«قازاقستان» رترك» قۇرامىنا ەنەتىن «بالاپان» تەلەارنا جاڭا 9 جوبانى كورەرمەن نازارىنا ۇسىناتىن بولادى.
كوكتەمگى ماۋسىمدا تەلەارنا كونتەنتى عىلىمي-تانىمدىق, اقپاراتتىق, وتباسىلىق باعدارلامالارمەن جانە تىكەلەي ەفيردەگى توك-شوۋ سەكىلدى ىشكى ونىمدەرمەن جاڭارعان.
ءوزىنىڭ قۇتتىقتاۋ سوزىندە داۋرەن اباەۆ «بالاپان» ارناسىنىڭ ەلىمىزدىڭ بولاشاق ۇرپاعىن تاربيەلەۋدەگى ەڭبەگى زور ەكەندىگىن اتاپ ءوتتى. ارنانىڭ شىعارماشىلىق توبى 7 جىلدا 300-دەن استام تەلەجوبا دايىنداعان. بۇل باعىتتاعى جۇمىستى ودان ءارى جالعاستىرۋ كەرەكتىگىنە نازار اۋداردى.
اتاپ ايتقاندا, جاڭا ماۋسىمدا تەلەارنا عىلىم سالاسىنا دەن قويىپ وتىر. IT تەحنولوگيالاردىڭ قىر-سىرى مەن عىلىمي تاجىريبەلەر «جاس عالىم» اتتى جاڭا تانىمدىق باعدارلامادا كورىنىس تابادى. ال اكەسى مەن ۇلىنىڭ اراسىنداعى قىزىقتى ويىنعا قۇرىلعان «بالا بوپ», تانىمال بلوگەر انالار مەن بالالارى قاتىساتىن «ۇيدەمىز – ۇيرەنەمىز» جوبالارى كورەرمەندەرگە ۋاقىتتى ءتيىمدى ءارى پايدالى وتكىزۋدىڭ ۇلگىسىن كورسەتەدى. سونىمەن قاتار, ونەر-ءبىلىم, سپورت سالالارىنداعى ۇزدىك بالالاردىڭ جەڭىسكە جەتۋ جولىن باقىلايتىن «كۇندەلىك» باعدارلاماسى كورەرمەنگە جول تارتادى. مەيماندارعا تانىستىرىلعان كەزەكتى ءبىر جوبا – «قالامگەر كىتاپحاناسى». بۇل حابار اتى ايتىپ تۇرعانداي, تانىمال اقىن-جازۋشىلاردىڭ كىتاپحانالارى مەن ۇزدىك تۋىندىلارىنىڭ جازىلۋ تاريحىن تانىستىرادى. جاڭا ماۋسىمداعى ەرەكشە باعدارلامالاردىڭ ءبىرى – «مۇمكىندىك», جوبادا بالالار ءبىر كۇنىن ءتۇرلى كاسىپ يەلەرىمەن, ولاردىڭ جۇمىس بارىسىمەن تانىسۋعا ارنايدى.
تاعى ءبىر ايتا كەتەرلىگى, كوكتەمگى ماۋسىمدا ارنانىڭ كىشكەنتاي جيھانكەز كورەرمەندەرى «ساياحاتشى balapan» جوباسىنا وزدەرىنىڭ شەت ەلگە ساياحاتى جايلى شاعىن بەينەۇزىكتەر ازىرلەپ, جولداي الادى. وسىلايشا بالالار دا ارنانىڭ كونتەنتىن جاساۋعا تىكەلەي اتسالىسادى.
سونىمەن قاتار, تەلەارنا تاريحىندا تۇڭعىش رەت اتا-انالارعا ارنالعان تىكەلەي ەفيردەگى «Bala time» باعدارلاماسىنىڭ تۇساۋى كەسىلەدى.
«balapan – باقىتتى بالالىق مەكەنى» تاقىرىبىندا وتكەن تەلەماۋسىمنىڭ تانىستىرىلىمىندا ۇسىنىلعان جوبالار 15 ناۋرىزدان باستاپ ەفيردەن كورسەتىلەدى.
