سپورت سارايىنىڭ قاسىنا جيىلعان قالالىقتار التىباقان تەۋىپ, تەگىن تاراتىلعان پالاۋدان ءدام تاتىپ, ءارتۇرلى سپورتتىق سايىستارعا قاتىستى. مەرەكەنى تاماشالاۋعا كەلگەن حالىقتى «تورپەدو» كومانداسىنىڭ حوككەيشىلەرى دە قۇتتىقتاپ, قۇتتىقتاپ قانا قويماي ءارتۇرلى تاقىرىپتىق بايقاۋلار ۇيىمداستىرىپ, جەڭىمپازدارعا سىيلىقتار تاپسىرىپ, جانكۇيەرلەرىمەن بىرگە سۋرەتكە ءتۇسىپ, قولتاڭبا بەردى.ء «بىزدىڭ كاسىپورىن وسى جەردە جىل سايىن ناۋرىز مەرەكەسىن وتكىزۋدى داستۇرگە اينالدىرعان. تۇرعىندار دا مۇنى جاقسى بىلەدى. ءبىز مەرەكەلىك شارانى مەيلىنشە قىزىقتى قىلىپ وتكىزۋگە تىرىسامىز. بالالاردىڭ دا, جاستاردىڭ دا, جاسامىس كىسىلەردىڭ كوڭىلىن كوتەرگىمىز كەلەدى. بيىل «تورپەدو» حوككەي كلۋبىنىڭ حوككەيشىلەرىمەن بىرگە شاھار تۇرعىندارىن شۋاقتى مەيراممەن قۇتتىقتادىق. ەڭ باستىسى, حالىق ريزا. بىزگە كەرەگى دە – وسى», - دەيدى «قازتسينك» جشس-ءنىڭ الەۋمەتتىك ماسەلەلەر جونىندەگى اتقارۋشى ديرەكتورى اندرەي لازارەۆ.
مەرەكەلىك شارا اياسىندا «ەڭ ۇلكەن باۋىرساق» بايقاۋى ءوتىپ, سالماعى 6 كەلى, ەنى 90 سانتيمەتر باۋىرساق ءپىسىرىپ اكەلگەن قالا تۇرعىنى ناتاليا دياتلوۆا جەڭىمپاز اتانىپ, سىيلىققا تەلەديدار الدى. «بايقاۋدىڭ وتەتىنىن ينستاگرامم جەلىسى ارقىلى ءبىلدىم. بۇل باۋىرساقتى قۇربىممەن بىرگە 6 ساعات كولەمىندە پىسىردىك. جەڭىمپاز اتانعانىما قۋانىشتىمىن», - دەيدى ول.
وڭىردەگى ەڭ ءىرى ءوندىرىس ورنى قالا تۇرعىندارىنان بولەك وزدەرىنىڭ قىزمەتكەرلەرىنە ارناپ وسكەمەن مەتاللۋرگيالىق كەشەنىندە مەرەكەلىك شارا وتكىزىپتى. «ەل يگىلىگى جولىندا ەسەلى ەڭبەك ەتىپ جۇرگەن جۇمىسشىلارىمىزدى نازاردان تىس قالدىمايىق دەپ وسىنداي شارا ۇيىمداستىردىق. شاقىرىلعان انشىلەرمەن قاتار ءوزىمىزدىڭ ونەرلى قىزمەتكەرلەرىمىز دە ونەرلەرىن پاش ەتتى. بالالارعا ارنايى الاڭقاي جاسادىق. مەرەكەنى وتباسىمەن, جاقىن ادامدارمەن, ارىپتەستەرمەن قارسى العانعا نە جەتسىن؟!», - دەيدى «قازتسينك» جشس اتقارۋشى ديرەكتورى تۇراربەك ازەكەنوۆ.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن تىلەۋبەك شاياحمەت
