اكتسيانىڭ تۇساۋى اقىن ەسىمىمەن ۇلىقتالاتىن گۋمانيتارلىق كوللەدج جانىنداعى جالپى ءبىلىم بەرەتىن مەكتەپ-ليتسەيدە كەسىلدى. «رۋحاني جاڭعىرۋ» باعدارلاماسى شەڭبەرىندە وتكەن باسقوسۋعا مۇعالىمدەردىڭ بىلىكتىلىگىن ارتتىرۋ ينستيتۋتى فيليالىنان, جۇماباەۆ اۋدانىنان وكىلدەر, ستۋدەنت-جاستار قاتىسىپ, شايىردىڭ ءومىرى مەن شىعارماشىلىعىنىڭ بەيمالىم سىرلارى اڭگىمەلەندى. مەكتەپ-ليتسەي ۇجىمى «ارىستانداي ايباتتى, جولبارىستاي قايراتتى» ءىزباسارلار دايىنداۋ جولىندا قالىپتاسقان تاجىريبەلەرىن ورتاعا سالدى. جۇمىس ىستەپ كەلە جاتقاننان بەرى 15 تۇلەك «التىن بەلگىگە» يە بولعان. رەسپۋبليكادا «100 ۇزدىك مەكتەپ» قاتارىنا ەنگەن.
مەرەيتوي قارساڭىندا كەڭ قانات جايعان ءىس-شارالارعا شال اقىن, جامبىل, ەسىل, تيميريازەۆ, قىزىلجار اۋداندارى قىزۋ ءۇن قوسسا, ەندى, مىنە, «اقىن جۇرگەن جەرلەرمەن» اكتسياسى ءوز ساپارىن تۋعان جەرىنەن باستايتىن بولادى. ودان ءارى ەستافەتا اۋداندارعا كەزەكتەسىپ جالعاسىپ وتىرادى. اكتسياعا قاتىسۋشىلار «جىر قورجىنى» كىتابىن وزەرىمەن بىرگە الىپ جۇرەدى. وندا جاس اقىنداردىڭ ارناۋ جىلدارىمەن قوسا تۇرعىنداردىڭ ىزگى تىلەك-وتىنىشتەرى دە توپتاستىرىلادى. م.جۇماباەۆ اۋداندىق ءبىلىم ءبولىمىنىڭ جەتەكشىسى رىسجان نۇرعاليەۆانىڭ ايتۋىنشا, 45 مەكتەپتە ءبىلىم الاتىن 3700-گە جۋىق شاكىرت اراسىندا ماعجاننىڭ جىرلارىن بىلمەيتىندەر كەمدە-كەم. جاس بۋىندى وتانسۇيگىشتىككە تاربيەلەۋدە جولىنداعى ماڭىزى ايرىقشا.
«ماعجان جۇرگەن جەرلەرمەن» ەستافەتاسى اقىننىڭ تۋعان كۇنى قارساڭىندا قورىتىندىلانىپ, كەڭ اۋقىمدى ءىس-شاراعا ۇلاسادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
