مەكتەپ – كەمە,ء بىلىم – تەڭىز
مەكتەپكە بارعان ساتتە «كىتاپ وقۋ كۇنى» شاراسىنىڭ كۋاسى بولدىق. وڭىرلىك «رۋحاني جاڭعىرۋ» جوبالىق كەڭسەسى ۇيىمداستىرعان فلەش-موب وبلىستاعى بارلىق مەكتەپتەردە ءوتتى. تەحنيكالىق گيمنازيا شاكىرتتەرى دە وقىعان كىتاپتارى جايلى ويلارىمەن ءبولىسىپ جاتىر ەكەن. «ادامزاتتىڭ نەگىزگى قۇندى يگىلىكتەرىنىڭ ءبىرى – كىتاپ. ءار وقىعان كىتاپتان ءبىلىم جينالادى, تانىم كوكجيەگىن كەڭىتىپ, ومىرگە دەگەن كوزقاراسىمنىڭ قالىپتاسۋى ءۇشىن كىتاپتىڭ ماڭىزدى ەكەنىن بىلەمىن. «كىتاپ وقۋ كۇنىندە» جاقىندا عانا وقىپ بىتىرگەن تاحاۋي احتانوۆتىڭ «شىراعىڭ سونبەسىن» رومانى جايلى ايتتىم», دەيدى 9-سىنىپ وقۋشىسى اياۋلىم لاتيەۆا. ال گيمنازيا كىتاپحاناشىسى يرينا ۋحوۆا وسى شارادا بەلسەندىلىك تانىتقاندار وبلىستىق جاس كىتاپقۇمار وقۋشىلار قوعامداستىعىنا مۇشە بولاتىنىن ايتتى. «بالالار كىتاپ وقىمايدى دەي المايمىن, – دەيدى ول. – 4,5,6-سىنىپ وقۋشىلارىنىڭ كىتاپحاناعا كەلۋ بەلسەندىلىگى جوعارى. ونىنشى سىنىپ وقۋشىلارى دا بوس ۋاقىتتارىندا كىتاپ وقيدى. اڭگىمەلەسۋدەن اڭعارعانىم, 8,9-سىنىپتاعىلار كەرەك ماعلۇماتتى ينتەرنەتتەن العان ءتيىمدى دەپ سانايدى ەكەن. بالالاردى كىتاپحاناعا تارتۋ ماقساتىندا «جىلدىڭ ۇزدىك وقىرمانى», «ەڭ كوپ كىتاپ وقىعان سىنىپ» دەگەن بايقاۋلار ۇيىمداستىرامىز».
مۇعالىم مەرەيى
اعىلشىن ءتىلىن تەرەڭدەتىپ وقىتاتىن تەحنيكالىق گيمنازيا ديرەكتورى, «قۇرمەت» وردەنىنىڭ يەگەرى سوفيا اليباەۆا ء«بىلىم ورداسىنىڭ باستى ماقساتى – ءبىلىم بەرۋ دەڭگەيىنىڭ ساپاسىن كوتەرۋدە وقىتۋدىڭ جاڭا يننوۆاتسيالىق تەحنولوگيالىق ىزدەنىسىن ەنگىزۋ, سول ارقىلى سانالى, رۋحى بيىك ۇرپاق تاربيەلەۋ», دەيدى. قازىر ۇجىمدا 105 مۇعالىم بار, ونىڭ 45-ءى جوعارى ساناتتى. ەكى مىڭنان استام وقۋشى ءبىلىم الىپ جاتىر. بيىلعى وقۋ جىلىنىڭ باستى جاڭالىعى – گيمنازيا جاڭا عيماراتقا كوشتى. بۇعان دەيىن بۇرىنعى بالاباقشانىڭ ورنىندا وقىپ كەلگەن ەدى. «تەڭىزشەۆرويل» كومپانياسىنىڭ «يگىلىك» باعدارلاماسى اياسىندا «نۇرسايا» شاعىن اۋدانىندا كەڭ دە جايلى عيماراتقا ورنالاسقان ءبىلىم وشاعىندا ساپالى ءبىلىم الۋ ءۇشىن قاجەت جاعدايدىڭ ءبارى بار.
