ۆ.پۋتين ءوز سوزىندە مەملەكەتتىڭ الدىندا تۇرعان ماڭىزدى مىندەت رەتىندە حالىقتىڭ الەۋمەتتىك جاعدايىن جاقسارتۋدى اتاپ كورسەتتى. الداعى بىرنەشە جىلدىڭ ەل بولاشاعى ءۇشىن ماڭىزدى بولاتىنىن جەتكىزگەن رەسەي پرەزيدەنتىنىڭ سوزىنە قاراعاندا, قازىرگى تاڭدا ەلگە كەلەتىن باستى قاۋىپ – ءتۇرلى سالالاردا ارتتا قالۋ. ەل ەكونوميكاسىنىڭ تۇراقتىلىققا بەت العانىن ايتا وتىرىپ, ۆ.پۋتين وسى ءساتتى دامۋ ءۇشىن ءتيىمدى قولدانۋعا شاقىردى.
ماسەلەن, بيىلعى 1 مامىردان باستاپ رەسەيدە ەڭ تومەنگى جالاقى مولشەرىن ەڭ تومەنگى كۇنكورىس دەڭگەيىنە تەڭەستىرۋ كوزدەلگەن. ۆ.ءپۋتيننىڭ ايتۋىنشا, بۇل ءتورت ميلليونعا جۋىق تۇرعىننىڭ جاعدايىن جاقسارتۋعا كومەكتەسەدى.
سونداي-اق ول الەۋمەتتىك كومەك جۇيەسىن قايتا قاراستىرىپ, ەلدەگى جۇمىس كۇشىن كوبەيتۋدى قولعا الۋ كەرەك ەكەنىنە توقتالدى. «بىلتىر ەڭبەك جاسىنداعى حالىقتىڭ سانى ميلليونعا ازايدى. الداعى جىلداردا مۇنداي تەندەنتسيا ساقتالىپ قالا بەرەدى. بۇل ءوز كەزەگىندە ەكونوميكالىق وسىمگە كەدەرگى كەلتىرەدى. سوندىقتان رەسەي حالقىنىڭ تابيعي ءوسىمىن جولعا قويۋ كەرەك», دەدى ۆ.پۋتين.
الەۋمەتتىك سالانى دامىتۋ ءۇشىن رەسەي پرەزيدەنتى بالاباقشامەن قامتا-ماسىز ەتۋدى تاپسىردى. ونىڭ ايتۋىنشا, الداعى ءۇش جىل ىشىندە ەلدە 270 مىڭ ورىن اشىلۋى كەرەك. وسىعان بايلانىستى وڭىرلەرگە قازىنادان 50 ميلليارد رۋبل بولىنبەكشى. بۇدان بولەك ول قاريالاردىڭ الەۋمەتتىك جاعدايىنا الاڭداۋشىلىق ءبىلدىردى.
سونداي-اق ۆ.پۋتين حالىقتى تۇرعىن ۇيمەن قامتاماسىز ەتۋ توڭىرەگىندە دە اڭگىمەلەدى. ونىڭ كەلتىرگەن دەرەكتەرىنە قاراعاندا, 2017 جىلى ءۇش ميلليون ادام جاڭا باسپاناعا قول جەتكىزگەن. وسىعان بايلانىستى رەسەي باسشىسى جىل سايىن بەس ميلليون تۇرعىندى ۇيمەن قامتاماسىز ەتۋ قاجەتتىگىن مالىمدەدى. بۇدان بولەك, قولجەتىمدى باسپانانىڭ دەڭگەيىن جوعارىلاتۋ ءۇشىن ماڭىزدى ءۇش ماسەلەنى اتاپ كورسەتتى. ولار: حالىقتىڭ تابىسىن كوبەيتۋ, يپوتەكالىق نەسيە بەرۋدىڭ پايىزىن ازايتۋ جانە تۇرعىن ءۇي نارىعىن كەڭەيتۋ.
«قازىرگى تاڭدا رەسەيدە جىلىنا 80 ميلليون شارشى مەتر ءۇي سالىنادى. ەندىگى جەردە قۇرىلىس كولەمىن ارتتىرىپ, ونى جىلىنا 120 ميلليون شارشى مەترگە دەيىن جەتكىزۋ قاجەت. بۇل وڭاي شارۋا ەمەس, بىراق زاماناۋي تەحنولوگيالار مەن قۇرىلىس كومپانيالارىمىزدىڭ قارىمىن ەسكەرسەك, مۇنى ەڭسەرۋگە مۇمكىندىك بار. 2024 جىلى بۇكىل ەل اۋماعىن جوعارى جىلدامدىقتى ينتەرنەتپەن قامتاماسىز ەتەمىز. حالىق سانى 250-دەن اساتىن ەلدى مەكەندەر اراسىنداعى تالشىقتى-وپتيكالىق بايلانىس جەلىسىنىڭ قۇرىلىسى اياقتالادى. سولتۇستىكتەگى, سىبىردەگى جانە قيىر شىعىستاعى اۋىلدارعا رەسەيلىك جەر سەرىگى ارقىلى ينتەرنەت جەتكىزىلەدى», دەدى ول.
الداعى باستى باسىمدىقتار رەتىندە ۆ.پۋتين ساپالى مەديتسينا قىزمەتىن دامىتۋدى اتاپ كورسەتىپ: «2019-2024 جىلدارى دەنساۋلىق ساقتاۋ سالاسىن دامىتۋ ءۇشىن ءىجو كولەمىنىڭ ءتورت پايىزدان استامىن بولۋگە تۋرا كەلەدى. بىراق ءبىز ول سومانى 5 پايىزعا دەيىن جەتكىزۋدى كوزدەيمىز», دەدى رف پرەزيدەنتى.
