ەلباسىنىڭ ۇلت جوسپارىندا كوزدەلگەن تۋريستىك يندۋستريانى دامىتۋ باستاماسىن جۇزەگە اسىرۋ ءۇشىن 2017 جىلى تۋريستىك سالانى دامىتۋدىڭ 2023 جىلعا دەيىنگى تۇجىرىمداماسى دا قابىلدانعان بولاتىن.
وسى شارالار ەلىمىزدىڭ تۋريزم سالاسىندا جۇمىس اتقارىپ وتىرعان كاسىپكەرلەرىمىزگە زور مۇمكىندىك اشۋدا. بىراق, قابىلدانعان كوپتەگەن قۇجاتتاردىڭ ىشىندە وسى يگى شارالارعا ءوز كەدەرگىسىن جاساپ وتىرعان ماسەلەلەر دە بار. مىسالى, 2016 جىلعى 30 قاراشادا سالىق كودەكسىنىڭ 342-بابىنا ەنگىزىلگەن وزگەرىستەرگە سايكەس, جەراستى سۋلارىن وندىرۋگە سالىناتىن سالىقتىڭ مولشەرى 1 تەكشە مەترگە ايلىق ەسەپتىك كورسەتكىشپەن سانالاتىن بولعان. ياعني, ساناتوري-كۋرورتتىق ستاتۋسى بار ساۋىقتىرۋ ورىندارى 1 تەكشە مەتر سۋعا شامامەن 6 تەڭگە تولەسە, ءدال سونداي قىزمەت اتقارىپ وتىرعان ساناتوري ستاتۋسى جوق جاي دەمالىس ورىندارى سۋ سالىعىن 350 ەسە ارتىق نەمەسە ءار تەكشە مەتر سۋعا 2121 تەڭگە تولەۋگە مىندەتتى بولعان.
وسى ماسەلەگە قاتىستى 2017 جىلدىڭ باسىندا «اق جول» پارتياسىنا ەلىمىزدىڭ تۋريستىك دەمالىس سالاسىندا جۇمىس اتقاراتىن بىرقاتار مەكەمەنىڭ, 30-دان استام شاعىن كاسىپكەردىڭ اتىنان شاعىم حاتتارى كەلىپ ءتۇستى. بۇل حاتتاردا جەرگىلىكتى مەملەكەتتىك كىرىس ورگاندارى وسى دەمالىس زونالارى ساناتوري-كۋرورتتىق مەكەمە بولىپ تابىلمايدى دەگەن سىلتاۋمەن ءار كاسىپكەردىڭ موينىنا 20 ملن تەڭگەدەن استام سالىقتىق قارىزدى ارتىپ, بۇگىنگى كۇنگە ايىپپۇلمەن بىرگە ول 28 ملن تەڭگەدەن اسىپ كەتكەنى ايتىلعان.
مۇنداي باس كوتەرتپەس سومالار مەن سالىق ورگاندارىنىڭ ءىس قيمىلدارى شاعىن دەمالىس زونالارىنىڭ جابىلۋىنا اكەلىپ سوعاتىنىن جانە جۇزدەگەن جۇمىس ورىندارى قىسقارىپ, ەلباسى ايرىقشا نازار اۋدارىپ وتىرعان ىشكى ءتۋريزمدى دامىتۋ, كاسىپكەرلىكتى قولداۋ, اكىمشىلىك كەدەرگىلەردى ازايتۋ ساياساتىنا قاراما-قايشى ارەكەتكە جول بەرىلەتىنىن ەسكەرتكىمىز كەلەدى.
اتالعان ماسەلە بويىنشا «اق جول» پارتياسىنىڭ 2017 جىلعى 24 اقپانىندا مەملەكەتتىك كىرىستەر كوميتەتىنە جولداعان حاتىنا «شەشىم سالالىق مينيسترلىكتەردىڭ تۇجىرىمدامالارىنان كەيىن قابىلدانادى» دەگەن جاۋاپ العان بولاتىنبىز. 2017 جىلعى 25 جەلتوقساندا قابىلدانعان جاڭا سالىق كودەكسىنىڭ نورمالارىنا سايكەس, ءبىز قوزعاعان ماسەلەلەر ورىن تاۋىپ, دەمالىس زونالارى وندىرەتىن جەراستى سۋلارىنا ءادىل ستاۆكالار قويىلعانىن كورىپ وتىرمىز. كاسىپكەرلەردىڭ جاعدايىن تۇسىنگەن مەملەكەتتىك ورگاندارعا دا ريزاشىلىعىمىزدى بىلدىرەمىز. الايدا, قابىلدانعان جاڭا ستاۆكا جوعارىدا اتالعان كاسىپكەرلەرگە جەڭىلدىك اكەلىپ وتىرعان جوق. ەسەپتەلگەن سالىق سومالارى ايىپپۇلدارىمەن بىرگە كاسىپكەرلەردىڭ مويىندارىندا تۇر. ونىڭ ۇستىنە ءوسىمى دە كۇن ساناپ ارتۋدا.
2016 جىلدىڭ سوڭىندا ساناتوري ستاتۋسى جوق دەمالىس-ساۋىقتىرۋ مەكەمەلەرىنە جوعارى تاريفتەردى ەنگىزۋ شەشىمى نەبارى ءبىر جىلدان سوڭ كۇشى جويىلىپ, ول شەشىمنىڭ قاتە ەكەندىگىنە بۇگىن كوزىمىز جەتىپ وتىر. سوندىقتان سالىق كودەكسىنىڭ جاڭا رەداكتسياسىنىڭ نورمالارىندا 2016 جىلدىڭ 1 قاڭتارىنان باستاپ قويىلعان شوتتاردى قايتا ەسەپتەۋ قاراستىرىلۋى قاجەت دەپ سانايمىز. وسىنداي شەشىم قابىلدانعان جاعدايدا, ول تۋريستىك يندۋستريانىڭ دامۋىنا جاڭا سەرپىلىس بەرەدى دەگەن سەنىمدەمىز.
بەرىك دۇيسەنبينوۆ,
ءماجىلىس دەپۋتاتى
