جارىس جولىنا استانا, پەتروپاۆل, قاراعاندى, پاۆلودار, كوكشەتاۋ جانە الماتى وڭىرلەرىنەن كەلگەن 32 كوماندا شىقتى. وكىنىشكە قاراي رەسەيلىك ەكيپاج تەحنيكالىق سەبەپتەرگە بايلانىستى اتالعان دوداعا تۇسە المادى. اتالعان سپورتتىق شارانىڭ وتۋىنە راميل نابيۋلين جەتەكشىلىك ەتەتىن «كوكشەتاۋ اۆتوسپورتى» قوعامداستىعى مۇرىندىق بولدى. ءنابيۋليننىڭ سوزىنە قاراعاندا, مۇنداي شارانى وتكىزۋگە اقمولا دەنەشىنىقتىرۋ جانە سپورت باسقارماسى مەن وسىنداعى «زاپچاستي №1» سەرۆيستىك بازاسى بەلسەندى قولداۋ كورسەتىپتى.
تەمىر تۇلپار ءمىنىپ, جەلمەن جارىسىپ جۇرتتىڭ دەلەبەسىن قوزدىرۋ ەكىنىڭ ءبىرىنىڭ قولىنان كەلە بەرمەس شارۋا. اسىرەسە قار مەن مۇزدىڭ ۇستىندە اۆتوكولىك جۇرگىزۋدىڭ وزىندىك ماشاقاتتارى تاعى بار. ماسەلەن, كۇردەلى سانالاتىن 60 شاقىرىمدىق قاشىقتىقتى باعىندىرۋ تەحنيكانى عانا ەمەس, سونىمەن بىرگە رۋلدە وتىرعان جۇرگىزۋشىنىڭ دە تەمىردەي مىنەزىنە سالماق سالاتىنى ايتپاسا دا تۇسىنىكتى. وسى تۇرعىدان كەلگەندە ءاربىر ەكيپاج كاسىبي ساپالىق دەڭگەيىن دالەلدەپ, مىقتىلىق پەن جەڭىسكە دەگەن قۇلشىنىسىن كورسەتە ءبىلدى. ناتيجەسىندە, استانانىڭ «پەگاس» كومانداسى ءبىرىنشى ورىنعا يە بولدى. ەكىنشى ورىنعا «كوكشەتاۋ WINKOD» كومانداسى قول جەتكىزسە, ءۇشىنشى ورىندى پاۆلودارلىقتار يەلەندى.
اسقار تۇراپباي ۇلى,
«ەگەمەن قازاقستان»
اقمولا وبلىسى
