ماسەلەنىڭ انىق-قانىعىن ءتيىستى ورىندار انىقتاپ, باعاسىن بەرۋى ءتيىس, بىراق, كەزدەيسوق ادام ەمەس, اۋىل اكىمىنىڭ كامەلەت جاسىنا تولماعان بالاعا قول كوتەرۋى مەملەكەتتىك قىزمەتكەرگە لايىق قىلىق ەمەس ەكەنى دە اششى شىندىق قوي...
جالپى, مەملەكەتتىك قىزمەتكەردىڭ بىلايعى بۇقارا حالىق الدىنداعى بەدەلىنە نۇقسان كەلتىرەتىن جەكەلەگەن ادەتتەردىڭ سالدارى اۋىر بولماق. سول ءۇشىن دە قىزمەت ەتيكاسىن بۇزعان جاۋاپتى مامان اتاق-دارەجەسىنە قاراماستان قاتال جازالانۋى كەرەك. مەملەكەتتىك قىزمەتكەردىڭ جاۋاپكەرشىلىگى مەن ەل الدىنداعى بەت-بەينەسىنىڭ كىرشىكسىز بولۋىن ەلباسى نۇرسۇلتان نازارباەۆ تا ۇنەمى ەسكەرتىپ وتىر. مىسالعا, 2016 جىلى جارىق كورگەن مەملەكەت باسشىسىنىڭ «ۇلت جوسپارى – قازاقستاندىق ارمانعا باستايتىن جول» اتتى ماقالاسىندا مەملەكەتتى كاسىبيلەندىرۋ جولىندا جۇزەگە اسىرىلاتىن جۇمىستاردىڭ باعىتى ايقىندالعان بولاتىن. وسى ماقالادان سوڭ قازىر ءوز جەمىسىن بەرە باستاعان «100 ناقتى قادام» ۇلت جوسپارىنىڭ نەگىزگى ناتيجەسى بولىپ تابىلاتىن «مەملەكەتتىك قىزمەت تۋرالى» زاڭ قابىلدانىپ, ەلىمىزدە بۇرىن-سوڭدى بولماعان جاڭا قۇرىلىم – ەتيكا بويىنشا وكىلەتتى وكىلدەر ينستيتۋتىنىڭ جۇمىسى باستالعان ەدى. دەمەك, مەملەكەتتىك قىزمەتشىگە قويىلاتىن تالاپتار كۇشەيتىلىپ, ادەپ پەن ادىلەت جولىنداعى جۇمىستىڭ كىرشىكسىز بولۋى ارقاشان كۇن تارتىبىنەن تۇسپەيتىندىگى دە ناقتىلانعان. وسىنداعى «100 ناقتى قادامنىڭ» 12-قادامى «جاڭا ەتيكالىق ەرەجەلەردى ەنگىزۋ» دەپ اتالادى. بۇل قادامنىڭ وزەكتىلىگى تۋرالى پرەزيدەنت نۇرسۇلتان نازارباەۆ جوعارىدا ءبىز اتاپ وتكەن ماقالاسىندا ء«بىزدىڭ ءبىرىنشى رەفورمامىز «مەملەكەتتىك قىزمەت تۋرالى» جاڭا زاڭ نەگىزىندە مەملەكەتتىك اپپاراتتىڭ تيىمدىلىگىن ارتتىرۋعا باعىتتالعان. مەملەكەتتىك قىزمەتشىلەردىڭ جۇمىس پەن تۇرمىستاعى ءجۇرىس-تۇرىسىنىڭ قالىپتارى رەگلامەنتتەلگەن مەملەكەتتىك قىزمەتشىلەردىڭ جاڭا ەتيكالىق كودەكسى جاسالدى. شەنەۋنىكتەر ورتاسىندا ەتيكالىق نورمالاردى بۇزۋعا اكەلەتىن جانە جەمقورلىق قۇبىلىستار تۋىنداتاتىن جاعدايلاردىڭ الدىن الۋ بويىنشا قاتاڭ شارالار قاراستىرىلعان...» دەگەن ەدى. بىراق زاڭ تالاپتارى مەن ادەپ ەرەجەسىن ورەسكەل بۇزىپ قانا قويماي, ەلباسى جۇكتەگەن مىندەت پەن سەنىمدى دە اياققا تاپتاۋ ارەكەتى كەيبىر شەنەۋنىكتەر تاراپىنان ءجيى قايتالانىپ جاتىر. ونىڭ ءبىر دالەلى جوعارىدا ايتقان اقمولا وبلىسىنداعى جاعداي بولسا, تاعى ءبىر مىسالدى الماتى وبلىسىنان الىپ وتىرمىز.
