جەكە ينۆەستوردىڭ فۋتبول-جاتتىعۋ كەشىنىنىڭ جاساقتالۋىنا قوسقان قاراجاتى 300 ميلليون تەڭگەدەن اسىپ تۇسەدى. مۇندا ءار كۇن سايىن 500 كە تارتا بالا سپورتتىڭ جەڭىل اتلەتيكا تۇرلەرىمەن شۇعىلدانا الادى. وسى ارقىلى وڭىردە ءبىرىنشى كەزەكتە بالالار مەن جاسوسپىرىمدەردىڭ فۋتبولمەن ەمىن-ەركىن شۇعىلدانۋىنا بارلىق قولايلى جاعدايلار مەن مۇمكىندىكتەر تۋعىزىلعان. وعان وبلىستىڭ ءار تۇپكىرىنەن فۋتبولداعى دارىندى بالالاردى ىرىكتەپ تارتۋ ءۇشىن قاجەتتى العىشارتتار جاسالۋ ۇستىندە. ولاردىڭ اراسىنان كەلەشەكتە اتالعان سپورت ءتۇرىنىڭ كانىگى شەبەرلەرى شىعاتىنىنا سەنىم مول.
تاعى ءبىر ايتا كەتەرلىك ماسەلە بۇدان ەكى جىل بۇرىن وبلىستىڭ بارلىق اۋداندارىندا «اقتوبە» فۋتبول كلۋبىنىڭ بولىمشەلەرى اشىلعان بولاتىن. ەندىگى كەزەكتە وسى كلۋبتاردا ءوزىن جاقسى قىرىنان كورسەتە بىلگەن جاسوسپىرىمدەر ءوز شەبەرلىكتەرىن جاڭا كەشەندە شىڭداي الادى. بۇل ءۇشىن مۇندا بەس فۋتبول الاڭى پايدالانۋعا بەرىلگەن. بۇل جونىندە جەكە ينۆەستور اسقاربەك مامىرباەۆ «Egemen.kz» تىلشىسىنە ءوز وي-پىكىرىن بىلايشا جەتكىزدى.
كەشەندەگى فۋتبول الاڭدارى فيفا-نىڭ بارلىق حالىقارالىق ستاندارتتارىنا سايكەس كەلەدى. مۇنداي جالپى اۋماعى سەگىز مىڭ مەترلىك جابىق فۋتبول كەشەنىنىڭ ەلىمىزدە ەشقانداي بالاماسى جوق. مۇنداعى جاراقات الۋ قاۋپىن ازايتاتىن جايىلما جاستىقتار مەن سپورت پاركەتىنەن جاسالعان جابىندىلار دا ونىڭ زاماناۋي كەلبەتىن تولىقتىرا تۇسەدى. ءارى الاڭداردىڭ ءبارى دە جاساندى كوگالدان جاسالعان توسەمدەرمەن كومكەرىلگەن.
بۇعان قوسارىمىز اقتوبەدە اشىلعان فۋتبول-جاتتىعۋ كەشەنى كەلەشەكتە تەك بىرىڭعاي فۋتبولعا بەيىمى بار جەتكىنشەكتەردى جاتتىقتىرىپ قانا قويماي بۇعان قوسا رەسپۋبليكالىق جانە حالىقارالىق دەڭگەيدەگى جارىستار وتكىزۋ ورتالىعىنا دا اينالماق. ءسوز سوڭىندا بۇدان ەكى جىل بۇرىن وبلىستا فۋتبولمەن اينالىساتىن سەگىز مىڭعا جۋىق بالا بولسا, بۇگىندە ولاردىڭ سانى ون ەكى مىڭنان اسىپ تۇسكەنىن ايتا كەتكىمىز كەلەدى. وڭىردە اشىلعان 32 فۋتبول الاڭى سپورتتاعى دارىندى جەتكىنشەكتەردىڭ سپورتتىڭ وسى ءتۇرىن كاسىبي تۇرعىدان يگەرۋىنە ءتيىستى مۇمكىندىكتەر بەرەدى.
تەمىر قۇسايىن,
"ەگەمەن قازاقستان"
اقتوبە