ۆ.پۋتين ەلدەگى ينفراقۇرىلىمدى كەڭەيتىپ, قايتا جاڭعىرتۋدىڭ باستى مىندەتتەردىڭ ءبىرى ەكەنىن مالىمدەدى. ونىڭ سوزىنە سۇيەنسەك, رەسەي الەمدەگى كولىك تاسىمالىنىڭ ۇزدىگىنە اينالۋى ءتيىس. وسىعان بايلانىستى ول وڭىرلەر مەن قالا باسشىلارىنا جول قۇرىلىسىنىڭ ساپاسىن جاقسارتىپ, جاڭا تەحنولوگيالاردى قولدانۋعا تاپسىرما بەردى. بۇل ماقساتتى ورىنداۋ ءۇشىن ەل قازىناسىنان 11 تريلليون رۋبل قاراستىرىلادى.
«ەۋرازيالىق جۇك تاسىمالىنىڭ تامىرىنا اينالۋىمىز قاجەت. قازىردىڭ وزىندە «ەۋروپا – تىنىق مۇحيتى ايماعى» ءدالىزىنىڭ باستى بولىگىنە اينالاتىن اۆتوكولىك جولى سالىنىپ جاتىر. قىتاي مەن قازاقستانداعى ارىپتەستەرىمىز ءوز جۇمىسىن تولىق اياقتادى. ونداعى بولىك پايدالانۋعا بەرىلدى. ءبىز جەدەلدەتۋىمىز قاجەت», دەدى ۆ.پۋتين.
ۆ.ءپۋتيننىڭ ايتۋىنشا, رەسەي قازىرگى تاڭدا حالىقارالىق ۇيىمداردىڭ جۇمىسىنا بەلسەنە ارالاسىپ كەلەدى. ماسەلەن, ەىدۇ, بۇۇ, شانحاي ىنتىماقتاستىق ۇيىمدارمەن ارىپتەستىك اياسى كەڭەيگەن. سونىمەن قاتار اقش جانە ەۋروپالىق وداقپەن ءوزارا ىقپالداستىقتى نىعايتۋعا مۇددەلى ەكەنىن جەتكىزدى. ءتىپتى كەي ماسەلەلەردە كوزقاراستارى ساي كەلمەسە دە, الەمدىك قاۋىپسىزدىك پەن بەيبىتشىلىك ءۇشىن جۇمىس ىستەيتىن سەرىكتەس بولىپ قالا بەرەتىنىن دە مالىمدەدى.
«ەۋرازيالىق ەكونوميكالىق وداقتاعى ارىپتەستەرىمىزبەن بىرگە ۇيىمدى باسەكەگە قابىلەتتى ەتۋدى كوزدەيمىز. كۇن تارتىبىندە ورتاق ەلەكتر ەنەرگياسىن, مۇناي مەن مۇناي ونىمدەرى, گاز نارىعىن قۇرىپ, كەدەندىك قىزمەتتى جاقسارتۋ تۇر. ەۋرازيالىق ۇلكەن ارىپتەستىك ورناتۋ بويىنشا جۇمىسىمىزدى جالعاستىرا بەرەمىز», دەدى ۆ.پۋتين.
سونىمەن قاتار ول قورعانىس سالاسىنداعى جەتىستىكتەرگە دە توقتالدى. ماسەلەن, امەريكالىق زىمىراننان قورعانىس جۇيەسىنىڭ كۇشەيتىلگەنىنە بايلانىستى رەسەيلىك بالليستيكالىق زىمىراندار ونى اينالىپ وتەتىن جۇيەمەن جابدىقتالاتىنىن مالىمدەدى. بۇدان بولەك, قاناتتى زىمىراندار جانە سۇڭگۋىر قايىقتار پلاتفورماسىندا ارەكەت ەتەتىن بالليستيكالىق ەمەس يادرولىق كەشەندەردىڭ جاسالىپ جاتقانىن, ولاردىڭ تاياۋ ۋاقىتتا قارۋلى كۇشتەر ساپىنا قوسىلاتىنىن جەتكىزدى.
سونىمەن قاتار رەسەي پرەزيدەنتى كاسىپكەرلىكتى دامىتۋ مادەني-اعارتۋشىلىق باعدارلامالار, ءبىلىم سالالارى, ەكونوميكالىق ساياسات جانە جاڭا تەحنولوگيالار جونىندەگى احۋالدى بايانداپ, جوسپارىمەن ءبولىستى.
قورىتا ايتقاندا, تاۋەلسىزدىك جىلدارىندا قازاقستاننىڭ بارلىق باستامالارىن قىزۋ قولداپ, ساياسي-ەكونوميكالىق سالادا سەنىمدى ارىپتەسى بولىپ كەلە جاتقان, ەكىجاقتى ىنتىماقتاستىقتىڭ دامۋىنا بارىنشا مۇددەلى, حالىقارالىق جانە ايماقتىق ۇيىمدار شەڭبەرىندە ەلىمىزبەن اۋىزبىرشىلىگى جاراسقان رەسەيدىڭ الداعى ۋاقىتتاعى ءىس-قيمىلىنىڭ جوباسى ۆ.ءپۋتيننىڭ جولداۋىندا وسىلايشا كورىنىس تاپتى.
اباي اسانكەلدى ۇلى,
«ەگەمەن قازاقستان»
