ۇكىمەتتە وتكەن ءباسپاسوز ءماسليحاتىندا ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى بەيبىت شاحانوۆ, «تكش قازورتالىعى» اق باسقارما توراعاسى نۇرسۇلتان جيەنباەۆ قاتىسىپ, مەملەكەت باسشىسىنىڭ بيىلعى جولداۋىنىڭ بەسىنشى باعىتىن ىسكە اسىرۋ بويىنشا اتقارىلىپ جاتقان جۇمىستار جايىن ايتىپ بەردى.
بەيبىت شاحانوۆ اتاپ وتكەندەي, ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا قۇرىلىستىڭ جاڭا ادىستەرىن جانە جوبالاۋدىڭ باسقا دا تاسىلدەرىن قولدانۋ قاراستىرىلعان. وسىعان وراي قازىرگى تاڭدا ەلىمىزدە قۇرىلىس سالاسىنا ەۋروكودتاردى ەنگىزۋ جانە نورماتيۆتىك بازانى جەتىلدىرۋ كەزەڭى اياقتالىپ قالدى, بۇل شەتەلدىك ينۆەستورلار ءۇشىن كەدەرگىنى الىپ تاستاۋعا مۇمكىندىك بەرەدى.
ب.شاحانوۆ بۇدان ءارى «نۇرلى جەر» تۇرعىن ءۇي قۇرىلىسى باعدارلاماسىنىڭ جۇزەگە اسىرىلۋى تۋرالى دا ايتىپ بەردى. ماسەلەن باعدارلاما ىسكە قوسىلعالى بەرى 11,2 ملن شارشى مەتر تۇرعىن ءۇي پايدالانۋعا بەرىلىپ, 100,8 مىڭنان استام وتباسى وزدەرىنىڭ تۇرعىن ءۇي جاعدايلارىن جاقسارتۋ مۇمكىندىگىنە يە بولعان.
ال «تكش قازورتالىعى» اق باسقارما توراعاسى ن.جيەنباەۆ ءوز كەزەگىندە تۇرعىن ءۇي-كوممۋنالدىق ينفراقۇرىلىمدى جاڭعىرتۋدا مەملەكەت-جەكەمەنشىك ارىپتەستىگى قاعيداسىن دامىتۋ تۋرالى ايتتى. ەلباسى جولداۋىندا بۇل ماسەلە بويىنشا, ياعني مەملەكەت-جەكەمەنشىك ارىپتەستىگى نەگىزىندە تۇرعىن ءۇي-كوممۋنالدىق ينفراقۇرىلىمدى جاڭعىرتۋ جونىندە مىندەت قويعان بولاتىن. ن.جيەنباەۆتىڭ ايتۋىنشا, قۇرىلىس جانە تكش ىستەرى كوميتەتى «تكش قازورتالىعى» اق-پەن بىرگە قازاقستاننىڭ ينفراقۇرىلىمدىق-تۇرعىن ءۇي كەشەنىنە ءمجا ەنگىزۋ بويىنشا جۇمىستى جانداندىردى. بارلىق وڭىرلەردەن ءمجا قاناتقاقتى جوبالارىنىڭ ءتىزىمى جاسالدى. ولاردىڭ ىشىندە الماتى وبلىسى قاپشاعاي قالاسى تازارتقىش قۇرىلىمداردى جوندەۋ جانە سالۋ, ماڭعىستاۋ وبلىسى, قۇرىق اۋىلىندا تۇششىتقىش زاۋىت قۇرىلىسى, استانا قالاسىنىڭ كارىز-تازارتقىش قۇرىلىمدارىن سالۋ جانە «قىزىلوردا سۋ جۇيەسى» مەملەكەتتىك-كوممۋنالدىق كاسىپورنىن سەنىمدى باسقارۋعا بەرۋ بار. سەكتوردا كوممەرتسيالاندىرۋ ۇدەرىسى تولىق قارقىنمەن ءجۇرىپ جاتىر.
دينارا بىتىك,
ەگەمەن قازاقستان
