جاڭادان ەنگىزىلەتىن وزگەرىستەرگە سايكەس, پاتەرلەر مەن باسقا دا عيماراتتاردىڭ يەلەرىنە باسقارۋدىڭ تەك ەكى ءتۇرى ۇسىنىلادى: ميب جانە كوندومينيۋم.
– ميب – كوندومينيۋم نىساندارىنداعى ادامدار نەمەسە قىزمەت كورسەتۋ سۋبەكتىلەرىمەن ءبىر كىرەبەرىستىڭ اتىنان كەلىسىمشارت جاساساتىن جالعىز ادام بولۋى مۇمكىن, – دەيدى قالالىق تۇرعىن ءۇي قاتىناستارى ءبولىمىنىڭ مامانى ەركەبۇلان بەسجىگىتوۆ.
– بۇل قۇرىلىم دا تۇرعىن ءۇي كىرەبەرىسىن جيناۋ مەن جوندەۋ بويىنشا قىزمەت كورسەتەدى. پاتەر يەلەرى كووپەراتيۆتەرى باسقارۋ ءتۇرى رەتىندە جاڭا تالاپتارمەن ۇندەسە الماي وتىر. ءار پيك-ءتىڭ ءوز سانتەحنيگى, ەدەن جۋشىسى مەن اۋلا سىپىرۋشىسى بار, بۇل دۇرىس ەمەس. قىزمەت تۇرلەرىن ولار وزدەرى كورسەتىپ, وزدەرى قاداعالايدى. ياعني اتقارعان جۇمىستارى شالا-شارپى بولعان كۇننىڭ وزىندە ولارعا سىن ايتىپ, ىقپال ەتۋ قيىن. ال ميب-تەر سەرۆيستىك كومپانيالارمەن شارتقا وتىرىپ, ونىڭ ورىندالۋ بارىسىن قاداعالاپ وتىراتىن بولادى.
كەزدەسۋگە قاتىسۋشىلاردىڭ دەنى پيك-تەردىڭ, وندا جۇمىس ىستەيتىن ادامداردىڭ ەندىگى كۇيى نە بولادى دەپ الاڭداۋلى. ولار يگەرە الماعان جۇمىستار كولەمىن جاڭا قۇرىلىم جۇزەگە اسىرا الا ما؟ جۇمىسسىزدىقپەن كۇرەس ونسىز دا ماندىماي جاتقاندا بۇل جاڭالىق كوممۋنالدىق قىزمەت ماماندارىن ناپاقاسىنان قاقپاي ما؟ باسقا ماسەلەلەردى ايتپاعاندا, ميب-تەر قۇجاتتامالاردى دۇرىس جۇرگىزە الا ما؟
ۇيلەر مەن ينجەنەرلىك توراپتارعا قىزمەت كورسەتۋدى ۇيلەستىرۋشى باقىتجان تاۋەشوۆتىڭ ايتۋىنشا, كوپشىلىك ولار كورسەتىپ وتىرعان قىزمەتكە رازى.
– ءبىزدىڭ سەرۆيستىك كومپانيادا تاريف مەيلىنشە تومەن, – دەيدى ول. – حالىق كوپ قاباتتى ءۇيدىڭ شاتىرىن جوندەۋ سياقتى كۇردەلى دە قىمبات جۇمىستار ءۇشىن اقى تولەۋگە دايىن ەمەس. سوندىقتان ءبىز ەلەكترمەن, سۋمەن قامتاماسىز ەتۋ, سۋاعار جەلىلەردى قالىپتا ۇستاۋ مىندەتىن موينىمىزعا الدىق. قىزمەتىمىز بەن جۇمىسىمىزدىڭ بارىسى, ولاردىڭ تولەماقىسى تۋرالى تۇرعىندارمەن كەزدەسۋلەردە اقىلداسىپ وتىرامىز.
جاسىراتىنى جوق, پيك وكىلدەرى جاڭا قۇرىلىمنىڭ ەنگىزىلۋىنە ءۇزىلدى-كەسىلدى قارسى. مۇنىڭ ءبارى بوس اۋرەشىلىك, ونىڭ ۇستىنە تۇرعىن ۇيلەردىڭ كوپشىلىگى ابدەن ەسكىرگەن دەسەدى ولار.
كەزدەسۋدىڭ شەشىمدى ءسوزىن قاراعاندى وبلىستىق كاسىپكەرلەر قۇقىن قورعاۋ جونىندەگى كەڭەسىنىڭ توراعاسى سەرىك تورەگەلدين ايتتى.
– سەرۆيستىك ۇيىمداردىڭ قىزمەتىن سالعان بەتتەن جوققا شىعارۋعا بولمايدى, – دەدى ول. – ولاردىڭ دا جۇمىس ىستەۋگە قۇقى بار. سەرۆيستىك قىزمەتتىڭ دامۋىنا توسقاۋىل بولا المايمىز. سىزدەردىڭ قۇرىلىمدارىڭىزدى بىردەن جاۋىپ تاستايىن دەپ وتىرعان دا ەشكىم وق. وزىنە وڭتايلى قىزمەتتى حالىق ءوزى تاڭداپ الادى.
قايرات ءابىلدا,
«ەگەمەن قازاقستان»
