بۇگىنگى تاڭدا اۋدان, قالالاردا تاسقىنعا قارسى شتابتار قۇرىلىپ, تاۋلىكتىك كەزەكشىلىك ۇيىمداستىرىلۋدا. وبلىس اۋماعىنداعى بارلىق سۋ قويمالارى مەن وزەن كولدەرگە كۇندەلىكتى مونيتورينگ جۇرگىزىلىپ كەلەدى. وڭىردەگى سۋ قويمالارىنىڭ ورتاشا تولۋى 35-60 پايىزدى قۇرايدى. قاڭتار ايىنىڭ سوڭىندا اۋا رايىنىڭ سۋىق بولۋىنىڭ سالدارىنان سىرداريا وزەنىندە مۇز قاتقان. قازىرگى تاڭدا مۇز ەرىگەندىكتەن, وزەن بويىندا ورنالاسقان اۋدانداردا جاعداي باقىلاۋعا الىنعان. وڭتۇستىك قازاقستان وبلىسى اكىمدىگى تاراپىنان «سۋ تاسقىنى قاۋپىنىڭ الدىن الۋ جانە جويۋ جونىندەگى 2017-2020 جىلدارعا ارنالعان ءىس-شارالار كەشەنى» جول كارتاسىنا 98 ينجەنەرلىك شارا ەنگىزىلگەن.
– جول كارتاسىنا سايكەس 2017 جىلى 247 ەلدى مەكەندە توتەنشە جاعدايدىڭ الدىن الۋ جانە جويۋ بويىنشا 42 شارا ۇيىمداستىرىلدى. بۇل ماقساتقا 3,5 ملرد تەڭگە بولىنگەن. بادام, كەلەس, شايان وزەندەرىندە ارنا تۇزەۋ, قورعاۋ دامبالارى جانە 2530 مەتر جاعا بەكىتۋ مەن 3,08 شاقىرىم بوگەت تۇرعىزۋ جۇمىستارى اتقارىلدى. سونداي-اق 352,3 شاقىرىمدىق بۇرىننان بار دامبالار نىعايتىلىپ, 49 شاقىرىم جاڭا بوگەتتەر سالىندى. بۇدان بولەك, 52,5 شاقىرىم وزەن جاعالاۋلارى بەكىتىلىپ, 673,3 شاقىرىم ارىق-كانالدار, 397 بىرلىك سۋ وتكىزۋ قۇبىرلارى تازالاندى. جەرگىلىكتى حالىقتى حاباردار ەتۋ ءۇشىن دابىل بەرۋ قوندىرعىلارى ساتىپ الىندى, – دەدى وبلىس اكىمى جانسەيىت تۇيمەباەۆ.
سىرداريا وزەنى بويىندا ورنالاسقان شاردارا سۋ قويماسىنىڭ سىيىمدىلىعى 5,2 ملرد تەكشە مەتردى قۇرايدى. بۇگىنگى تاڭدا مۇندا سەكۋندىنا مىڭ تەكشە مەتر سۋ اعىپ, ونىڭ كولەمى 3 ملرد 185 مىڭ تەكشە مەترگە جەتكەن. بىراق قويماعا جينالعان سۋ كولەمى وتكەن جىلدىڭ وسى كەزەڭىمەن سالىستىرعاندا 1 ملرد 036 ملن تەكشە مەترگە از. سونداي-اق قازىرگى تاڭدا كوكساراي سۋ قويماسىندا 1 ملرد 739 مىڭ تەكشە مەتر سۋ جينالدى.
وبلىستىق بيۋدجەتتەن 18,5 ملن تەڭگە ءبولىنىپ, جاڭادان سالىناتىن سۋ قويمالارىنىڭ ورىندارىنا زەرتتەۋ جۇمىستارى جۇرگىزىلگەن. سونىڭ ناتيجەسىندە سۋ جيناقتاۋ كولەمى 378,64 ملن تەكشە مەتردى قۇرايتىن 26 سۋ قويماسىن سالۋ قاراستىرىلىپ جاتىر.
رەسپۋبليكالىق بيۋدجەتتەن سۋ جيناقتاۋ كولەمى 340,5 تەكشە مەترلىك 3 نىساننىڭ قۇرىلىسى جۇرگىزىلەدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
