بۇل مەيرام قازاقستان حالقىنىڭ ىنتىماعىن, بىرلىگى مەن باۋىرلاستىعىن ودان ءارى نىعايتاتىن, قازاق حالقىنا بارشا جۇرتتىڭ ىستىق ىقىلاسىن ارتتىراتىن بىردەن-ءبىر مەرەكە. بۇل كۇنى قازاقستاندى مەكەن ەتكەن بارلىق ەتنوس وكىلدەرى قازاق حالقىنىڭ كىشىپەيىلدىگى, اقكوڭىلدىگى, كەڭ بايتاق جەرىندەي كەڭپەيىلدىگىن تىلگە تيەك ەتىپ, ءوز ريزاشىلىقتارىن ءبىلدىرىپ جاتادى. قازاق جەرىندە ءومىر ءسۇرىپ جاتقان بارشا جۇرت ەلىمىزدىڭ دارا تۇلعاسى, بۇكىل الەمگە تانىمال ەلباسى نۇرسۇلتان نازارباەۆقا وزدەرىنىڭ بۇگىنگى باقىتتى دا شاتتىقا تولى بەيبىت ومىرلەرى ءۇشىن العىسىن جاۋدىرىپ, ءىلتيپاتىن بىلدىرۋمەن بولادى. سونىڭ ىشىندە قازاقستان ۇيعىرلارى دا وسى ەلدى مەكەن ەتىپ جاتقان 100-دەن استام ەتنوستىڭ وكىلدەرىمەن تەڭ دارەجەدە باقىتتى ءومىر ءسۇرىپ جاتىر. حالقىمىزعا ءوز مادەنيەتىن, ءتىلىن, ءدىنىن جانە ءداستۇرىن ساقتاپ قالۋعا بار مۇمكىنشىلىك جاسالعان. قازىرگى تاڭدا ەلىمىزدە 70-كە جۋىق انا تىلىندە ءدارىس بەرەتىن مەكتەپتەر جۇمىس ىستەۋدە. بۇكىل دۇنيە جۇزىنە ءوزىنىڭ ونەرلى ارتىستەرىمەن تانىلعان رەسپۋبليكالىق مەملەكەتتىك ۇيعىر تەاترى بار. ق.قوجامياروۆ اتىنداعى بۇل تەاترعا وزدەرىڭىز بىلەتىندەي جاقىندا اكادەميالىق دارەجەسى بەرىلدى. بۇل قازاقستان ۇيعىرلارى ءۇشىن اسا قۋانتارلىق جاڭالىق بولدى. سونىمەن قاتار ەلىمىزدە رەسپۋبليكالىق دارەجەدە «ۇيعىر اۆازي» اتتى انا تىلىندە شىعاتىن 15 مىڭ وقىرمانى بار گازەت جۇمىس ىستەيدى. ر.سۇلەيمەنوۆ اتىنداعى شىعىستانۋ ينستيتۋتىندا ۇيعىرتانۋ عىلىمي ورتالىعى جۇمىس ىستەيدى. ۇلدارىمىز بەن قىزدارىمىز حالىق شارۋاشىلىعىنىڭ بارلىق سالالارىندا قىزمەت اتقارىپ كەلەدى.
قازاقستان ۇيعىرلارىنىڭ ەتنومادەني ورتالىعىنىڭ نەگىزگى قىزمەتتەرىنىڭ ءبىرى قايرىمدىلىق كومەك كورسەتۋ بولىپ تابىلادى. ايتالىق سوڭعى ءبىر-ەكى جىلدىڭ كولەمىندە ميلليونداعان قاراجات قايىرىمدىلىق ماقساتتارعا ءبولىنىپ, جۇمسالدى. كوپتەگەن قايىرىمدىلىق ءىس-شارالارىنا دەمەۋشىلىك جاسالدى. الەۋمەتتىك جاعدايى تومەن وتباسىلارعا دا ۇنەمى قارجىلاي كومەك بەرىپ, قامقورلىق جاساپ كەلەدى. مىسال كەلتىرسەك, جاقىندا الماتى وبلىسى تالعار اۋدانىنىڭ تۇزدىباستاۋ اۋىلىندا بىرنەشە ءۇي ورتەنىپ, تۇرعىندار قيىن جاعدايدا قالدى. ءبىرى قازاق, ءبىرى ۇيعىر جانە ورىس بولىپ تابىلاتىن بۇل اۋىل تۇرعىندارى دا بەرىلگەن جاردەم مەن دەمەۋشىلىكتەر ءۇشىن ءوز العىستارىن ايتىپ جاتتى. قاراعاندىدا بولعان سۋ تاسقىنى, الماتى وبلىسىنداعى سەل كەزىندە دە كوپتەگەن ازاماتتار كومەككە مۇقتاج بولدى. ۇيعىر ورتالىعىنىڭ جىگىتباسى كەڭەسى, ايەلدەر كەڭەسى جاپا شەككەندەرگە بارىنشا قولداۋ كورسەتىپ, بەلسەندى تۇردە قىزمەت اتقاردى.
قازاقستان ۇيعىرلارى پرەزيدەنت ن.نازارباەۆتىڭ ىشكى-سىرتقى ساياساتىن تولىعىمەن قولدايدى. سونىڭ ىشىندە «ماڭگىلىك ەل» ستراتەگياسى قازاقستان ۇيعىرلارى ءۇشىن كوپتەگەن مىندەتتەر جۇكتەدى. ەلباسى ن.نازارباەۆتىڭ قازاق ءتىلىن لاتىن گرافيكاسىنا وتكىزۋى كەزەڭىندە دە قازاقستاندىق ۇيعىرلار انا ءتىلىن لاتىن تاڭباسىنا نەگىزدەپ بىرگە كوشۋگە شەشىم قابىلدادى. ءاربىر قازاقستاندىق ۇيعىر جاقسى تۇسىنەتىن ءبىر قاعيدا مىناۋ: «ەگەر قازاق جەرىندە قازاقستان ماڭگى بولسا, قازاقستان ۇيعىرلارى دا, ولاردىڭ ءتىلى, ءدىنى جانە ءداستۇرى دە ماڭگىلىك بولادى». سوندىقتان ءاربىر قازاقستاندىق ۇيعىر قازاقستاننىڭ دامۋى مەن گۇلدەنۋىنە ءاردايىم ءوز ۇلەسىن قوسا بەرەدى.
شايماردان نۋرۋموۆ,
ءماجىلىس دەپۋتاتى, قحا مۇشەسى, قازاقستان ۇيعىرلارىنىڭ ەتنومادەني ورتالىعىنىڭ توراعاسى
