مۇنداي شارا باتىس قازاقستان وبلىسىندا تۇڭعىش رەت ۇيىمداستىرىلىپ وتىر. شاراعا قازاقستاننىڭ ءار وڭىرىنەن – اتىراۋ, ماڭعىستاۋ, اقمولا, الماتى, جامبىل, كوكشەتاۋ, قاراعاندى وبلىستارىنان, استانا مەن الماتى قالاسىنان جيىرما شاقتى قۇسبەگى قاتىسۋدا. ءبىر قىزىعى, ىرگەدە ءوتىپ جاتقان دۋماننان قالعىسى كەلمەي, رەسەيدىڭ كورشىلەس سامارا, تولياتتي, ۋليانوۆسك قالالارىنان قارشىعا مەن يتەلگى باپتاپ جۇرگەن قۇسبەگىلەر دە جولعا شىققان ەكەن. قىزىل كىتاپقا ەنگەن قۇستارىن شەكارادان وتكىزبەي, تەك وزدەرى كەلۋگە ءماجبۇر بولعان. شەتەلدىك قوناقتار ورالداعى قۇسبەگىلەر سايىسىنىڭ ۇيىمداستىرىلۋىنا, ەل-جۇرتتىڭ ىقىلاسىنا ەرەكشە قىزىعۋشىلىقپەن قاراپ ءجۇردى.
- وسىنداي تۋرنير بىلتىر ماڭعىستاۋ مەن اتىراۋ وبلىسىندا ءوتتى. بيىلعى شارا باتىس قازاقستان وبلىسى باسشىلىعىنىڭ قولداۋىمەن ءوتىپ وتىر. مۇنى قۇسبەگىلىك ءداستۇردىڭ ەلىمىزدىڭ باتىس وڭىرىندە قايتا جاندانۋى دەپ ايتۋعا بولادى. ورالداعى ۇلتتىق سپورت مەكتەبى جانىنان قۇسبەگىلىك ءبولىمى اشىلادى دەپ سەنەمىز,-دەدى قازاقستان رەسپۋبليكاسى ۇلتتىق سپورت تۇرلەرى قاۋىمداستىعىنىڭ ءى ۆيتسە-پرەزيدەنتى ەرلەن وسپانوۆ.
- زاڭ بويىنشا اقپاننىڭ 15-سىنەن كەيىن اڭ اۋلاۋعا تىيىم سالىنادى. سوندىقتان ءبىز بۇل سايىستا قىران قۇستاردى اڭعا سالمايمىز, قۇسبەگىلەر قۇستى قولعا شاقىرۋ, ۇشىرۋ, شىرعا سالۋدان سىنعا تۇسەدى. - دەيدى ۇلتتىق سپورت تۇرلەرىنەن مەملەكەتتىك جاتتىقتىرۋشى رامازان ساتتىباەۆ.
سايىستىڭ العاشقى كۇنى تاڭەرتەڭ اۋا تەمپەراتۋراسى 20 گرادۋستان تومەن بولدى. بىراق كۇننىڭ سالقىندىعىنا قاراماستان ولكەدە تۇڭعىش رەت ءوتىپ جاتقان ەرەكشە مەرەكەنى تاماشالاۋعا حالىق كوپ جينالدى. ايتا كەتۋ كەرەك, ۇيىمداستىرۋشىلار بارىن سالعان: جەلتاۋدىڭ باسىندا بىرنەشە كيىز ءۇي تىگىلگەن, ىستىق تاماق ۇسىنعان ساۋدا ورىندارى قىزمەت كورسەتىپ جاتىر, كەلۋشىلەردىڭ كولىگىن قوياتىن اۆتوتۇراق دايىندالىپ, جپق قىزمەتكەرىنىڭ ءجىتى باقىلاۋىمەن قاۋىپسىزدىك قامتاماسىز ەتىلگەن. توتەنشەلىكتەر ارنايى شاتىر تىگىپ, ىشىنە جىلۋ جۇرگىزىپ قويىپتى. سۋىقتان توڭعان بالالار مەن ۇلكەندەر شاتىرعا كىرىپ, جىلىنىپ الادى. باتىس قازاقستان وبلىستىق تاريحي-ولكەتانۋ مۋزەيى دە ارنايى كيىز ءۇي تىگىپ, مۋزەي قورىنداعى قازاقى ساياتشىلىققا قاتىستى 30-دان اسا جادىگەردى كوپشىلىك نازارىنا ۇسىنعان. عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ جانىنان قۇرىلعان «ورال سازى» ءانسامبلى دە شارانىڭ سالتاناتتى اشىلۋىنا وراي ساحناعا شىعىپ, ساۋساقتان جان كەتىرگەن سۋىققا قاراماستان ونەر كورسەتتى. ورال قالاسى شەتىندەگى «مەدكوللەدج» ايالداماسىنان جەلتاۋ بيىگىنە دەيىن اۆتوبۋس تاسىمالىن تەگىن ۇيىمداستىرعان قالالىق جولاۋشىلار تاسىمالى قىزمەتىنە دە ەل-جۇرت العىس ايتىپ جاتىر.
