راشيد قۇلباتىروۆ – سۋرەت ونەرىندە وزگەلەرگە ۇقسامايتىن, وزىنە عانا ءتان ادەمى يىرىمدەرىمەن ەرەكشەلەنەتىن دارىن يەسى. ونەردەگى ارىپتەستەرى ونى «تابيعات لاندشافتارى مەن قالا انسامبلدەرىنىڭ جىرشىسى» دەپ بەكەر ايتپاسا كەرەك. قىلقالامىن اسا شەبەرلىكپەن جەڭىل تارتاتىن ونىڭ كەنەبىنەن قازاقستان مەن ەۋروپانىڭ ۇلكەندى-كىشىلى قالالارىنىڭ پانورامالارىن, قازاق دالاسىنىڭ شەتسىز دە شەكسىز جازيراسىن, ىلە الاتاۋىنداعى جوتالاردىڭ بيىك شىڭدارىن, كاسپي تەڭىزىنىڭ اسەم كورىنىسىن, كوشپەندىلەردىڭ ءداستۇرلى اۋىلدارىنىڭ تۇرمىستىق كومپوزيتسيالارىن كوپتەپ كەزدەستىرۋگە بولادى. سۋرەتشىنىڭ كارتينالارى كانادا, امەريكا, گەرمانيا, فرانتسيا, تۇركيا, گرەكيا جانە چەحيادا جەكە كوللەكتسيالاردا ساقتاۋلى.
«شابىت» اۆتوردىڭ اۋقىمدى جەكە كورمەسىنىڭ عانا ەمەس, ونىڭ شىعارماشىلىعىن بىرىكتىرەتىن تۇجىرىمدامانىڭ دا اتاۋى ىسپەتتى. قۇلباتىروۆ شىعارماشىلىعىن قادىرلەۋشىلەر كەسكىندەمەشىنىڭ اكۆارەلدىڭ كۇردەلى ءارى تالعاۋلى تەحنيكاسىن اسا شەبەرلىكپەن مەڭگەرگەنىن ايتادى.
– سۋرەتشىنىڭ شىعارماشىلىعىندا قالا پەيزاجى جانرىنىڭ الار ورنى ۇلكەن. راشيد الماتىنىڭ جاڭا داڭعىلدارى مەن ەسكى كوشەلەرىن عانا سۋرەتتەپ قويمايدى. ونىڭ قالا پەيزاجدارى گالەرەياسىندا الماتىدان باسقا اقتاۋ, اتىراۋ, اقتوبە, ماڭعىستاۋ, ىستانبۇل, ريم, رۋان سياقتى قالالار مەن قالا ماڭىنىڭ جانە ءوزى ساياحاتتاپ بارعان جەرلەرىنىڭ كورىنىس-كەلبەتىن سۋرەتتەيتىن پەيزاجدارى دا بار. راشيد قۇلباتىروۆ جۇمىستارىن كوبىنەسە پلەنەرگە شىعىپ, تابيعات اياسىندا جازعاندى جانى سۇيەدى, سەبەبى بۇل – ونىڭ شىعارماشىلىعىنا دەم بەرەتىن قۋات كوزى. قالا مەن ونىڭ ماڭىن جازعاندا راشيد جورامالعا جول بەرمەيدى, ياعني دالالى جەر مەن تاۋلى جەردەگى اۋىلداردى, ولاردىڭ ءومىر تىرشىلىگىنىڭ ەرەكشەلىگىن قوسا بايانداعان كەزدە, شىعارماشىلىق پروتسەسكە تولىعىمەن بەرىلىپ, ەندىگى جەردە قىلقالامىمەن ەمەس, جانىمەن جازا باستايدى. ادام جۇرەگىنىڭ گەنەتيكالىق جادى بار دەسەدى. كوشپەندىلەر ۇرپاعىنىڭ بويىنداعى قان دالا ادامدارىنىڭ تىنىش ءارى ەمىن-ەركىن ءومىر ىرعاعىن راحاتتانا باياندايتىن كەسكىندەمەشىنىڭ شىعارماشىلىق ويىمەن بىرگە جىلجي اعادى, – دەيدى كورمە جەتەكشىسى وكسانا تانسكايا.
جوعارىدا ايتقان قالا پەيزاجدارى مەن دالا لاندشافتارى, كوشپەندىلەر تۇرمىسى مەن ادام تاعدىرى جايلى شاعىن بايانداۋلار ونىڭ الەمىندە مۇلدە بولەك قىرىنان كورىنىس تابادى. اشىق, قانىق تۇستەر كوكتەم مەن كۇزگە وزگەشە رەڭ بەرىپ كورەرمەندى وزىنە تارتا تۇسەدى. اقپان ايىنىڭ سوڭىنا دەيىن جالعاساتىن كورمەگە قويىلعان ءار شىعارما اۆتوردىڭ سۋرەت ونەرىنە دەگەن بيىك پايىمىن اڭعارتاتىنداي.
پايىممەن جازىلعان پەيزاجدار...
ارمان وكتيابر,
«ەگەمەن قازاقستان»
الماتى
