وبلىس ورتالىعى – اتىراۋ قالاسىنداعى نازارباەۆ زياتكەرلىك مەكتەبىنىڭ ءبىر توپ وقۋشىسى كومپانيانىڭ ينتەراكتيۆتى مۇراجايىندا بولىپ, قازاق مۇنايىنىڭ تاريحىمەن كەڭىنەن تانىستى. مۇراجايدا مەكتەپ وقۋشىلارىن «ەمبىمۇنايگاز» اق الەۋمەتتىك ساياسات جونىندەگى باسقارۋشى ديرەكتورى ءسالىمجان ناقپاەۆ قارسى الىپ, ەكسكۋرسيانىڭ ماقساتىنا توقتالىپ ءوتتى.
– ەل ەكونوميكاسىنداعى جەتەكشى سالا – مۇناي-گاز سەكتورىنىڭ قالىپتاسۋى, قارىشتاپ دامۋى وسى ينتەراكتيۆتى مۇراجايدا كەڭىنەن كورىنىس تاپقان. قازاق مۇنايىنىڭ باستاۋىندا تۇرعان ەمبى ءوڭىرىنىڭ اتالمىش سالا تاريحىندا الار ورنى ەرەكشە. بۇل وڭىردە العاشقى قازاق جۇمىسشى تابى قالىپتاستى. كەشەگى ەكىنشى دۇنيەجۇزىلىك سوعىس كەزىندەگى ەمبىلىك مۇنايشىلاردىڭ جەڭىسكە قوسقان ۇلەسى ۇشان-تەڭىز. سوعىستان كەيىن توقىراعان شارۋاشىلىقتى قالپىنا كەلتىرۋ جۇمىستارىندا دا مۇنايشىلاردىڭ ۇلەستەرى مول. بۇگىنگى ۇرپاق اعا بۋىننىڭ وسىناۋ ەرلىكتەرى مەن ەڭبەكتەرىن ءبىلىپ ءوسۋى كەرەك. وسى ماقساتتا باسقارما توراعاسى ءانۋار ەركىن ۇلى جاقسىبەكوۆ ينتەراكتيۆتى مۇراجايدى تەك كومپانيا قىزمەتكەرلەرىنە عانا ەمەس, وبلىستىڭ جاڭالىققا جاقىن بارلىق جاستارىنا كورسەتۋ جونىندە ۇسىنىس ءبىلدىرىپ, باستاما كوتەرگەن بولاتىن, – دەپ اتاپ ءوتتى س.ناقپاەۆ.
بولاشاقتا مۇناي-گاز سالاسى ماماندىعىنىڭ يەسى اتانۋعا نيەتى بار جانە بۇل باعىتتا ءتۇرلى عىلىمي جوبالارعا قاتىسىپ جۇرگەن تالاپكەرلەر وزدەرىن تولعاندىرعان ساۋالدارعا كومپانيا قىزمەتكەرلەرىنەن جاۋاپ الىپ, بىلىمدەرىن تولىقتىردى.
– قازاق مۇناي-گاز ءوندىرىسىنىڭ عاسىردان استام تاريحى سوناۋ ەجەلگى داۋىرلەرمەن ساباقتاسىپ جاتىر. بۇگىن ءبىز ەمبىنىڭ كەن الاڭى قاراشۇڭگىلدەن العاش مۇنايدىڭ تابىلۋى, قازاقستان مۇناي ونەركاسىبىنىڭ قالىپتاسۋى مەن «ەمبىمۇناي» ترەسىنىڭ قۇرىلۋى تۋرالى دەرەكتەردى وسى مۇراجايدان تاپتىق. مەنىڭ وتباسىمداعى ادامداردىڭ بارلىعى دەرلىك مۇناي-گاز سالاسىندا ەڭبەك ەتەدى. مۇراجايعا كەلىپ, مەنىڭ دە وسى سالانى دامىتۋعا دەگەن قىزىعۋشىلىعىم ارتا ءتۇستى, – دەيدى مەكتەپ وقۋشىسى اسەم تورەعاليەۆا.
دانيار دجاكسەنوۆ اتالعان وقۋ ورنىنىڭ 10-شى سىنىبىندا ءبىلىم الۋدا.
– مۇراجايدىڭ «ينترو», «العاشقى اشۋلار», «تەحنولوگيا ۋاقىتى», « ۇلى وتان سوعىسى», «مەدياورتالىق» جانە باسقا دا بولىمدەرى قۇندى مالىمەتتەرگە تولى. مۇراجاي زاماناۋي ۇلگىدە جاساقتالىپ, ۇنەمى جاڭارتىلىپ وتىراتىنى ماڭىزدى, – دەدى ول.
اتاپ ءوتۋ كەرەك, قازىرگى تاڭدا مۇراجايدى تاماشالاۋعا نيەت بىلدىرۋشىلەر قاتارى ارتىپ وتىر. ينتەراكتيۆتى مۇراجاي بۇدان بولەك ج.دوسمۇحامبەتوۆ ليتسەيى, Apec Petrotechnic جوعارى كوللەدجى, اتىراۋ مۇناي-گاز ۋنيۆەرسيتەتى, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى, اتىراۋ تەحنولوگيالىق كوللەدجى, كاسپي ءوڭىرىنىڭ قازىرگى زامانعى كوللەدجى, بيزنەس جانە قۇقىق كوللەدجى, اتىراۋ مەديتسينالىق كوللەدجى, اتىراۋ اگرو-تەحنيكالىق كوللەدجىنىڭ وقۋشىلارى مەن ستۋدەنتتەرىن قابىلدايدى.
قوسۇيىم مۇقاشەۆ