«گيمنازيانىڭ ماتەريالدىق بازاسىن نىعايتۋدا وبلىس باسشىسى نۇرلان نوعاەۆ اركەز قولداۋ كورسەتىپ وتىرادى. «نكوك», «تشو» كومپانيالارىنىڭ كومەگى دە زور. ءبىزدىڭ باستى ماقتانىشىمىز, جەتىستىگىمىز – شاكىرتتەرىمىز. ءار سالادا ەلىمىزدىڭ ءوسىپ-وركەندەۋىنە ءوز ۇلەستەرىن قوسىپ جۇرگەن شاكىرتتەرىمىزدى ۇلگى ەتەمىز».
«ساۋات اشۋ» «الىپپەدەي» بولماي تۇر
– «ەگەمەن قازاقستان» گازەتىنىڭ ءبىلىم, تاربيە, ءتالىم تاقىرىپتارىن نازاردان تىس قالدىرماي جۇرگەنى قۋانتادى, – دەيدى گيمنازيانىڭ جوعارى ساناتتى مۇعالىمى ەلميرا ەسمۇقانوۆا. – ەلىمىزدىڭ تۇكپىر-تۇكپىرىندەگى ارىپتەستەرىمىزدىڭ جاڭارتىلعان ءبىلىم بەرۋ جۇيەسى جايىنداعى وي-پىكىرلەرىن دە باسىلىم بەتىنەن وقىپ ءجۇرمىز. مەنىڭ ايتايىن دەگەنىم – جاڭا باعدارلاما تۋرالى. جەتىستىگى جازىلىپ تا, ايتىلىپ تا ءجۇر. بۇل باعدارلامادا بالالاردىڭ ءتىل بايلىعىن دامىتۋعا باسىمدىق بەرىلگەن. گيمنازيادا سەگىز ءبىرىنشى سىنىپ بار. قيىندىعى – بارلىق بالانىڭ دەڭگەيى, قابىلداۋى بىردەي ەمەس.
ۇندەمەي وتىرىپ سويلەيتىن دە بالالار بار. ال باعدارلاما تالابى كوبىنە بالانى سويلەتۋگە نەگىزدەلگەن. بۇل وڭاي ەمەس. ءار بالانىڭ تابيعاتى, دامۋ دەڭگەيى ءارتۇرلى. بىلگەنىن كورسەتە المايتىن وقۋشىلار دا بار. «ساۋات اشۋدى» مىسالعا الساق, بالالارعا كۇردەلى تاپسىرمالار, تەرميندەر بەرىلگەن. مينيسترلىك بەكىتكەسىن, مۇعالىمدەر وقىتىپ وتىر, الايدا كىتاپتىڭ ىشىندە كەرەك تە, كەرەك ەمەس تە مالىمەتتەر بارىن ايتقىم كەلەدى. بالانىڭ جاس ەرەكشەلىگىنە ساي ەمەس ماعلۇماتتار بار. «ساۋات اشۋدا» دا, ماتەماتيكادا دا جازۋدان گورى اۋىزشا تاپسىرمالارعا كوپ كوڭىل بولىنگەن».
تاۋەلسىزدىكتىڭ تەكتى ۇرپاقتارىن تاربيەلەۋ جولىندا ايانباي قىزمەت ەتىپ جۇرگەن ۇستازداردىڭ ەڭبەگى قانداي قۇرمەتكە دە لايىق. سول مارتەبەگە لايىقتاردىڭ قاتارىندا اتىراۋ قالاسىنداعى اعىلشىن ءتىلىن تەرەڭدەتىپ وقىتاتىن تەحنيكالىق گيمنازيانىڭ مۇعالىمدەرى دە بار ەكەنى كوڭىلگە قۋانىش ۇيالاتادى. ۇستاز ءۇشىن شاكىرت جەتىستىگىنەن قىمبات نە بار؟ جاقىندا رەسپۋبليكالىق وليمپيادانىڭ ەكىنشى كەزەڭىنەن كوماندالىق ەسەپ بويىنشا ءبىرىنشى ورىندى جەڭىپ العان گيمنازيانىڭ ءار شاكىرتى ونەگەلى. ويتكەنى ولار تاۋەلسىزدىكپەن بىرگە ءبىلىم ايدىنىنا جول تارتقان ءبىلىم كەمەسىنىڭ ورەندەرى.
باقىتگۇل باباش,
«ەگەمەن قازاقستان»
اتىراۋ
