارىن ەڭ اۋەلى, ءسىز بەنەن ءبىز, حالىق جۇزەگە اسىراتىندىعىن جەتكىزدى.
تەمىر قۇسايىن,
«ەگەمەن قازاقستان»
اقتوبە
سۋرەتتە: دارىستەن كورىنىس
