ءبىزدىڭ قولدانىستاعى زاڭنامالارىمىزدا مۇگەدەكتەردىڭ قۇقىن قورعاۋ ماسەلەسى قاراستىرىلعانىمەن, وسى نورمالاردى ىسكە اسىراتىن كەشەندى باعدارلامالار جاسالماعان. مىسالى, ەلىمىزدە بارلىعى 8 مىڭ مادەنيەت نىسانى بولسا, سونىڭ 15 پايىزى عانا مۇگەدەكتەرگە قولجەتىمدى. ەڭبەك جانە حالىقتى الەۋمەتتىك قورعاۋ مينيسترلىگى تاراپىنان وسى ماسەلە جاقىندا تەكسەرىلىپ, بۇگىنگە دەيىن 2,2 مىڭ نىسانعا پاسپورت بەرىلگەن, سونىڭ 1,2 مىڭىندا عانا مۇگەدەكتەرگە قولجەتىمدىلىك قاراستىرىلعان. ال مينيسترلىك ءوز تاراپىنان مۇگەدەكتەرگە قولجەتىمدىلىك جاساۋ قاجەتتىگىن زاڭدى جولمەن تالاپ ەتە المايدى. ونداي نورما زاڭنامادا قاراستىرىلماعان.
ارينە الەۋمەتتىك قورعاۋ ورگاندارى مۇگەدەكتەرگە ارنالعان ءتۇرلى شارالار, سونىڭ ىشىندە شىعارماشىلىق كونكۋرستار, كورمەلەر, ەكسكۋرسيالار ۇيىمداستىرىپ جاتادى. بىراق مۇنداي شارالار جۇيەلى ەمەس, ءبىر رەتتىك سيپاتتا عانا. ولار قارجىنىڭ تابىلۋىنا بايلانىستى جانە قانداي دا ءبىر مەرەكەلىك داتالاردىڭ قارساڭىندا عانا جاسالادى. ونىڭ ۇستىنە مۇگەدەك جاندارمەن جۇمىس ىستەۋگە بەيىم ماماندار دا تاپشى. سوندىقتان دا مۇگەدەك جانداردىڭ مادەنيەت پەن ونەر سالاسىنداعى مۇمكىنشىلىكتەرى اشىلا بەرمەيدى.
وسىعان وراي ءبىز مادەنيەت جانە سپورت ءمينيسترى ارىستانبەك مۇحامەدي ۇلىنا دەپۋتاتتىق ساۋال جولداپ, كەلەسى شارالاردى جاساۋدى وتىندىك:
- مادەنيەت سالاسىنىڭ مەكەمەلەرىنە جاپپاي ساراپ جۇرگىزىپ, ولاردىڭ مۇگەدەك جانداردىڭ قولجەتىمدىلىگىنە قانشالىقتى بەيىم ەكەندىگىن انىقتاۋ;
- مۇگەدەكتەرمەن مادەنيەت جانە ونەر سالاسىندا جۇمىس ىستەيتىن مامانداردىڭ بەيىمدىلىگىن ارتتىراتىن شارالار جوسپارىن جاساۋ;
- مادەنيەت جانە ونەر سالاسى بويىنشا مۇگەدەكتەرمەن جۇمىس ىستەيتىن قوعامدىق ۇيىمدار ءۇشىن گرانتتار قاراستىرۋ;
وسى ءوتىنىش اياقسىز قالماس دەگەن ۇمىتتەمىز.
جانات وماربەكوۆا,
ءماجىلىس دەپۋتاتى
