دارىگەرلەردىڭ ىشىنەن ءانشىسىن, ءبيشىسىن, سپورتشىسىن كەزدەستىرۋگە بولادى. ال ءمۇسىن جاساۋمەن اينالىساتىندارى ىلۋدە بىرەۋ شىعار. دارىگەر ەرجان قازي قولى قالت ەتسە, بەلگىلى تۇلعالاردىڭ كەۋدە مۇسىندەرىن كەيىپتەۋمەن اينالىسادى. كۇرشىم اۋدانىندا تۋعان ول كىشكەنتايىنان بەينەلەۋگە بەيىم بولدى. اكەسى ومارتا ۇستاعاننان كەيىن بە, بالاۋىزدان ءتۇرلى-ءتۇرلى فيگۋرالار جاساپ, تۋعان-تۋىستارىنا سىيعا تارتاتىن. مەكتەپتى تامامداعان سوڭ, كاسىبي ءمۇسىنشى بولۋدى دا ارمانداعان. الايدا اعا-اپكەلەرىنىڭ ىزىمەن استاناداعى مەديتسينالىق ۋنيۆەرسيتەتكە وقۋعا تۇسەدى. وقىپ جۇرگەن كەزىندە قالادا بوي كوتەرىپ جاتقان كەيبىر ەسكەرتكىشتەردىڭ جاسالۋىنا كۋا بولعان. كاسىبي مۇسىنشىلەردىڭ شەبەرحانالارىنا بارىپ, مۇسىندەۋدىڭ قىر-سىرىمەن تانىسقان. بىراق ارنايى العان ءبىلىمى جوق. تۋما تالانت.
بۇگىندە ول وسكەمەندەگى وبلىستىق «انا مەن بالا» اۋرۋحاناسىندا رەنتگەنولوگ. ايتەۋىر, ونەرىنە قىزمەتىنىڭ ەش كەدەرگىسى جوق. جۇدىرىقتاي مۇسىندەردى جۇمىس ورنىندا وتىرىپ-اق جاساي بەرەدى. ەرجاننىڭ كوللەكتسياسىندا انيماليستىك جانردا جاساعان مۇسىندەر دە جەتەرلىك. اسىرەسە «بۇركىت پەن قاسقىردىڭ ارپالىسى» اتتى كومپوزيتسياسىنداعى ەكى جاقتىڭ جان الىسىپ, جان بەرىسۋ ءساتى وتە تاماشا شىققان. بۇركىتتىڭ توبەدەن قاھارلانا ءتونىپ كەلە جاتقانىن, قاسقىردىڭ جالت بۇرىلىپ, ازۋىن ىرسيتا اشىپ قورعانۋىن ءار بولشەگىنە دەيىن ءمان بەرىپ جاساعان.
«الداعى ۋاقىتتا ءاليحان بوكەيحان, مىرجاقىپ دۋلاتوۆ, احمەت بايتۇرسىنوۆتىڭ مۇسىندەرىن جاساۋدا ەرمەكسازبەن شەكتەلمەي, قولادان قۇيىپ شىقسام دەگەن وي بار», دەيدى ءمۇسىنشى دارىگەر ەرجان قازي.
قولادان قۇيۋ ءبىر كۇندىك جۇمىس ەمەس. ول ءۇشىن سيليكوننان قالىپ جاساۋ قاجەت. ال سيليكون ماتەريال وسكەمەندە تاپشى كورىنەدى. تابىلعاننىڭ وزىندە ارزان ەمەس. شىققان شىعىندى اقتاۋ ءۇشىن جاسالعان دۇنيە باعالانىپ, كورمەلەردە ساتىلىمعا شىعارىلۋى كەرەك. ال ءمۇسىن ساتىپ, پايدا تابۋدى كوزدەپ جۇرگەن ەرجان ەمەس.
مەرەي قاينار ۇلى
وسكەمەن
