«بۇگىنگى زاڭ جوباسىندا قاراستىرىلعان ماسەلە «التىن بەلگى» يەگەرلەرىنە قاتىستى. وزدەرىڭىز بىلەسىزدەر, بۇل ماسەلە كوپتەن بەرى تالقىلاندى. وتكەن جىلداردا «التىن بەلگى» يەگەرلەرى گرانتتى العاندا, ونىڭ تولىق باسىمدىلىققا يە ەدى. العان ۇپايىنا قاراماستان, ولاردا گرانتتىڭ يەگەرى اتانۋعا مۇمكىندىكتەرى بولدى. وتكەن جىلى ۇبت-نىڭ جاڭا فورماتىن ەنگىزدىك. وسىعان سايكەس, اتتەستاتتى الۋ مەكتەپ قابىرعاسىندا وتەدى, سونىمەن قاتار «التىن بەلگىنى» دە مەكتەپ ءوزى بەرەدى. ياعني, بۇل شارالار مەكتەپتە تاپسىرىلعان ەمتيحانعا بايلانىستى. ال ۇلتتىق بىرىڭعاي تەستىلەۋ بۇگىندە جاڭا فۋنكتسياعا يە. ۇبت تەك قانا جوعارى وقۋ ورنىنا ءتۇسۋ ءۇشىن جۇزەگە اسىرىلادى. تۇلەك جوو-عا ۇبت-نى تاپسىرعاندا ونىڭ «التىن بەلگىسى» قولىندا بولادى. ەندى بيىلعى ۇسىنىس اياسىندا «التىن بەلگى» يەگەرلەرى بالل ۇپايلارى تەڭ بولعان جاعدايدا عانا باسىمدىق بەرىلەدى», - دەپ ءتۇسىندىردى اسحات ايماعامبەتوۆ.
وسى ورايدا ەكى تۇلەك ءبىر ماماندىققا بىردەي ۇپايمەن بارسا, ول كەزدە گرانت بويىنشا باسىمدىق «التىن بەلگى» يەگەرىنە بەرىلەدى.
ايتا كەتەيىك, ماجىلىستە وتكەن جۇمىس توبىنىڭ وتىرىسىندا وسى باعىتتاعى ۇسىنىسقا دەپۋتاتتار قولداۋ جاسادى.
ءبىلىم جانە عىلىم مينيسترلىگى وكىلدەرىنىڭ سوزىنە قاراعاندا, بۇعان دەيىن بۇل ۇسىنىس مۇعالىمدەر مەن اتا-انالار تاراپىنان پىسىقتالدى.
