بۇگىنگى تاڭدا بۇل مەكتەپتە سپورتتىڭ 13 ءتۇرى بويىنشا 438 ءجاسوسپىرىم 7-11 سىنىپتاردا ءبىلىم الىپ ءارى سپورتتىق شەبەرلىكتەرىن شىڭداۋدا. ولاردى 25 جوعارى بىلىكتى مامان جاتتىقتىرادى. مۇعالىمدەردىڭ 70 پايىزدان استامى جوعارى كاتەگوريالى. مەكتەپتىڭ ارنايى سپورتتىق بازاسى, دارىگەرلىك ورتالىعى جانە وقۋ كورپۋسى بار.
مۇندا ءبىلىم الىپ جاتقان شاكىرتتەردىڭ كوبى از قامتىلعان وتباسىلاردان شىققاندار. ولاردىڭ دەنى مەكتەپتى بىتىرگەننەن كەيىن جوعارى وقۋ ورىندارىنا ءتۇسىپ, وزدەرىنىڭ بىلىمدەرى مەن سپورتتىق بىلىكتىلىكتەرىن شىڭداي المايدى. سپورتتىق كارەرالارىن ورتا جولدان اياقتاپ, مەكتەپتى بىتىرگەن دەڭگەيدە قالادى. ءسويتىپ كەيبىر تالانتتى جاستاردىڭ كاسىبي سپورتتاعى بولاشاعى بۇلدىر بولىپ وتىر.
ونىڭ ۇستىنە مەكتەپتى بىتىرگەن جاستاردىڭ بىزدە وقۋعا تۇسە الماعان سوڭ رەسەيگە كەتۋ تەندەنتسياسى ارتىپ جاتىر. ماسەلەن, 2015 جىلى – 7, 2016 جىلى 8 تۇلەگىمىز رەسەيگە كوشىپ كەتكەن. وسىنىڭ ءوزى بىزگە ەكونوميكالىق تۇرعىدان دا سوققى بولىپ تيۋدە, ويتكەنى مەملەكەت ءاربىر وقۋشىنىڭ شىعىنىنا ءبىر جىلعا 1 ملن 500 مىڭ تەڭگە تولەيدى, ال 7 سىنىپتان 11 سىنىپقا دەيىنگى بەس جىلدا ارقايسىنا كەم دەگەندە 7 ملن 500 مىڭ تەڭگە شىعىن شىعادى ەكەن. ەندى سول بالالارىمىز وزگە ەلدىڭ تۋىنىڭ استىندا قىزمەت ەتۋگە ءماجبۇر.
وسىعان بايلانىستى وبلىستىق سپورتتىق مەكتەپ-ينتەرناتتى وليمپيادالىق رەزەرۆتىڭ وبلىستىق سپورتتىق كوللەدجىنە اينالدىرۋ كەرەك دەگەن ۇسىنىس ەنگىزىپ وتىرمىز. سوندا ءبىز:
– سپورتتىق رەزەرۆتىڭ ۇزىلمەيتىن جۇيەسىن دايىندار ەدىك;
– جاسوسپىرىمدەر سپورتىنىڭ ۇلكەن سپورتتىق جەتىستىكتەرگە باستايتىن جوعارى بۋىنمەن جالعاسۋىن قامتاماسىز ەتەر ەدىك;
– وبلىس سپورتشىلارىنىڭ ۇلتتىق قۇراما كوماندالاردىڭ قاتارىنا ءوتۋى ارتار ەدى;
– كوللەدجدى بىتىرگەننەن كەيىن ءاربىر تۇلەككە «جاتتىقتىرۋشى-وقىتۋشى» ماماندىعى بەرىلەتىن بولعاندىقتان, ەلىمىزدەگى جاتتىقتىرۋشىلار قاتارىن كوبەيتىپ, ولاردىڭ مەكتەپتەردەگى دەنە تاربيەسىنىڭ وقىتۋشىلارى, بجسم-عا (بالالار مەن جاسوسپىرىمدەردىڭ سپورتتىق مەكتەبى), اۋىلدىق, اۋداندىق مەكتەپتەرگە, فيتنەس ورتالىقتارعا, وندىرىستىك كاسىپورىندارعا نۇسقاۋشى, جاتتىقتىرۋشى بولىپ ورنالاسۋىن قامتاماسىز ەتەر ەدىك.
قاراعاندى وبلىسىنىڭ دەنە تاربيەسى جانە سپورت باسقارماسىنىڭ 2017 جىلعى مالىمەتىنە قاراعاندا, تەك وسى وبلىستا عانا 9 اۋدان 76 سپورت مامانىنا ءزارۋ بولىپ وتىر. مۇنداي جاعدايلار باسقا وبلىستاردا دا بار ەكەنى ءسوزسىز. ءبىز ايتىپ وتىرعان كوللەدج اشىلسا, وسى زارۋلىكتى جويۋعا بولار ەدى.
سپورت كوللەدجدەرىنىڭ اشىلۋى پرەزيدەنتتىڭ 2018 جىلعى جولداۋىنىڭ تالاپتارىنا دا ساي كەلەدى. ەلباسى قاجەت ەتكەننىڭ بارىنە اقىسىز كاسىبي-تەحنيكالىق ءبىلىم بەرۋىمىز كەرەك دەپ تالاپ قويعانى بەلگىلى.
مىنە, وسى ماسەلەلەردى ايتا وتىرىپ, مەن مادەنيەت جانە سپورت ءمينيسترى ارىستانبەك مۇحامەدي ۇلىنا دەپۋتاتتىق ساۋال جولدادىم. ساۋالدى قولداپ ءماجىلىس دەپۋتاتى, وليمپيادا چەمپيونى و.شيشيگينا دا قول قويدى. مينيستر ءبىزدىڭ ۇسىنىسىمىزعا قولداۋ كورسەتەدى دەگەن ۇمىتتەمىز.
سەرىك ساپيەۆ,
ءماجىلىس دەپۋتاتى,
وليمپيادا چەمپيونى
