– ءبىز ءۇشىن دە, جاس قازاقستان مەملەكەتى ءۇشىن دە ول جىلدار سانادان وشپەستەي ءىز قالدىرعان, ەش ۇمىتىلماس تاريحي كەزەڭدەر بولىپ سانالادى. ءالى ەسىمدە, شاعىن عانا وفيستە مەنىڭ ءبىر كومەكشىم جانە بارلىعىن قوسقاندا 5-اق ادام وتىرۋشى ەدىك, – دەگەن نايدجەل رينگروۋز تاۋەلسىزدىك شاپاعىمەن نۇرلانعان قازاق حالقىنىڭ قۋانىشىن كورە ءجۇرىپ, بىرگە قۋانىپ, قۋاتتاي وتىرىپ, وزدەرىنىڭ دە قاجىرلى ىستەر اتقارعانىن ايتىپ بەردى. – ويتكەنى ءبىزدىڭ بۇۇ تالاپتارىنا سايكەس العا قويعان ماقساتىمىز زور بولدى. قازاقستان ۇكىمەتى ءبىزدى جاتسىنباي, كومەك قولىن سوزدى. ەڭ الدىمەن ءبىزدى قولداپ الماتىعا يۋنيسەف ۇيىمى كەلدى. سودان سوڭ الەمدىك بانك ءوز فيليالىن اشتى. بۇگىنگى قازاقستان ءدال سول ءبىر جىلدارداعى كەزدەسكەن العاشقى قيىندىقتاردى مۇلدەم باسىنان وتكەرمەگەندەي, ءتىپتى, اينالىپ وتكەندەي كورىنەدى ماعان. بۇگىن ءبىز وسىندا قازاقستان پرەزيدەنتى نۇرسۇلتان نازارباەۆتىڭ ءاربىر قادامىن ەرەكشە اتاپ, جەمىستى بولاشاقتى كوزدەگەنىنىڭ بىردەن-ءبىر كۋاسى بولىپ وتىرمىز.
ول كەزدەگى الماتىداعى بىردەن-ءبىر كورىكتى عيمارات «قازاقستان» قوناقۇيى بولعانى دا اقيقات. قازاقستانداعى ەڭ بيىك مەيمانحانادا اشىلعان بۇۇ ءوفيسىنىڭ قىزمەتى مەن ەلمەن ىنتىماقتاستىق جولىنداعى يگىلىكتى ءىسى سول كەزەڭنەن باستاپ توقتاۋسىز جالعاستى. بۇگىنگى 25 جىلدىققا وراي وتكەن سالتاناتتى جيىننىڭ «قازاقستان – بۇۇ: تاجىريبە, جەتىستىكتەر مەن ىنتىماقتاستىقتىڭ كەلەشەگى» اتالۋى دا سوندىقتان. سالتاناتتى جيىنعا ارنايى قاتىسقان قازاقستان سىرتقى ىستەر ءمينيسترى قايرات ءابدىراحمانوۆ بىرىككەن ۇلتتار ۇيىمىنا قوسىلعان كەزدەن باستاپ قازاقستان ۇيىمنىڭ بەلسەندى مۇشەسى ءارى سەنىمدى سەرىگى بولعانىن اتاپ ءوتتى.
– بۇۇ ورگاندارى مەن باعدارلامالارى قازاقستاننىڭ الەۋمەتتىك-ەكونوميكالىق دامۋىنا ەلەۋلى ۇلەس قوسىپ, بۇل ءداستۇردى كۇنى بۇگىن ودان ءارى جالعاستىرۋدا. سونىمەن بىرگە بۇۇ ءبىزدىڭ ەلىمىزگە بۇرىنعى سەمەي يادرولىق پوليگونىن ساۋىقتىرۋ, ارال تەڭىزىن قالپىنا كەلتىرۋ سەكىلدى ماڭىزدى جوبالار اياسىندا تەحنيكالىق جانە قارجىلىق كومەك كورسەتتى, – دەدى مينيستر.