جاقىندا ادەپ جونىندەگى كەڭەس الماتى وبلىستىق ادىلەت دەپارتامەنتىنىڭ باسشىسى مەيرامبەك قانىبەكوۆتىڭ مەملەكەتتىك قىزمەتشى ەتيكاسىنا جات قىلىقتارىن تالقىعا سالدى. قانىبەكوۆ مىرزا بىلدەي ادىلەت مەكەمەسىنىڭ تىزگىنىن ۇستايتىن قۇقىقتانۋشى بولسا دا, قول استىنداعى قىزمەتكەرلەرىن قاعاز كوتەرمەيتىن سوزدەرمەن بالاعاتتاۋدى ادەتكە اينالدىرىپ الىپتى. ادەپ كەڭەسىنىڭ مۇشەلەرى وتىرىستىڭ قاراۋىنا ۇسىنىلعان ءىس بويىنشا مەملەكەتتىك قىزمەتشىنى ايىپتاعان ادامداردى مۇقيات تىڭداپ, ۇسىنىلعان دالەل مەن ايعاقتاردى سارالادى. وبلىستىق باس ادىلەت مامانىنا قول استىنداعى قىزمەتكەرلەرىنىڭ تۇگەلگە جۋىعى نارازىلىق ءبىلدىرىپ, مۇنداي باسشىمەن ءارى قاي جۇمىس ىستەۋدىڭ مۇمكىن ەمەستىگىن ناقتى ايعاقتارمەن دالەلدەدى. مىسالعا, قانىبەكوۆتىڭ وزىنە تىكەلەي باعىناتىن قاراتال اۋداندىق ادىلەت باسقارماسىنىڭ باسشىسىن جازىقسىز تىلدەپ, ادام ۇيالاتىن سوزدەرمەن بالاعاتتاعانى اۋديوتاسپاعا جازىلىپ قالعان ەكەن. ادەپ كەڭەسىندە داۋىس يەسىنىڭ ءوزى ەكەنىن قانىبەكوۆ تە مويىندادى. جانە ول مۇنى قىزمەتكەرىن ەمەس, ءوزىنىڭ بالاسىنا قاراتا ايتقانىم ەدى دەپ اقتالىپ, تاعى كۇلكىگە قالدى.
ادەپ كەڭەسىنىڭ مۇشەلەرى ءىستىڭ ءمان-جايىنا قانىققاننان كەيىن وبلىستىق ادىلەت دەپارتامەنتىنىڭ باسشىسى مەيرامبەك قانىبەكوۆتىڭ ارەكەتىن مەملەكەتتىك قىزمەتشى ادەبىنە ساي ەمەس دەگەن شەشىمگە كەلىپ, ونى قىزمەتتەن بوساتۋ تۋرالى ادىلەت مينيسترلىگىنە حات جولداۋعا كەلىستى. بەيادەپ باسشىنىڭ ەندىگى لاۋازىمدىق جاۋاپكەرشىلىگى مينيسترلىك قابىلدايتىن شەشىمگە بايلانىستى بولماق.
ايتپاقشى, وتكەن جىلى الماتى وبلىسىندا ءدال وسى مەملەكەتتىك قىزمەتكەردىڭ ادەپ ەرەجەسىن بۇزۋىنا بايلانىستى بىرنەشە وقيعا بولعان ەكەن. اقسۋ اۋدانىنا قاراستى قىزىلاعاش اۋىلىنىڭ اكىمى س.اميتوۆانىڭ جەرگىلىكتى شارۋا قوجالىعىنىڭ باسشىسىمەن كەلىسپەي قالىپ, ونىڭ ارتى بالاعاتتاۋ مەن جاعا جىرتىسۋعا دەيىن بارعانى جايلى اۋديوجازبا تاراپ, ءىس ناسىرعا شابا جازداعان. ىسكە تاعى دا ادەپ جونىندەگى كەڭەس ارالاسىپ, اۋىل اكىمى قاتاڭ سوگىس ارقالاپ قۇتىلعان ەدى. ال قابىلداۋىنا كەلگەن جەرگىلىكتى تۇرعىنعا ادەپسىز ءسوز ايتىپ, دورەكى مىنەز كورسەتكەن قاپشاعاي قالاسىنىڭ بۇرىنعى اكىمى س.قيقىموۆ ءوز ەركىمەن جۇمىستان كەتكەن بولاتىن. مۇقىم ەلدىڭ قۇلاعىن شۋلاتقان كەلەسى وقيعا ۇيعىر اۋدانىندا بولعان. سول تۇستا الەۋمەتتىك جەلىلەر مەن ەلەكتروندى بۇقارالىق اقپارات قۇرالدارىندا بۇرىنعى اكىم ا.توحتاسۋنوۆتىڭ قول استىنداعى قىزمەتكەرلەرىن بالاعاتتاپ, نامىسقا تيەتىن سوزدەر ايتقانى جايلى جارىسا جازىلعان ەدى. ەكس-اكىم اۋدانداعى جۇمىسىنان كەتكەنىمەن, قازىر وبلىستا لاۋازىمدى قىزمەت اتقارىپ ءجۇر...
قالماحانبەت مۇقامەتقالي,
«ەگەمەن قازاقستان»
الماتى وبلىسى
