ەلباسىنىڭ باستامالارى قازاقستان حالقىنىڭ ءال-اۋقاتىنا وڭ اسەر ەتەتىن بولادى. «7 – 20 – 25» باعدارلاماسى كوپتەگەن قازاقستاندىقتاردىڭ تۇرعىن ۇيگە قاتىستى وتكىر ماسەلەلەرىن شەشۋگە ارنالىپ وتىر. ەلىمىزدەگى مىڭداعان ادامدار قولايلى شارتتار بويىنشا پاتەر ساتىپ الۋعا مۇمكىندىك الادى. ودان باسقا, مەملەكەتتىك ينۆەستيتسيالىق ساياساتتىڭ باسىم-باعىتى بولا وتىرىپ, تۇرعىن ءۇي نارىعىنىڭ باسقا سالالارعا جاناما اسەرى مول بولادى ءارى ارالاس سالالاردا ينۆەستيتسيالىق بەلسەندىلىكتى ۇدەتە تۇسەدى. سوندىقتان قولجەتىمدى يپوتەكا تەتىكتەرىن جاساۋمەن قوسا, بۇل باعدارلاما وتاندىق قۇرىلىس سالاسىنا سەرپىن بەرەدى, قۇرىلىس ماتەريالدارىنىڭ ءوندىرىسى ۇلعايادى, جۇمىس ورىندارى اشىلادى.
ەلىمىزدىڭ ورتالىق جانە سولتۇستىك وڭىرلەرىنە گاز جەتكىزۋ جوسپارى دا ەلىمىز ءۇشىن ستراتەگيالىق ماڭىزعا يە جوبا. بىرىنشىدەن, كوپتەگەن قازاقستاندىق وتباسىلار سەنىمدى ءارى تەحنولوگيالىق تۇرعىدا وڭدەلگەن وتىنمەن قامتاماسىز ەتىلەدى. ول, اسىرەسە اۋىل تۇرعىندارىنىڭ تۇرمىسىن جەڭىلدەتەدى, ءۇي شارۋاشىلىعى بويىنشا اتقارىلاتىن جۇمىستاردى اناعۇرلىم وڭايلاتادى.
ەكىنشىدەن, گاز قۇبىرىنىڭ بويىنداعى بارلىق شاعىن جانە ورتا بيزنەس كاسىپورىندارى ارزان ءارى قولايلى ەنەرگيا كوزىنە قول جەتكىزەدى جانە ول وندىرىلەتىن ءونىمنىڭ باسەكەگە قابىلەتتىلىگىنە وڭ اسەر ەتۋى ءتيىس. ودان كەيىن قالالاردىڭ ۇلعايۋى مەن اۆتوموبيلدەردىڭ كوبەيۋىنە بايلانىستى كۇرت وزگەرگەن ەكولوگيانى ساقتاۋ ماسەلەلەرى دە شەشىلە باستايدى. قازاقستاننىڭ مەملەكەتتىك ساياساتىنىڭ باسىم باعىتتارىنىڭ ءبىرى – ەكولوگيالىق قاۋىپسىزدىك ماسەلەلەرى دە جۇزەگە اسادى.
پرەزيدەنت ءوز سوزىندە ادام كاپيتالىنا, ونىڭ ىشىندە ستۋدەنت جاستاردىڭ ءبىلىم الۋى مەن دامۋىنا ەرەكشە نازار اۋداردى. بۇگىنگى ستۋدەنتتەر – ەلىمىزدىڭ, مەملەكەتىمىزدىڭ بولاشاعى. سوندىقتان ولاردىڭ قولجەتىمدى ءارى ساپالى ءبىلىم الۋىنا جاعداي جاساۋ كەرەك. قوسىمشا بەرىلەتىن 20 مىڭ ءبىلىم گرانتى ەڭبەك نارىعىندا سۇرانىسقا يە قوسىمشا ونداعان مىڭ بىلىكتى ماماننىڭ پايدا بولۋىنا, جاستاردىڭ ومىردەن ءوز ورنىن تابۋىنا مۇمكىندىك بەرەدى. ودان باسقا, 2022 جىلدىڭ سوڭىنا قاراي 75 مىڭ ورىندىق قازىرگى زامانعى ستۋدەنتتىك جاتاقحانا قۇرىلىسىن سالۋ – ۇزاقمەرزىمدى دامۋعا بەت العان مەملەكەتتىڭ ىلكىمدى شاراسى بولىپ تابىلادى. ەڭ الدىمەن, جاتاقحانا تاپشىلىعىن كەشەندى تۇردە شەشۋ قازاقستاندىق ستۋدەنتتەرگە شەتەلدىك جوعارى وقۋ ورىندارىنان گورى وتاندىق وقۋ مەكەمەلەرىن تاڭداۋعا مۇمكىندىك بەرەدى. ءبىلىم بەرۋدىڭ ساپاسى مەن قولجەتىمدىلىگى, ستيپەنديا مەن جاتاقحاناداعى قولايلى بولمەلەر وقۋ ورىندارىن تاڭداۋدا ماڭىزدى ءرول اتقاراتىنا بەلگىلى. ءوز اقىل-ويى مەن ساناسىن قازاقستان يگىلىگىنە ارناعىسى كەلەتىن دارىندى جاستار ءۇشىن قوسىمشا الەۋمەتتىك ساتىلار پايدا بولادى.
ەلباسىنىڭ بەس الەۋمەتتىك باستاماسى قازاقستان حالقىنىڭ ءال-اۋقاتىن ارتتىرۋعا باعىتتالعان ناقتى ءارى تەرەڭ ويلاستىرىلعان ءىس-قيمىل جوسپارى دەپ بىلەمىز.
ميحايل بورتنيك,
پارلامەنت سەناتىنىڭ دەپۋتاتى
