ماسەلەنىڭ ءمان-جايىن بىلمەك نيەتپەن جاڭااۋىل اۋىلدىق وكرۋگىنىڭ اكىمى داۋىتبەك نيازبەكوۆكە تەلەفون شالعانىمىزدا, ول وقيعانىڭ قىمىزباي قىستاعىندا ورىن العانىن, وندا ماقسات بايبازاروۆ ەسىمدى جىگىت اكەسى دالەلبەك بايبازاروۆپەن بىرگە مال باعىپ وتىرعانىن ايتتى. اڭگىمە بارىسىندا اۋىل اكىمى تارباعاتاي اۋدانىنىڭ قىتايمەن شەكارالاس ەلدى مەكەن تۇرعىندارىنا مىلتىقپەن ۇزاپ شىعۋعا تىيىم سالىنعاندىعىن, ءتۇز تاعىسىنىڭ قىستاۋلارعا ءجيى شابۋىلداپ, مالعا اۋىز سالۋىنىڭ ءبىر سەبەبى وسىندا جاتقاندىعىن, بۇل ماسەلە, اسىرەسە, بايلانىسى جوق, جول قاتىناسى ناشار شالعايداعى اۋىل تۇرعىندارىن الاڭداتىپ وتىرعانىن جەتكىزدى. «احمەتبۇلاق شەكاراعا جاقىن ورنالاسقاندىقتان, قىستاۋلارعا رۇقسات ارقىلى عانا شىعامىز. ول جاققا مىلتىقپەن وتكىزبەيدى. اڭشىلاردى جىبەرمەيدى. قىستاۋدا ءبىر-بىرىنەن الشاق ورنالاسقان 40-قا جۋىق قورا بار. قويشىلاردىڭ ءبارىنىڭ قولىندا مىلتىق جوق. سونى سەزە مە ەكەن, قاسقىرلار دا مالشىلاردى باسىنىپ العان. تۇسىنەمىز, شەكارا بويىندا ساقتالۋعا ءتيىس ەرەجەلەر مەن زاڭدار بار. الايدا ءتۇز تاعىسى ەرەجە مەن زاڭعا قارامايدى عوي. سوندىقتان قىستاقتاعى ادامدارعا كومەك كورسەتىلسە, يت-قۇستان قورعانۋ ءۇشىن مىلتىق ۇستاۋعا رۇقسات بەرىلسە», دەيدى داۋىتبەك نيازبەكوۆ. تاراتقان مالىمەتتەردەن اڭعارعانىمىز, سوڭعى جىلدارى وڭىردە قاسقىر سانى ارتا ءتۇسىپتى. 2015 جىلى ولاردىڭ سانى 948 بولسا, 2017 جىلى 1010-عا جەتىپ جىعىلعان. وتكەن جىلدىڭ سوڭعى ءۇش ايىندا اۋىل تۇرعىندارى 358 قاسقىردىڭ تەرىسىن وتكىزىپتى.
ازامات قاسىم,
«ەگەمەن قازاقستان»
شىعىس قازاقستان وبلىسى
