كەڭەس بارىسىندا ەلەكتروندىق دەنساۋلىق ساقتاۋ جۇيەسىن ءتورت سەگمەنت بويىنشا ەنگىزۋ ماسەلەلەرى تالقىلاندى: دەنساۋلىقتى جاقسارتۋ جانە الدىن الا ەمدەۋ, اۋرۋلاردى ەرتە انىقتاۋ, مەديتسينالىق كومەك كورسەتۋ, اۋرۋلاردى ەمدەۋ جانە وڭالتۋ. تسيفرلىق دەنساۋلىق ساقتاۋدى دامىتۋ ەمدەلۋشىلەرگە باعدارلانعان بولادى جانە مەديتسينالىق دەرەكتەردى, مەديتسينالىق قۇجاتتاردى قاعازسىز جۇرگىزۋگە كوشۋگە, دارىگەرلەرگە ەلەكتروندى تۇردە ەمدەلۋشى تۋرالى ماڭىزدى دەرەكتەردى الۋ ارقىلى شۇعىل كلينيكالىق شەشىمدەر قابىلداۋعا مۇمكىندىك بەرەدى, دارىگەردىڭ قابىلداۋىندا بولۋ ۋاقىتى 50-60%-عا قىسقارادى جانە زەرتتەۋ ناتيجەلەرىن الۋ ۋاقىتى ەكى ەسەگە ازايادى.
بۇگىنگى تاڭدا دەنساۋلىق ساقتاۋ ۇيىمدارىنداعى تسيفرلاندىرۋ ۇلەسى 76,4% قۇرايدى. 01.01.2019 جىلعا قاراي بۇل كورسەتكىشتى 100%-كە (ونىڭ ىشىندە اۋدان ورتالىقتارىنىڭ دەڭگەيىندە) جەتكىزۋ كوزدەلگەن.
دارىگەرلەر مەن ورتا مەديتسينا قىزمەتكەرلەرىن كومپيۋتەرلىك تەحنيكامەن جابدىقتاۋ 82,8% قۇرايدى. 2021 جىلدىڭ سوڭىنا قاراي بۇل كورسەتكىشتى 100%-كە جەتكىزۋ جوسپارلانعان. دەنساۋلىق ساقتاۋ ۇيىمدارىنىڭ 51,0%-ندا ينتەرنەت قولجەتىمدى. 2021 جىلدىڭ سوڭىنا قاراي اتالعان كورسەتكىشتى دە 100%-عا جەتكىزۋ جوسپاردا بار.
