«بىرىڭعاي ساتىپ الۋشىنىڭ مودەلىن ەنگىزۋ مەن وڭىرلىك ەلەكتر جەلىلىك كومپانيالاردى ىرىلەندىرۋ جوسپارلانۋدا. ەنەرگەتيكا ءمينيسترى بۇل شارالار جاقسى ناتيجە بەرەتىنىن, تۇتىنۋشى ءۇشىن ەلەكتر ەنەرگياسى قۇنىن تومەندەتەتىنىن بايانداعان بولاتىن. الايدا بۇعان قول جەتكەن جوق», - دەدى پرەزيدەنت ەنەرگەتيكا ءمينيسترى قانات بوزىمباەۆقا ايتقان سوزىندە.
ءوز كەزەگىندە مينيستر ەنەرگيا قۋاتى نارىعىندا بىرىڭعاي ساتىپ الۋشى انىقتالعانىن اتاپ ءوتتى. 2019 جىلدىڭ 1 قاڭتارىنان نارىقتى ىسكە قوسۋ ءۇشىن 2017 جىلى قاجەتتى جۇمىستار دايارلاندى. «بىرىڭعاي ساتىپ الۋشى رەتىندە «كەگوك» اق-نىڭ ەسەپتەۋ-قارجىلىق ورتالىعى ايقىندالدى. بيىل بارشا ەلىمىز بويىنشا ەكى جاتتىعۋ شارالارىن وتكىزبەكپىز, ياعني ناقتى ۋاقىت رەجىمىندە قۋات نارىعىنىڭ جۇمىسىن باعالايمىز»,- دەپ ءتۇسىندىردى بوزىمباەۆ.
سونىمەن قاتار ۆەدومستۆو باسشىسى ەنەرگيا تاراتاتىن ۇيىمداردى ىرىلەندىرۋ تەتىگى دە انىقتالعانىن جەتكىزدى. «2018 جىلى ەنەرگيا بەرەتىن ۇيىمداردا ديسپەتچەرلىك باسقارۋ بەكەتى بولۋى ءتيىس. وسى ورايدا ءبىز ونىڭ بارلىعىن تەكسەرىپ شىعامىز. ال وسىنداي بەكەتتەرى جوق كومپانيالاردى جابامىز. (...) بىلىكتىلىك تالاپتارىن ورىندامايتىن ۇيىمدارعا شارالار قابىلدانادى. سونىمەن قاتار ءتاريفتى ازايتۋعا قاراي قايتا قاراستىرۋ شارالارى ەسكەرىلگەن. وسى ارقىلى, ولار وزگە وڭىرلىك ەلەكتر جەلىلىك كومپانيالارمەن ىرىلەنۋى ءۇشىن ىنتالاندىرۋ بولادى», - دەپ ءتۇسىندىردى مينيستر.
ونىڭ سوزىنە قاراعاندا, ناتيجەسىندە, ەنەرگيا تاراتاتىن ۇيىمدار 30 پايىزعا قىسقارادى, ياعني 160-تان 110-عا دەيىن. بۇل ءوز كەزەگىندە اتالعان ۇيىمداردىڭ شىعىندارىن وڭتايلاندىرۋعا مۇمكىندىك بەرەدى. ءبىرىنشى كەزەكتە, ءتۇرلى باسشىلار, كونتروللەرلەر ازايادى. «بىراق تا بۇل جۇمىستار ءتيىستى ۋاقىتتى قاجەت ەتەدى. 2017 جىلى ءۇش ەنەرگيا تاراتاتىن كاسىپورىن جۇمىسىن توقتاتتى, 2018 جىلى 27 كومپانيا ءوزىنىڭ قىزمەتىن دوعارادى», - دەپ ناقتىلادى مينيستر.
قانات بوزىمباەۆتىڭ بايانداماسىنان كەيىن پرەزيدەنت نۇرسۇلتان نازارباەۆ ءتيىستى تاپسىرمانى جۇكتەدى. «سالاداعى جاعدايدى ەگجەي-تەگجەيلى بايانداپ بەردىڭ, الايدا اتالعان جۇمىستىڭ ناتيجەسىندە وڭىرلەر اراسىندا تاريفتەر ايىرماشىلىعى ىڭعايلانۋى كەرەك. سونىمەن قاتار تۇتىنۋشىلار ءۇشىن ەلەكتر ەنەرگياسىسىنىڭ قۇنى تومەندەۋى قاجەت», - دەپ ءتۇيدى مەملەكەت باسشىسى.
