الدە, اسپايتىن-ساسپايتىن سول باياعى جايباراقاتتىق پا؟ ەگەر الەمدەگى ءتۇرلى ۇلتتار مەن ۇلىستاردىڭ ومىرلەرىنە زەر سالساڭ, سولاردىڭ باسىم بولىگىنىڭ ءبىر ءىستى اياقتاي سالىپ ەكىنشىسىن باستاپ, وزگەلەرمەن باسەكەگە ءتۇسىپ, قاربالاس تىرشىلىك كەشىپ جاتقاندارىن بايقايسىڭ. سوندىقتان شىعار, ونداي ەلدەر دامۋدا دا بىزدەن الدەقايدا ۇزاپ كەتتى.
بىرەۋلەرى الىپ ۇشاقتار مەن جەلمەن جارىسقان اۆتوموبيلدەر شىعارىپ اتتارىن اسپانداتسا, ەندى بىرەۋلەر قالتاعا سىيىپ كەتەتىن ۇيالى تەلەفوندار شىعارىپ-اق دۇنيەگە تانىلىپ جاتىر. ءتىپتى حوش ءيىستى ءيىس سۋلارىمەن ءدۇيىم جۇرتتى تامساندىرىپ جاتقاندار قانشاما! ال, ءبىز كەيدە جۇمىس قايدا قاشار دەيسىڭ دەپ, شىنتاقتاپ جاتا بەرەمىز. «جاتقانعا بەرسەڭ, ماعان بەر» دەيتىنىمىز تاعى بار. بىراق ازىرگە «بەرىپ» جاتقاندار كورىنبەيدى.
ويلاپ وتىرساڭ, بىزدە ەڭبەككە, ەڭبەك ادامدارىنا دەگەن قۇرمەت وتە تومەن سياقتى بولىپ كورىنەدى. ەسكەرتكىشتەردى باتىرلارعا ورناتامىز, كوشەلەرگە باتىرلاردىڭ اتتارىن بەرەمىز. جۇمىسشى تۋرالى ءسوز جوق. كوپشىلىك جينالعان جەرلەردە اۋزىمىزعا اق-ادال اسىن توسىپ وتىرعان ديقان مەن مالشىنى ەمەس, شىرەنگەن شەنەۋنىكتى تورگە شىعاراتىنىمىز دا, سولاردىڭ الدىندا جاتىپ-جاستىق, ءيىلىپ توسەك بولىپ, شاراپات اتاۋلىنى سولاردىڭ كەۋدەلەرىنە تاققاندى ۇناتاتىنىمىز دا ناعىز ەڭبەك ادامىن باعالاي بىلمەۋىمىزدەن شىعار, كىم بىلەدى. ايتەۋىر ءبىر جايتتىڭ باسى اشىق, ءبىز جاپپاي جابىلىپ جۇرتتى جۇمىسقا جۇمىلدىرا الماي الەك بولساق, كەي ەلدەر ادامدارعا قايتسەك ارتىق جۇمىس ىستەتپەيمىز دەپ الەك.
جاپونيانىڭ Taisei اتتى كومپانياسى جۇمىس ورىندارىندا ۇزاعىراق وتىرىپ قالعان كەڭسە قىزمەتكەرلەرىن ۇيلەرىنە قۋاتىن درون جاساپ شىعارعان كورىنەدى. T-Friend دەگەن اتاۋعا يە وزدىگىنەن ۇشاتىن قۇرىلعى ارنايى كامەرامەن جابدىقتالعان. بەلگىلەنگەن ۋاقىتتا ول عيمارات ءىشىن اينالا ۇشىپ, كەزەك اياقتالعاننان كەيىن دە جۇمىسىندا قالىپ قويعان قىزمەتكەردىڭ ءدال جانىنا بارىپ توقتايدى ەكەن. جاي عانا توقتاپ تۇرماي, قىزمەتكەر ۇيىنە ابدەن كەتكەنگە دەيىن Auld Lang Syne دەپ اتالاتىن شوتلانديالىق ءاندى قوسىپ قوياتىن ونەرى تاعى بار. بۇل ءاننىڭ تاڭداپ الىنۋى دا تەگىننەن-تەگىن ەمەس كورىنەدى. سويتسە جاپونيانىڭ ساۋدا ورىندارىندا وسى مۋزىكانىڭ ەستىلۋى دۇكەننىڭ جابىلايىن دەپ جاتقانىن بىلدىرەدى ەكەن.
