پرەزيدەنت بەسىنشى باستاماسىندا «ەلدى گازبەن قامتاماسىز ەتۋدى جالعاستىرۋ» مىندەتىن قويدى. كوگىلدىر وتىننىڭ يگىلىگىن سىر بويى حالقى ونشاقتى جىلدان بەرى كورىپ كەلەدى, سول ارقىلى جۇرتشىلىق الەۋمەتتىك-تۇرمىستىق احۋالدىڭ ايتارلىقتاي جاقسارعانىن سەزىنۋدە. ەلباسى ەلىمىزدە گاز ءوندىرۋ تاۋەلسىزدىك كەزەڭىندە جىلىنا 8-دەن 52 ملرد تەكشە مەترگە دەيىن ارتقانىن, ءارى قاراي دا وسە تۇسەتىنىن اتاپ ءوتتى.
«قازىر ەلىمىزدەگى تۇرعىنداردىڭ 50 پروتسەنتكە جۋىعى گازبەن قامتاماسىز ەتىلگەن. 9 وبلىسقا گاز تارتىلعان. دەگەنمەن ورتالىق جانە سولتۇستىك وڭىرلەر ءالى دە گازسىز وتىر. ءبىز قاراوزەك (قىزىلوردا وبلىسى) – جەزقازعان – قاراعاندى – تەمىرتاۋ – استانا باعىتىندا ماگيسترالدى گاز قۇبىرىن سالۋ جوباسىن جۇزەگە اسىرۋىمىز كەرەك. وعان تيىسىنشە قاراجات تارتۋ قاجەت بولادى, سونىڭ ىشىندە حالىقارالىق قارجى ينستيتۋتتارىنان دا. بۇل 2,7 ملن ادامدى گازبەن قامتاماسىز ەتۋمەن قاتار, شاعىن جانە ورتا بيزنەستىڭ جاڭا وندىرىستەرىن اشۋعا مۇمكىندىك بەرەدى», دەدى پرەزيدەنت. ارينە بۇل وتە ورىندى قادام, الداعى ۋاقىتتا ەلىمىزدىڭ باسقا دا وڭىرلەرى كوگىلدىر وتىننىڭ جاقسىلىعىن كورۋگە ءتيىس دەپ سانايمىز. پرەزيدەنتتىڭ بەس باستاماسىن سىر بويى حالقى زور قۋانىشپەن قارسى الدى جانە جارقىن بولاشاعىنا ايقىن باعدار الىپ وتىر.
استانانى گازداندىرۋ ەكولوگيانى جاقسارتىپ, زياندى قالدىقتاردىڭ اۋاعا تارالۋىن 6 ەسەگە ازايتادى ەكەن. جوبانى جۇزەگە اسىرۋ وزگە وڭىرلەردى دە گازداندىرۋعا مۇمكىندىك بەرەدى. سارىارقاعا گاز كەلگەن سوڭ پاۆلودار, پەتروپاۆل, كوكشەتاۋ قالالارىنا دا كوگىلدىر وتىن جەتكىزۋ قاراستىرىلماق. سونىمەن بىرگە قۇرىلىستىڭ بىرنەشە رەت ەكشەلىپ پىسىقتالعانى, ءسويتىپ ناقتى جوباعا اينالعانى ايتىلدى.
ەلباسىنىڭ باستاماسىمەن ەندى سىردان سارىارقاعا گاز قۇبىرى تارتىلماق. بۇل قاراوزەك گاز تاراتۋ ستانساسىنان باستالاتىن الىپ قۇرىلىس ءبىزدىڭ قىزىلوردالىقتارعا جاڭا جۇمىس ورىندارى عانا ەمەس, وندىرىسىمىزگە سەرپىن اكەلەدى. قازىرگى تاڭدا وبلىس حالقىنىڭ 63 پايىزى تابيعي گاز تۇتىنۋدا. سوڭعى جىلدارى قىزىلوردا قالاسىن گازداندىرۋ قارقىنى كۇشەيىپ, 7 اۋدان ورتالىعىنىڭ 4-ۋىنە گاز جەتكىزىلدى.
مەملەكەتىمىزدىڭ جاڭا قادامدارى بۇكىل قازاقستاندىقتارعا, ەلىمىزدىڭ بارشا ازاماتتارىنا يگى اسەر ەتەدى. بۇل باستامالاردىڭ ەلىمىز تۇتاس, قوعامىمىز تۇراقتى بولسا عانا تابىستى جۇزەگە اساتىنى بارلىعىمىزعا زور جاۋاپكەرشىلىك جۇكتەيدى.
مەدەت ۋساين,
قىزىلوردا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باستىعى
