سۋرەتتى تۇسىرگەن ەرلان ومار
ءبىز, قازاقستان رەسپۋبليكاسى, قىرعىز رەسپۋبليكاسى, تاجىكستان رەسپۋبليكاسى, تۇرىكمەنستان, وزبەكستان رەسپۋبليكاسى پرەزيدەنتتەرى ورتالىق ازيا حالىقتارىن بۇكىل وڭىرىمىزگە ورتاق ناۋرىز مەرەكەسىمەن شىن جۇرەكتەن قۇتتىقتايمىز.
2010 جىلعى 23 اقپاندا بىرىككەن ۇلتتار ۇيىمى باس اسسامبلەياسىنىڭ قارارىمەن بۇل مەيرام ناۋرىز – حالىقارالىق كۇنى دەپ تانىلعانىن جانە ونى يۋنەسكو-نىڭ ادامزاتتىڭ ماتەريالدىق ەمەس مادەني مۇرالارى تىزىمىنە ەنگىزگەنىن ەرەكشە اتاپ وتەمىز.
ءوزىنىڭ مىڭجىلدىق تاريحىندا ناۋرىز مەيرامى تابيعاتتىڭ جانە قوعامنىڭ قايتا تۇلەۋى مەن جاڭارۋىنىڭ, ادامزات بالاسىنىڭ رۋحاني تازارۋى مەن ءوزىن-ءوزى دامىتۋىنىڭ نىشانىنا اينالدى. وسى شۋاقتى دا قاستەرلى مەرەكە اماندىقتى, بىرلىكتى, باۋىرلاستىق پەن ءوزارا قولداۋدى تانىتىپ, ءبىزدىڭ ەلدەرىمىزدى بىرىكتىرەتىن بارلىق مادەني-تاريحي قۇندىلىقتاردى دارىپتەيدى. بۇل – ورتاق اتا-بابامىزدان قالعان ۇلى مۇرا. ءبىز ونى ساقتاۋىمىز جانە دامىتۋىمىز قاجەت.
ناۋرىزدى تويلاۋ كەزەڭى بارلىق زاماندا ادامي جانە وتباسىلىق قارىم-قاتىناستاردىڭ, دوستىق پەن تاتۋ كورشىلىك بايلانىستاردىڭ نىعايۋىمەن, كورشىلەر اراسىنداعى ەرەكشە قوناقجايلىلىقتىڭ كورىنىس تابۋىمەن قاتار كەلگەن. بۇل ورتاق تاريح, مادەنيەت, ءداستۇر, تۇرمىس ارقىلى بىرىككەن ەلدەرىمىز ءۇشىن قازىر دە ماڭىزدى.
وسى مەيرام قارساڭىندا بۇكىل ءوڭىرىمىزدىڭ قاۋىپسىزدىگىن, تۇراقتىلىعى مەن ورنىقتى دامۋىن قامتاماسىز ەتۋ ماقساتىمەن وڭىرلىك ىنتىماقتاستىققا, ءوزارا قولداۋعا, وزەكتى ماسەلەلەردى بىرلەسىپ شەشۋگە نيەت ءبىلدىرۋىمىزدىڭ زور سيمۆولدىق ءمانى بار.
ءوزارا ءتيىمدى ساۋدا-ەكونوميكالىق جانە ينۆەستيتسيالىق ىنتىماقتاستىق, وڭىرلىك ترانزيت-كولىك ينفراقۇرىلىمنىڭ كەڭەيۋى, سۋ-ەنەرگەتيكالىق, ازىق-ت ۇلىك الەۋەتتەرىن ۇتىمدى يگەرۋ, ءوندىرىس جانە وڭدەۋ سالالارىن دامىتۋ, وزىق تەحنولوگيالار مەن يننوۆاتسيالاردى قولدانۋ, تسيفرلىق ەكونوميكا جولىنداعى ىلگەرىلەۋ ورتالىق ازيا ەلدەرى ءال-اۋقاتىنىڭ تۇراقتى تۇردە ءوسۋىن قامتاماسىز ەتۋگە سەپتىگىن تيگىزەدى.
ءبىز حالىقتارىمىزدىڭ اراسىنداعى ءوزارا قۇرمەت, دوستىق پەن باۋىرلاستىق قاتىناستاردى ساقتاۋعا جانە نىعايتۋعا دەگەن تاريحي جاۋاپكەرشىلىكتى سەزىنە وتىرىپ, مادەنيەت پەن ونەر, ءبىلىم مەن عىلىم, تۋريزم جانە سپورت سالالارىنداعى ءوزارا ىقپالداستىقتى تەرەڭدەتۋگە شاقىرامىز.
كوكتەمگى كۇن مەن ءتۇننىڭ تەڭەلۋى, رۋحاني تازارۋ مەن جاڭارۋ مەرەكەسىنىڭ قارساڭىندا قازاقستان, قىرعىزستان, تاجىكستان, تۇرىكمەنستان, وزبەكستان حالىقتارىنا, سونداي-اق جەر بەتىندەگى بارشا حالىقتارعا بەيبىتشىلىك, مولشىلىق جانە قۋانىش تىلەپ, ءوسىپ-وركەندەۋلەرىنە نيەتتەستىگىمىزدى بىلدىرەمىز.
ناۋرىز مەيرامى ءار ۇيگە اماندىق پەن باق-بەرەكە اكەلسىن!