جالپى, بۇل شارانى نەگىزگى ۇيىمداستىرۋشى – باتىس قازاقستان وبلىستىق سپورت باسقارماسى بولعانىمەن, وڭىردەگى تۋريزم جانە سىرتقى بايلانىستار باسقارماسى, «اتامەكەن» ۇلتتىق كاسىپكەرلەر پالاتاسىنىڭ وڭىرلىك فيليالى, قوعامدىق ۇيىمدار مەن جەكەلەگەن بەلسەندى ازاماتتار قۇسبەگىلەر سايىسىنىڭ جالپىحالىقتىڭ مەرەكەگە اينالۋىنا كوپ ۇلەس قوستى. جان-جاقتى جارناما مەن ناسيحاتتىڭ ناتيجەسىندە بۇل شارانى كورۋ ءۇشىن رەسەي فەدەراتسياسىنىڭ استراحان, ساراتوۆ, سامارا, ورىنبور وڭىرلەرىنەن, قازاقستاننىڭ وزگە وبلىستارىنان ارنايى تۋريستەر كەلگەن.
- ۇيىمداستىرۋ كوميتەتىنە حابارلاسىپ, ورالداعى «قانسونار-2018» ءتۋرنيرىن تاماشالاۋعا تىلەك بىلدىرگەن تۋريستەرگە بارىنشا قولداۋ كورسەتتىك. ولار «ەۆرازيا» تۋريزم ورتالىعىنا ورنالاستى, ورال قالاسىنىڭ تاريحىمەن تانىستىراتىن ەكسكۋرتسيالار ۇيىمداستىرىلدى. جارىس قوناقتارى مەن تۋريستەر العاشقى كۇنى ورالداعى بەلگىلى كۇيشى ءارى دومبىرا شەبەرى, رەسپۋبليكالىق «التىن دومبىرا» بايقاۋىنىڭ بىرنەشە مارتە جۇلدەگەرى ەدىگە نابيەۆتىڭ شەبەرحاناسىندا بولىپ, قازاقتىڭ ۇلتتىق اسپابىن جاساۋ ونەرىنىڭ قىر-سىرىن تاماشالاسا, كەلەسى كۇنى بەلگىلى ءورىمشى-شەبەر ۇلان سايتمۇحاەۆتان قامشى ءورۋ ءداستۇرى تۋرالى ءدارىس تىڭدادى, - دەيدى وسى شارانى ۇيىمداستىرۋشىلاردىڭ ءبىرى, «عىلىمي زەرتتەۋلەردى قولداۋ قورىنىڭ» ديرەكتورى ايبولات قۇرىمباەۆ.
24 اقپان كۇنى قۇسبەگىلەر ىرىكتەۋ كەزەڭىنەن ءوتتى. ەرتەڭ رەسپۋبليكالىق سايىستىڭ اقتىق باسەكە-فينالى وتەدى. ايتا كەتەيىك, «قانسونار-2018» رەسپۋبليكالىق قۇسبەگىلەر ءتۋرنيرىنىڭ 200 مىڭ تەڭگەلىك باس جۇلدەسىن ورالدىق كاسىپكەر-مەتسەنات, «سايات» ەتنو-تۋريستىك ورتالىعىنىڭ قۇرىلتايشىسى مۇرات جاكىباەۆ تىككەن.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
سۋرەتتى تۇسىرگەن تەمىربولات توقمامبەتوۆ
