حوك 2016 جىلعى ريو وليمپياداسىنىڭ ەكى كەزدەسۋىنىڭ كۇماندى ناتيجەسىنەن كەيىن وسىنداي ويعا كەلگەن. ونىڭ ءبىرىنشىسى قازاقستاندىق ۆاسيلي لەۆيت پەن رەسەيلىك ەۆگەني تيششەنكو جەكپە-جەگى بولسا, ەكىنشىسى رەسەيلىك ۆلاديمير نيكيتين مەن يرلانديالىق مايكل كونلان ايقاسى.
ء«بىز AIBA-نىڭ باسقارۋ ىسىنە الاڭداپ وتىرمىز. حوك-تىڭ اتقارۋشى كوميتەتى حالىقارالىق اۋەسقوي بوكس قاۋىمداستىعىنىڭ (AIBA) باسقارۋشىلىق, قارجىلىق, تورەشىلىك جانە دوپينگ ماسەلەلەرى جايلى ەسەپ بەرگەنىنە كوڭىلى تولمايدى. سوندىقتان حوك بۋەنوس-ايرەستە وتەتىن جاستار اراسىنداعى وليمپيادا مەن 2020 جىلى توكيودا ۇيىمداستىرىلاتىن جازعى ويىندارعا بوكستى ەنگىزۋ تۋرالى ءىستى قاراۋعا قۇقى بار.
ءوز ۋاقىتىندا ءبىز AIBA-دان كۇمان تۋدىرعان جەكپە-جەكتەردىڭ ەسەپتەمەسىن الدىق. ال تورەشىلىك ءىسى جەلتوقسان ايىندا قابىلداعان شەشىمدەرىمىزدىڭ ءبىر سەبەبى بولىپ وتىر. ءبىز تورەشىلىك تۋرالى نەعۇرلىم كوبىرەك مالىمەت سۇراتقان ەدىك, ءالى دە سۇراتىپ وتىرمىز. وسىعان قاتىستى كوڭىل تولارلىقتاي اقپارات العىمىز كەلەدى», دەدى توماس باح.
ايتا كەتەيىك, 2016 جىلعى وليمپيادا ويىندارىندا لەۆيت-تيششەنكو ايقاسىندا تورەشىلەر ءبىراۋىزدان جەڭىستى رەسەيلىككە بەرگەن. بىراق مۇنداي شەشىم كوپشىلىكتى تاڭ قالدىرىپ, جۇرت تالقىسىنا تۇسكەن بولاتىن. جەڭىمپازداردى ماراپاتتاۋ كەزىندە دە كورەرمەندەر نارازىلىقتارىن ءبىلدىرىپ, ىسقىرىپ تۇردى.
وتكەن جىلدىڭ سوڭىنا تامان AIBA پرەزيدەنتى چينگ-كۋو ۆۋعا بىرقاتار ايىپ تاعىلعاننان كەيىن قىزمەتىنەن قۋىلعان بولاتىن. وعان سىبايلاس جەمقورلىققا جول بەردى, قارجىنى ورىنسىز يگەردى دەگەن ايىپتار تاعىلدى. چينگ-كۋو ۆۋ AIBA-نى 11 جىل باسقاردى.
ال 28 قاڭتار كۇنى AIBA-پرەزيدەنت لاۋازىمىنا وزبەكستاندىق عافۋر راحيموۆ سايلاندى.
