ارينە, «100 اۋىل بىردەن جاڭا جۇيەگە كوشىپ كەتتى, ءبارى جاقسى, ءبارى كەرەمەت» دەپ الاقان ىسقىلاۋعا ءالى ەرتە شىعار. بۇل رەتتە اۋەلگى كەزدە ءارتۇرلى قيىندىقتار مەن تۇسىنىسپەۋشىلىكتەردىڭ ورىن الاتىنى دا جاسىرىن ەمەس. وسىنداي ولقىلىقتارعا جول بەرمەس ءۇشىن جىل باسىندا جەرگىلىكتى ءوزى-ءوزى باسقارۋدى ەنگىزۋ بويىنشا رەسپۋبليكانىڭ ءار وڭىرىندە پرەزيدەنت جانىنداعى مەملەكەتتىك باسقارۋ اكادەمياسىنىڭ 16 فيليالى اشىلعان-دى. مۇنداي فيليال 4 قاڭتاردا وسكەمەندە دە ءوز جۇمىسىن باستادى. «اۋەلى 50 اكىمدى وقىتامىز, ولاردىڭ ءوزى ەكى كەزەڭمەن وقيتىن بولادى. ەكىنشى لەكتە تاعى ەلۋ اكىم كەلەدى. اكىمدەر بۇرىن اينالىسپاعان بيۋدجەتتىك باعدارلامالاردى جاساۋدا قاتەلىكتەرگە جول بەرمەس ءۇشىن ولقىلىقتىڭ الدىن الۋ جولدارىن ۇيرەتەمىز. وقۋ بىتكەن سوڭ دا اكىمدەر جەرگىلىكتى جەردە جۇمىستى باستاعاندا ءبىزدىڭ قىزمەتكەرلەر ونلاين رەجيمدە كەڭەس بەرىپ, قولداۋ كورسەتەدى. بولاشاقتا ماگيستراتۋرا ءبولىمى, قاشىقتىقتان وقىتۋ جۇيەسى اشىلۋى مۇمكىن», – دەيدى فيليال ديرەكتورى جانار رىسپەكوۆا.
اكىمدەردى وقىتۋ دەمەكشى, بۇل باعىتتاعى جۇمىستى شىعىس قازاقستان وبلىسى ەلدەن بۇرىن باستاپ كەتتى دەۋگە بولادى. جاقىندا جاڭا جۇيەگە كوشىپ جاتقان وڭىردەگى 50 اكىمگە ارنالعان العاشقى ءدارىستى ايماق باسشىسى دانيال احمەتوۆتىڭ ءوزى وقىدى. وبلىس اكىمى ءوز سوزىندە پرەزيدەنت جۇكتەگەن ماڭىزدى مىندەتتى ىسكە اسىرۋ ءۇشىن ايماقتا ەلىمىزدە العاش بولىپ «جەرگىلىكتى باسقارۋ جۇيەسىندە كاسىبيلىكتى دامىتۋ سەمينارى» اتتى ارنايى باعدارلاما, ياعني پيلوتتىق جوبا ازىرلەنگەنىن اتاپ ءوتتى. باعدارلاما مەملەكەتتىك پروتسەستىڭ تاريحي دامۋ كونتەكسىندەگى قازاقستاندىق مەملەكەتتىلىكتىڭ قالىپتاسۋى, مەملەكەتتىك جانە ۇكىمەتتىك باعدارلامالاردى مەملەكەتتىك جوسپارلاۋ جانە ىسكە اسىرۋ, اۋىلدىق ايماقتاردى دامىتۋعا, پروبلەمالارى مەن ولاردى شەشۋگە مەملەكەتتىك قولداۋ تەتىكتەرىن پايدالانۋ جانە كوممۋنالدىق مەنشىكتى باسقارۋ سەكىلدى 4 بلوكتان تۇرادى ەكەن. «مەملەكەتىك مەنەدجەر رەتىندە سىزدەر اۋماقتارىڭىزداعى الەۋمەتتىك-ەكونوميكالىق ماسەلەلەردى شەشەسىزدەر. بيىل دەربەس بيۋدجەت الدىڭىزدار. سەمينار بويىنشا العاشقى ءدارىستى مەن وقىدىم. ەندى ءار باسقارمانىڭ باسشىسى سىزدەرمەن تىكەلەي جۇمىس ىستەيتىن بولادى. ولار ءتيىستى ماتەريالداردى دايىندادى. ءىس-ارەكەت الگوريتمىن دە جاساپ بەرەدى. ال سىزدەرگە تەك سول بويىنشا ناقتى جۇمىس ىستەۋ قاجەت. بەرىلگەن مۇمكىندىكتى پايدالانىپ, دۇرىس جۇمىس ىستەي ءبىلۋدى ۇيرەنىڭىزدەر. سەبەبى, الداعى ۋاقىتتا مەملەكەتتىك باعدارلامالاردىڭ باسىم بولىگىن ىسكە اسىرۋ سىزدەرگە بايلانىستى بولماق», - دەدى د.احمەتوۆ.
ايماق باسشىسى ءوز دارىسىندە مەملەكەت باسشىسى نۇرسۇلتان نازارباەۆتىڭ تاۋەلسىز قازاقستان مەملەكەتىن قۇرۋ, قالىپتاستىرۋ جولىنداعى ەڭبەكتەرىنە دە كەڭىنەن توقتالدى. «تاۋەلسىزدىك جىلدارىندا قازاقستان الەمدەگى دامىعان 50 ەلدىڭ قاتارىنا قوسىلدى. وسىلايشا «قازاقستان-2030» ستراتەگياسى مەرزىمىنەن بۇرىن ورىندالدى. قازىر «قازاقستان-2050» ستراتەگياسىن جانە «100 ناقتى قادام» ۇلت جوسپارىن قولعا الىپ وتىرمىز. قاراپ وتىرساق, ەگەمەندىك العانىمىزعا 26 جىل عانا بولسا دا, وسى كەزەڭدە ەلىمىز وزگە مەملەكەتتەر عاسىرلار بويى ءجۇرىپ وتكەن جولدى ەڭسەردى. ءبىز وتە كۇردەلى, بىراق قىزىقتى جانە قۇبىلمالى كەزەڭدە ءومىر ءسۇرىپ وتىرمىز. مەنىڭ زامانداستارىما ۇلكەن تاريحي وزگەرىستەرگە, ايتۋلى وقيعالارعا قاتىسۋ جانە تىكەلەي ارالاسۋ قۇرمەتى بۇيىردى. بيىلعى جولداۋدا دا ەلباسى الدىمىزعا ون ناقتى مىندەتتى قويدى. ونى ىسكە اسىرۋعا بارشا قوعام بولىپ جۇمىلامىز», - دەدى وبلىس اكىمى.
ازامات قاسىم,
«ەگەمەن قازاقستان»
وسكەمەن
