ۆيتسە-پرەمەر – اۋىل شارۋاشىلىعى ءمينيسترى ومىرزاق شوكەەۆتىڭ اتىنا جولدانعان جانار-جاعارمايمەن قامتاماسىز ەتۋ جايى تۋرالى ساۋالدى پارلامەنتتىڭ كەزەكتى سەسسياسىندا ءبىر توپ دەپۋتات جاريا ەتتى. ماجىلىسمەندەردىڭ ايتۋىنشا, وسىعان قاتىستى جىل سايىن كەلىپ تۇسەتىن ارىز-شاعىمداردا تولاس جوق. ءتيىستى ورىندارعا حابارلاسىپ, ماسەلە كوتەرگەننەن شىققان ناتيجە دە شامالى.
ماسەلەنىڭ ءمانىسى مىنادا: كەستەگە سايكەس, ديزەل وتىنى ايماقتارعا ناۋرىز ايىنان باستاپ جەتكىزىلۋى ءتيىس. الايدا شارۋالار ونى ءىس جۇزىندە تەك ءساۋىردىڭ اياعى مەن مامىردىڭ باسىندا ءبىر-اق الادى. سولتۇستىك وبلىستار ءۇشىن جارامدى بولعانىمەن, وڭتۇستىك وڭىرلەر ءۇشىن بۇل تىم كەش. ايتالىق قاراعاندى وبلىسىندا ەگىن ەگۋ ناۋقانى 20 مامىرعا دەيىن اياقتالۋى ءتيىس. ەگىستىك الاڭىن الدىن الا وڭدەۋ جۇمىستارى ءساۋىر ايىندا جۇرگىزىلۋى كەرەك. سوندىقتان دەپۋتاتتار كەستەنى قايتا قاراۋدى, جانار-جاعارمايدى جەتكىزۋ مەرزىمىن مەيلىنشە ىلگەرىلەتۋدى سۇراپ وتىر.
ەكىنشى ماسەلە – باعا. جولاي قوسىلاتىن ۇستەمەلەر جەڭىلدەتىلگەن وتىننىڭ باعاسىن جانار-جاعارماي قۇيۋ بەكەتتەرىندەگى باعامەن بىردەي قىلادى. مىسالى, 2017 جىلى كوكتەمگى دالا جۇمىستارىن جۇرگىزۋگە قاراعاندى وبلىسىنا پاۆلودار مۇناي وڭدەۋ زاۋىتىنان ءار تونناسىنا 127 مىڭ تەڭگەدەن 19 مىڭ توننا ارزانداتىلعان ديزەل وتىنى ءبولىندى. ءىس جۇزىندە شارۋالار ءۇشىن ونىڭ باعاسى نارىقتىق باعامەن بىردەي بولىپ شىقتى. ونىڭ سەبەبى, بىرىنشىدەن, وتىندى بولەتىن وپەراتورلار ءتيىستى شارۋاشىلىقتاردان قاشىقتا ورنالاسقان, ياعني ونى تاسۋ شىعىنىن شارۋانىڭ ءوزى كوتەرەدى. ەكىنشىدەن, رەسمي جاريالانعان باعاعا ۇستەمەلەنەتىن قوسىمشا الىمدار بار.
ءماجىلىس دەپۋتاتتارى مىسالعا كەلتىرگەندەي, جانار-جاعارماي جەتكىزۋشى وپەراتور بىلتىر پاۆلودار مۇناي وڭدەۋ زاۋىتىنان سولياركانىڭ ءار تونناسىن 127 مىڭ تەڭگەدەن ساتىپ الدى. ليترگە شاققاندا, ءار ءليتردىڭ باعاسى 105 تەڭگەدەن بولىپ شىقتى. زاۋىت باعاسىنا تەمىر جول ءتاريفى جانە باسقا دا تەمىر جول شىعىندارى, كۇزەت, ساقتاۋ قىزمەتكەرلەرىنە تولەمدەر, كومپانيانىڭ جول شىعىندارى مەن جەتىسپەگەن قارجى قوسىلادى. اينالىپ كەلەندە, ءار ءليتردىڭ باعاسى 105 تەڭگەدەن 126 تەڭگەگە دەيىن ءوسىپ, نارىقتىق باعامەن بىردەي بولعان. سونىمەن قاتار قازاقستان فەرمەرلەر وداعى بەرگەن اقپاراتقا قاراعاندا, كەيبىر وپەراتورلار جانار-جاعارمايدى جەتكىزۋ شىعىنىنا وزدەرى العان نەسيەنى تولەۋ مىندەتىن دە قوسىپ قويعان.
وسىنىڭ ءبارىن ەسكەرگەن دەپۋتاتتار ۇكىمەتتەن جەڭىلدەتىلگەن جانار-جاعارمايدى وپەراتورلار ارقىلى ۇيلەستىرۋ جۇيەسىن مەيلىنشە جەتىلدىرۋدى, وتىننىڭ شارۋاشىلىقتارعا جەتكەنشە قىمباتتاپ كەتپەۋىن قاداعالاۋ امالدارىن جاساۋدى سۇراپ وتىر.
ماجىلىسمەندەر سونداي-اق ارزانداتىلعان مينەرالدى تىڭايتقىشتاردى جەتكىزۋ مەرزىمدەرىنىڭ دە كەشەۋىلدەۋىنە الاڭداۋلى. بۇل ارينە, اۋىلشارۋاشىلىق داقىلدارىنىڭ تۇسىمىنە كەرى اسەرىن تيگىزبەي قويمايدى. اۋىل شارۋاشىلىعى مينيسترلىگى بۇل ماسەلەنى دە نازاردان تىس قالدىرماۋى ءتيىس.
قايرات ءابىلدا,
«ەگەمەن قازاقستان»
قاراعاندى
