1-تايم
وتكەن ويىنمەن سالىستىرعاندا «استانا» مەن «سپورتينگ» ەكەۋى دە بىرنەشە فۋتبولشىلاردى اۋىستىرىپتى. ەلوردالىق كلۋب ساپىندا بۇل جولى ورتالىق قورعاۋشى قىزمەتىندە ەۆگەني پوستنيكوۆ بولدى. استاناداعى ويىندا يۋري لوگۆينەنكو قىزىل قاعاز الىپ كەتكەنى ەستەرىڭىزدە شىعار. ال قالعان ويىنشىلار سو كۇيى ءوز ورىندارىنا جايعاسقان. «سپورتينگ» باپكەرى جورجە جەزۋشتا بىرنەشە وزگەرىس ەنگىزىپتى. اپتا بۇرىنعى ويىندا قورعاۋشىلارىمىزدىڭ, اسىرەسە شومكونىڭ زىعىردانىن قايناتقان جەلسون مارتينش بۇل جولى مۇلدە تىزىمگە ىلىنبەدى. ورتالىق شابۋىلشى رولىندە سەيدۋ دۋمبيا ەمەس, جاراقاتىنان ايىققان باس دوست شىقتى. نيدەرلانديا قۇراماسىنىڭ گابۋىلشىسى شىعا سالىسىمەن جىلدام گول سوعىپ, سالىمىزدى سۋعا كەتىردى. ودان بولەك جەرەمي ماتە مەن ستەفان ريستوۆسكيلەر دە نەگىزگى قۇرامنان ورىن الىپتى. بۇل پورتۋگال كومانداسىنىڭ العاشقى ويىننان كەيىنگى ناتيجەگە ارقا سۇيەگەندىگى دەپ تۇسىندىك. ارينە, ءبىرىنشى ويىنداعى ەسەپ ەكىنشى كەزدەسۋگە دە لەبىن سەزدىرىپ تۇردى. «جوزە الۆالادەدەگى» ويىننىڭ العاشقى مينۋتتارىندا مارين توماسوۆتىڭ بەلسەندىلىگى ەرەك كورىندى. سول قاپتال ارقىلى قايتا-قايتا جۇلقىپ ءوتىپ, ايىپ الاڭىنا ءتۇرلى-ءتۇرلى پاستار بەرۋمەن اينالىستى.
ءبىرىنشى تايم اياقتالار تۇستا دجوردجە دەسپوتوۆيچ دوپتى قاقپا باعانىنا ءدال تەۋىپ, دجۋنيور كابانانگانىڭ جوقتىعىن سەزدىرتىپ قويدى. الايدا سول شابۋىلدىڭ سوڭى ءتۇبى سوعىلعان گولعا الىپ كەلدى. مارين توماسوۆ اۋەلەگەن دوپتى توقتاتپاستان رۋي پاتريسيۋ قاقپاسىنا سۇڭگىتىپ جىبەردى. ەسەپ 1:1.
2-تايم
ەكىنشى تايم باسىندا رۋبەن ريبەيرۋدىڭ ورنىنا ماركوس اكۋنيا شىقتى. شاماسى باس باپكەر جەزۋش شابۋىل وتىندەگى ويىنعا كوڭىلى تولماسا كەرەك. سونىڭ ناتيجەسىندە برۋنو فەرناندەس الىستان ايانباي تەۋىپ الاڭ يەلەرىن العا شىعاردى. ودان كەيىن ءدال سول فەرناندەس قاقپاشىمەن بەتپە-بەت شىعىپ, ماتچ ەسەبىن استاناداعىداي ەتتى. بىراق, بۇل ەسەپ ۇزاق ساقتالا قويعان جوق. سول باياعى بەلەندى مارين توماسوۆ ايىپ الاڭىنا كىرىپ سوققى باعىتتاپ, ول قورعاۋشىنىڭ بىرىنە ءتيىپ پاتريك ءتۆۋماسيدىڭ اياعىنا جاتا قالدى. ويىن بويى كوزگە تۇسپەگەن پاتريك ەسەپ ايىرماسىن قىسقارتتى. ال تورەشى قوسقان 3 مينۋتتا ەكى بۇرىشتاما بەرىپ ۇلگەردىك. سونىڭ ەكىنشىسىندە دميتري شومكو الىستان جويقىن سوققى جاساپ, تارازى باسىن تەڭەستىردى.
«جوزە الۆالادە» ستاديونى ەلوردالىق كوماندانىڭ ونەرىنە ءدان ريزا بولىسىپ, دوستىقتىڭ جالاۋىن كوتەردى. دەگەنمەن, جانكۇيەرلەر مەن جەرگىلىكتى فۋتبول ماماندارىنىڭ كوڭىل-كۇيلەرى سونشالىقتى ءماز ەمەس ەكەنىن بايقادىق. البەتتە, "سپورتينگ" سەكىلدى مىقتى ۇىم قالايشا "استانامەن" ءوز الاڭىندا تەڭ تۇسەدى؟ ولار ءۇشىن بۇل قيىن جاعداي. الاڭداۋعا تۇرارلىق جايت.
ەرمۇحامەد ماۋلەن