قازاقستاندا بۇۇ-نىڭ العاشقى ءوفيسى اشىلۋىنىڭ 25 جىلدىعىمەن قۇتتىقتاۋشىلار تاۋەلسىزدىك بەسىگى اتانعان الماتى قالاسىنىڭ بۇگىندە ايرىقشا مارتەبەگە قول جەتكىزگەنى تۋرالى ايتىپ ءوتۋدى دە ۇمىتپادى. وتكەن جىلى الماتىنىڭ 1000 جىلدىعى يۋنەسكو-نىڭ ايتۋلى وقيعالار كۇنتىزبەسىنە ەندى, مەگاپوليس وسى ۇيىمنىڭ كرەاتيۆتى قالالار جۇيەسىنە قوسىلدى.
قۇتتىقتاۋشىلار لەبىزىن جالعاعان الماتى قالاسىنىڭ اكىمى باۋىرجان بايبەك ءوز سوزىندە ەىدۇ ستاندارتتارىنا ساي شاھاردا «الماتى-2020» دامۋ باعدارلاماسىنىڭ بەلسەندى تۇردە قولعا الىنعانىن, سونىمەن قاتار باتىستىق ستاندارت بويىنشا اشىق, جايلى ءارى قولايلى كەڭىستىك قالىپتاستىرۋ بارىسىندا جۇيەلى وڭ وزگەرىستەردىڭ ءجۇرىپ جاتقانىن اتاپ ءوتتى.
– بيزنەستى جەڭىل جۇرگىزۋ مەن ينۆەستيتسيا تارتۋ ءۇشىن قالامىزدا بارلىق جاعدايلار جاسالۋدا. بۇۇ-نىڭ دامۋ باعدارلاماسىمەن بىرگە «تۇراقتى كولىك» جوباسى الماتىدا ويداعىداي جۇزەگە اسۋدا, بۇگىنگى الماتىدا ەلىمىزدەگى بىرىككەن كاسىپورىنداردىڭ 40 پايىزى جۇمىس ىستەيدى جانە حالىقارالىق ۇيىمدار مەن ترانسۇلتتىق كومپانيالاردىڭ 60-تان استام ءوفيسى اشىلعان. ۇيىمنىڭ قازاقستانداعى قىزمەتىنىڭ 25 جىلدىعى بارىسىندا بۇۇ-نىڭ وڭىرلىك حابىن كۇزدە اشۋدىڭ جوسپارلانۋى قازاقستانمەن سەرىكتەستىكتىڭ جاڭا تاريحي جەڭىسى بولاتىندىعى ءسوزسىز, – دەدى قالا اكىمى.
ايتۋلى شاراعا قازاقستان بۇۇ جانىنداعى العاشقى تۇراقتى وكىلى, بۇرىنعى قازاقستان سىرتقى ىستەر ءمينيسترى, ارنايى ماقساتتاعى ەلشى, پروفەسسور اقمارال ارىستانبەكوۆا قاتىسىپ ءسوز سويلەدى. «قازاقستان بۇۇ-مەن ىنتىماقتاستىقتا جوعارى دەڭگەيگە قول جەتكىزدى. پرەزيدەنت نۇرسۇلتان نازارباەۆتىڭ انتيتەررورلىق كواليتسيا قۇرۋ باستاماسى الەم ءۇشىن وتە ماڭىزدى, ويتكەنى قازاقستاندا تەرروريزمگە ورىن جوق. قازاقستاننىڭ قارۋسىزدانۋ جانە يادرولىق قارۋدى تاراتپاۋ جونىندەگى الەمدەگى ءرولى وتە جوعارى. بەيبىتشىلىكتى قالايتىن بارلىق الەم جۇرتشىلىعى ءۇشىن ماڭىزدىسى – قازاقستاننىڭ وسىناۋ بەيبىت قادامى», دەدى اقمارال ارىستانبەكوۆا.
سالتاناتتى جيىنعا بۇۇ-نىڭ ورتالىق ازيا بويىنشا باس حاتشىسىنىڭ ارنايى وكىلى ناتاليا گەرمان, بۇۇ-نىڭ ۇيلەستىرۋشى-رەزيدەنتى نوريماسا شيمومۋرا, بۇۇ-نىڭ وكىلدەرى, الماتىداعى قحر, اقش, رەسەي جانە فرانتسيا ەلدەرىنىڭ كونسۋلدارى, قوعامدىق ۇيىمداردىڭ بەلسەندىلەرى, ستۋدەنتتەر قاتىستى.
تالعات ءسۇيىنباي,
«ەگەمەن قازاقستان»
الماتى