ەگەر جاڭاعى اپپاراتتىڭ وزىڭىزگە تۇپ-تۋرا ۇشىپ كەلەتىنىن ويلاپ الاڭداپ وتىراتىن بولساڭىز, سىزگە جايباراقات وتىرىپ جۇمىس ىستەۋ قيىنعا تۇسەدى دەيدى وسى دروندى جاساپ شىعارعان كومپانيانىڭ ديرەكتورى. ءسوز رەتىندە مۇنداي دروندى پايدالانۋدىڭ ايىنا شامامەن العاندا 4,5 مىڭ دوللارعا تۇسەتىنىن دە ايتا كەتكەن ءجون.
مۇنداي قۇرىلعىنىڭ ءدال وسى ەلدە پايدا بولۋىنىڭ ءوزى دە كەزدەيسوقتىق ەمەس. جاپونيا جۇمىسقا بەرىلگەن ادامدارىنىڭ سانى جاعىنان الدىڭعى قاتاردا تۇرعان ەلدەردىڭ ءبىرى. جاپونداردىڭ پايىمداۋىنشا, شەكتەن تىس جۇمىسباستىلىق ەلدە ورىن الىپ جاتاتىن ءسۋيتسيدتىڭ نەگىزگى سەبەپتەرىنىڭ دە ءبىرى بولىپ تابىلادى ەكەن. سوندىقتان دا ەل بيلىگى ۇستىمىزدەگى جىلدىڭ قاڭتار ايىنان باستاپ مەرزىمنەن تىس جۇمىس ىستەۋگە قارسى كۇرەس ناۋقانىن باستاۋعا ءماجبۇر بولعان.
تاعى ءبىر ايتا كەتەرلىك جايت, بۇل ەلدە شامادان ارتىق جۇمىس ىستەۋدەن بولىپ جاتاتىن ءولىم-ءجىتىمدى بىلدىرەتىن كاروسي دەگەن ەرەكشە تەرمين دە پايدا بولىپتى. رەسمي مالىمەتتەرگە قاراعاندا, جىل سايىن كەم دەگەندە 200 جاپون وسى كاروسيدەن اجال قۇشادى ەكەن. بۇل كورسەتكىشتىڭ ءوزىن ەل كاسىپوداقتارى تىم تومەندەتىلگەن كورسەتكىش, ءىس جۇزىندەگى جاعداي بۇدان الدەقايدا كوپ دەپ ەسەپتەيتىن كورىنەدى.
جاپونياداعى جاعداي وسىنداي بولعاندا, بىزدەگى جاعداي قانداي؟ ابىروي بولعاندا, ءبىزدىڭ اعايىندارعا جۇمىسباستىلىقتان كەلەر قاۋىپ جوق. ەگەر جۇمىس كۇندەرى ىمىرت ۇيىرىلگەنگە دەيىن كەڭسەدە وتىراتىندار مەن سەنبى-جەكسەنبى كۇندەرى جۇمىسقا شىعاتىن كەيبىر جەرلەستەرىمىزگە كەلسەك, وبالى نە كەرەك, ولار قانداي دا ءبىر ءىستى تىندىرىپ تاستاۋ ءۇشىن ەمەس, انشەيىن, جوعارىداعى باسشىلار ۇيىندە شالقايىپ جاتىپ الدى دەپ ايتپاسىن دەگەن ساقتىقپەن عانا كەڭسەگە بارىپ توبە كورسەتەدى.
وسىنداي جاعدايدى ەستىپ-بىلگەننەن كەيىن ءاي, وسى ءبىزدىڭ شەنەۋنىكتەر ءۇشىن دە جاپونداردىكىندەي ءبىر درون ارتىقتىق ەتپەيدى-اۋ دەگەن وي دا قىلاڭ بەرەدى ەكەن. بىراق ول كۇنشىعىس ەلىندەگى سياقتى كەڭسە قىزمەتكەرلەرىن ۇيلەرىنە قۋاتىن ەمەس, كەرىسىنشە, جۇمىس ۇستەلى باسىندا قالعىپ-شۇلعىپ وتىرعان شەنەۋنىكتەرىمىزدىڭ قاسىنا جاقىنداپ بارىپ, «قوي ۇيقىنى, جۇمىس ىستە!» دەپ ايقاي سالاتىن درون بولۋى كەرەك سياقتى...
